5 حاجات الافضل تتجنبي تعمليهم بعد الوجبات

بقلمريهام محمود فيصحة visibility3459

كتير مننا مع مشاغل الحياة بيبقى نمط حياتنا سريع في كل حاجة ومش بندي لنفسنا فرصة ناخد بريك ما بين مهام يومنا يعني بناكل وبسرعة نشرب الشاي وبعدها ناخد شاور كله ورا بعضه من غير فواصل, لكن هنا المشكلة ان في حاجات ممكن لو عملناها ورا بعض على طول تكون مؤذية لينا وده اللي هنعرفه النهاردة من خلال موضوعنا هنتعرف على حاجات متعمليهاش بعد الوجبات.

حاجات متعمليهاش بعد الوجبات:

1- تاخدي شاور:

كتير مننا ممكن بعد الاكل مباشرة تدخل تاخد شاور لكن ده غلط, لان مع الشاور درجة حرارة الجسم بتزيد وعشان الجسم يتعامل مع ده بيبعت دم اكتر للجلد من الكمية المعتادة او الطبيعية وده ممكن يعطل عملية الهضم ويبطيء عملية التمثيل الغذائي.

عشان كده افضل وقت للشاور هو بعد الوجبة ب 30 دقيقة.

حاجات متعمليهاش بعد الوجبات
حاجات متعمليهاش بعد الوجبات

2- شرب الشاي:

في كتير عندهم شرب الشاي بعد الاكل على طول يعتبر جزء من الوجبة او حاجة مكملة ميقدروش يستغنوا عنها في روتينهم اليومي, لكن الدراسات اثبتت ان العادة دي مضرة لان الشاي بيمنع امتصاص الحديد المعادن اللي بتلعب دور مهم للجسم, عشان كده الافضل تجنب شرب الشاي بعد الوجبة على طول خصوصا للاطفال والحوامل والاشخاص اللي بيعانوا من نقص الحديد.

وافضل وقت لشرب الشاي يكون بعد الوجبة بساعة, وفي اشخاص بيحبوا يشربوا قهوة بدل الشاي الافضل كمان متتشربش على معدة فاضية, او ممكن تكتفي بس بكوباية مية بدل القهوة.

حاجات متعمليهاش بعد الوجبات
حاجات متعمليهاش بعد الوجبات

3- النوم:

النوم بعد الاكل على طول زي ما قرينا وسمعنا كتير انه ممكن يسبب زيادة في الوزن ولكن حتى وان كان ده مش بيأثر عند بعض الناس ومش بيسبب لهم زيادة وزن لكن بردو لسه العادة دي تعتبر مش صح لانه بتسبب اضرار تانية, لان النوم بمعدة مليانة ممكن يسبب حرقة في المعدة, والتجشؤ, والحموضة العالية, ده غير ان الدراسات اثبتت النوم المنتظم بعد الغدا او العشا على طول ممكن يزود خطر الاصابة بالسكتة الدماغية.

عشان كده الخبراء بينصحوا انه افضل وقت للنوم يكون بعد مش اقل من ساعتين من الاكل.

حاجات متعمليهاش بعد الوجبات
حاجات متعمليهاش بعد الوجبات

4- التمرين:

التمرين بعد الاكل على طول من الحاجات اللي مش بينصح بيها الخبراء, لان لو اتمرنتي ومعدتك مليانة ده ممكن يأدي للاحساس بعدم راحة ويسبب الفواق “الزغطة” او الغثيان وممكن كمان يأدي لحاجات اخطر زي زيادة خطر الصدمة والتشنجات.

عشان كده لو انتي عايزة تتمرني او مستعجلة على التمرين ممكن تبدأي الاول بتمشية خفيفة لحد ما يمر وقت ميقلش عن ساعتين بعد الاكل تقدري تتمرني بعدها بشكل طبيعي.

حاجات متعمليهاش بعد الوجبات
حاجات متعمليهاش بعد الوجبات

5- التدخين:

تقريبا كل اجهزة الجسم بتكون فعالة ومشاركة اثناء عملية نشاط الجهاز الهضمي او عملية الهضم ومن هنا هيتم امتصاص النيكوتين بقوة مزدوجة او بشكل مضاعف وبالتالي ده هيزود الاضرار, بالاضافة كمان الدراسات اثبتت ان التبغ بيمنع امتصاص الفيتامينات والمعادن بما فيهم الكالسيوم وفيتامين C و D وده هيخلي الجسم ميستفادش من اي حاجة دخلت له.

واكيد الافضل ان المدخنين يحاولوا يمتنعوا عن التدخين بشكل نهائي, لكن للي بيدخن باستمرار ولسه مش قادر يبطل العادة السيئة دي الافضل ميدخنوش بعد الاكل مباشرة ادي الجسم فرصة وقت ميقلش عن 20 دقيقة تقريبا على الاقل عشان يمتص الفيتامينات والمعادن اللي في الاكل قبل التدخين.

حاجات متعمليهاش بعد الوجبات
حاجات متعمليهاش بعد الوجبات

اشربي مية كل يوم على الريق لمدة شهر وشوفي ايه اللي هيحصل !

فوايد شرب المية على الريق