مترميش قشر البطيخ واعملي بيه وصفات لذيذة .. واعرفي فوايده الصحية

ريهام محمود
ريهام محمود
في
مطبخ
6064

البطيخ من انواع الفاكهة المفيدة جدا للصحة بيحتوي على 98% من المية, وغني جدا بالمواد الغذائية زي فيتامين A و C, بيتا كاروتين, الليكوبين, والبوتاسيوم والمغنيسيوم والثيامين والريبوفلافين والنياسين وفيتامين B6 والكالسيوم والحديد والفوسفور والزنك, هل فكرتوا قبل كده ان قشر البطيخ ليه فوايد؟ لكن احنا مش بنستفاد بيها لاننا طبعا بنرميه ومحدش اكيد فكر ياكله لكن بعد موضوعنا النهاردة اكيد مش هترمي قشر البطيخ تاني, بعد ما نتعرف على فوايد قشر البطيخ الصحية وازاي ممكن تعملي منه وصفات لذيذة.

– فوايد قشر البطيخ الصحية:

1- تقريبا 1 بوصة مكعب من قشر البطيخ بيحتوي على 1.8 سعرة حرارية بس ومعظمها من الكربوهيدرات, يعني سعراته الحرارية قليلة وفي نفس الوقت قيمته الغذائية عالية, شريحة من قشر البطيخ تقريبا بتديكي 2% من احتياج الجسم اليومي من فيتامين C و1% من فيتامين B6 وده بيخلي قشر البطيخ مفيد جدا للبشرة وللجهاز العصبي.

2- قشر البطيخ بيحتوي على مركب اسمه سيترولين اللي يعتبر عنصر مهم وحيوي جدا للقلب وجهاز المناعة والدورة الدموية, العنصر ده كمان بيساعد على فقدان الوزن لان الالياف الموجودة في قشر البطيخ بتدي شعور بالامتلاء لفترة طويلة, والدراسات اثبتت ان الاشخاص اللي بيتناولوا عنصر السيترولين بيفقدوا الوزن بنسبة 30% اكتر من الاشخاص اللي مش بيحصلوا عليه.

3-قشر البطيخ كمان بيحتوي على مضادات الاكسدة اللي بتحمي البشرة من الجذور الحرة اللي بتسبب التجاعيد وشيخوخة البشرة.

4- مفيد جدا للحوامل, لان القشور بتساعد على منع حرقان القلب, وبيقلل من التورم المرتبط عادة بفترة الحمل, والسكريات الطبيعية الموجودة في قشر البطيخ بتساعد على التقليل من الاعياء والتعب اللي ممكن يحصلك كل يوم الصبح ومن تقلصات العضلات, ممكن تجربي تاكلي شريحة صغيرة من القشر يوميا بانتظام عشان تتجنبي اي تشنج في العضلات في المستقبل.

فوايد قشر البطيخ 1
فوايد قشر البطيخ 1

– افكار لاكله:

1- ممكن تجربي تقطعيه شرايح رفيعه اوي او تبشريه وترشي عليه زيت زيتون وملح وفلفل, او ممكن تقطعي معاه شرايح فلفل وترشي عليه بابريكا وملح وفلفل وكزبرة وتاكليه.

2- ممكن تضيفي له قيمة غذائية زيادة بانك تقطعيه رفيع وتضيفي له خضروات زي الجزر المبشور مثلا او اي خضار تفضليه.

فوايد قشر البطيخ 2
فوايد قشر البطيخ 2

– وصفات بقشر البطيخ:

1- كاندي قشر البطيخ:

المكونات:

– 4 كوبايات قشر بطيخ “الجزء الابيض بس”.

– 1 ¼ كوباية مية.

– 4 كوبايات مية اضافية.

– ¼ كوباية ملح.

– 2 كوباية سكر.

– قشر ليمونة.

وصفات بقشر البطيخ 1
وصفات بقشر البطيخ 1

الطريقة:

– هنقشر الجزء الاخضر من القشر وناخد الجزء الابيض بس نقطعة شرايح زي البطاطس المقلية, حطيه في حله وضيفي عليه مية سخنة لحد ما تغطيه وسيبيه يغلي 5 دقايق.

– ارفعيه من على النار وصفيه من المية وسيبيه يبرد, بعدين هاتي 4 كوبايات المية ودوبي فيهم الملح وصبيهم عليه وسيبيه لمدة 6 ساعات او طول الليل.

– بعدها اتخلصي من المية المالحة واشطفيه بالمية العادية كويس جدا كذا مره, وبعدين غطيه بالمية وحطيه على نار هادية لحد ما القشر يطرى وبعدين صفية من المية.

– في حلة اخلطي كوبايتين السكر في ال 1 ¼ مية وقشر الليمون, حطيهم على النار وقلبيهم مع بعض لحد ما السكر يدوب وسيبيهم لحد ما تلاقي المية عملت فقاقيع.

– ضيفي قشر البطيخ للمية وسيبيه لحد ما يستوي, وقلبيه باستمرار عشان ميلزقش في الحلة.

– بعد ما يستوي كويس والمية بتاعته تتقل شوية او تعمل خيط طويل ارفعيه من على النار وصفيه من المية.

