8 وصفات بالزبادي صحية ولذيذة جدا للصيف

ريهام محمود
ريهام محمود
7771

في الصيف والحر دايما بنبقى محتاجين حاجات سقعة تبرد علينا حرارة الجو ومن اكتر الحاجات اللي تقوم بالمهمة دي هي الزبادي ومش بس هتبقى وصفة باردة ولذيذة في حر الصيف لكن كمان الزبادي غنية جدا بالمغذيات الصحية, والنهاردة جايبين لكل بنات حوا 8 وصفات بالزبادي صحية ولذيذة جدا مناسبة لموسم الصيف وكمان بسيطة وسريعة ومش هتاخد منك وقت ولا مجهود.

وصفات بالزبادي صحية ولذيذة:

1- زبادي بالكراميل المملح:

– طريقة الكراميل:

المكونات:

– كوباية سكر.

– 6 معالق كبيرة زبدة بدرجة حرارة الغرفة.

– ½ كوباية Heavy Cream.

– معلقة صغيرة ملح.

الطريقة:

حطي السكر في طاسه على نار متوسطة مع التقليب المستمر بمعلقة خشب لحد ما يدوب ويتحول للون البني.

بعد ما السكر يدوب خالص ضيفي الزبدة مع التقليب المستمر لحد ما تدوب مع السكر هتاخد تقريبا من 2 – 3 دقايق, بعد ما تدوب ضيفي الكريمة للخليط وقلبيهم مع بعض كويس, سيبي الخليط يغلي لمدة دقيقة.

ارفعيه من على النار ودوبي فيه معلقة الملح, وكده يبقى الكراميل بتاعنا جاهز للاستخدام في الوصفة, وباقي الكراميل ممكن تحطيه في برطمان وتحتفظي بيه في التلاجة ممكن يقعد معاكي لحد اسبوعين.

– طريقة الزبادي بالكراميل:

المكونات:

2 ½ كوباية زبادي.

1/3 كوباية لبن.

½ كوباية كراميل.

الطريقة:

دفي الكراميل شوية وبعدين ارفعيه من على النار وضيفي عليه الزبادي واللبن وقلبيهم مع بعض لحد ما المكونات كلها تمتزج كويس مع بعض, وبعدين هاتي شوية كراميل تانيين صبيهم على الخليط وقلبي بالراحة في خطوط عشوائية كده عشان تعملي شكل بس, وبعدين صبي الخليط في قوالب الايس كريم او حطيه في قوالب وحطيه في الفريزر لحد ما يتجمد, ولما تطلعيه حطيه تحت مية دافية لمدة 30 ثانية وطلعيه من القوالب بتاعته.

وصفات بالزبادي صحية ولذيذة 1
وصفات بالزبادي صحية ولذيذة 1

2- زبادي بالموز والفراولة:

المكونات:

– 3 كوبايات فراولة مجمدة.

– من 2 – 3 موزات مجمدين.

– كوباية زبادي كبيرة.

الطريقة:

هنخلط الزبادي مع الفراولة والموز ونضربهم مع بعض في الخلاط لحد ما الخليط يبقى ناعم خالص, هنصبه في قالب ونحط عليه على الوش فاكهة متقطعة ونحطه في الفريزر لحد ما يتجمد.

– بالنسبة لطريقة تجميد الفاكهة قطعيها وحطيها في كيس بلاستيك وحطيها في الفريزر لحد ما تتجمد واستخدميها في الوصفة.

وصفات بالزبادي صحية ولذيذة 2
وصفات بالزبادي صحية ولذيذة 2

3- سلطة الزبادي بالكوكيز:

المكونات:

– باكو كريم شانتيه.

– 2 كوب زبادي بالفواكة باي نوع تفضليه