– دلوقتي هنجيب القشر ونغطي كل قطعة بالسكر كويس ونتخلص من اي سكر زيادة ونرصه في اي صينيه ونسيبه لحد ما يبرد وينشف.

الطريقة بالفيديو:

2- تشاتني قشر البطيخ:

المكونات:

– 5 كوبايات قشر بطيخ مقطعين مكعبات صغيرة “الجزء الابيض بس”.

– ½ كوباية خل تفاح.

– 1 كوب سكر.

– 25 جرام جنزبيل مبشور.

– 2 معلقة صغيرة فلفل اسود حبيبات.

– 2 فلفل احمر مقطعة شرايح رفيعة.

– 4 فصوص ثوم مفروم او مبشور.

الطريقة:

حطي المكونات كلها في حلة مع بعض على نار هادية وسيبيها لمدة 5 ساعات لحد ما تستوي, حطيه مع المية بتاعته او الصوص اللي استوى فيه في برطمان محكم الغلق, وخزنيه في التلاجة لمدة كام اسبوع وبعدها تقدري تاكلي منه.

وصفات بقشر البطيخ 2
وصفات بقشر البطيخ 2

3- مخلل قشر البطيخ:

المكونات:

– قشر بطيخ.

– من 2 – 3 فصوص ثوم.

– من 2 – 3 عيدان شبت.

– 2 كوب مية.

– ¼ كوباية ملح.

والمقادير دي لبرطمان كبير.

– هنحضر المحلول الملحي الاول, هنحط المية في حلة ونحطها على النار لحد ما تغلي وبعدين هنرفعها من على النار وندوب فيها الملح.

– اثناء الوقت ده هنقطع قشر البطيخ هنتخلص من الجزء الاخضر وناخد بس الجزء الابيض ونقطعه شرايح.

– حطي قشر البطيخ في البرطمان وضيفي لها الثوم والشبت واضغطي على القشر جوه البرطمان كويس عشان تتخلصي من اي هوا فيه.

– لما المحلول الملحي اللي عملناه يبرد شوية ويبقى زي درجة حرارة الغرفة كده هنصبه في البرطمان على قشر البطيخ وسيبي تقريبا ¼ البرطمان من فوق, ودوسي على القشر كويس بالمعلقة جوه البرطمان عشان تتخلصي من الهوا وحطي محلول ملحي تاني لو لقيتيه لسه محتاج.

– اقفلي البرطمان كويس, حطيه في حلة فيها مية على النار وسيبيه يغلي لمدة 10 دقايق وبعدين شيليه من المية, وسيبيه تقريبا اسبوع بعدها تقدري تاكلي منه.

– طريقة تانية:

قطعي قشر البطيخ شرايح وحطيه في البرطمان, وفي طبق اخلطي كميات متساوية من خل التفاح والمية وضيفي لهم ملح وسكر والكمية حسب الطعم المفضل ليكي وقلبيهم لحد ما يدوبوا خالص في المية وممكن تضيفي لها معلقة بابريكا, بعدين صبي المية على القشر في البرطمان وغطيه واحفظيه في التلاجة ليلة كاملة وبعدها تقدري تاكلي منه, وممكن يقعد معاكي في التلاجة على الاقل لمدة شهر تقريبا.

ممكن تحطوا مع المخلل اي اضافات تانية تفضلوها يعني ممكن تضيفوا فلفل اسود, ورق لوري, وزي ما قولنا الحبهان والثوم حسب الطعم اللي تفضلوه.

وصفات بقشر البطيخ 3
وصفات بقشر البطيخ 3

4- سلطة قشر البطيخ:

المكونات:

– 2 كوب قشر بطيخ مبشور.

– ¼ كوباية زبادي.

– ¼ كوباية Sour Cream.

– 1 ½ معلقة كبيرة مسطردة.

– 1 معلقة كبيرة خل تفاح.

– 4 معالق صغيرة عصير ليمون.

– 1 معلقة كبيرة سكر.

– 1 معلقة صغيرة فلفل اسود.

– 2 معلقة صغيرة زيت زيتون.

– ملح.

وصفات بقشر البطيخ 4
وصفات بقشر البطيخ 4

الطريقة:

هنخلط المكونات كلها مع بعض ماعدا قشر البطيخ ونقلبهم كويس لحد ما يمتزجوا, وبعدين نضيف عليهم قشر البطيخ المبشور وكوباية جزر مبشور ولو حابة تضيفي لهم اناناس مقطع وقلبيهم مع بعض, وكده تبقى جاهزة للتقديم.

الطريقة بالفيديو:

8 وصفات بالزبادي صحية ولذيذة جدا للصيف

وصفات بالزبادي صحية ولذيذة
وصفات بالزبادي صحية ولذيذة

مقالات متعلقه

طريقة عمل حلوى اللدو الهندية

طريقة عمل حلوى اللدو الهندية

طريقة عمل شوربة العدس بالبطاطس

طريقة عمل شوربة العدس بالبطاطس

طريقة عمل كيك الصفوف اللبنانية

طريقة عمل كيك الصفوف اللبنانية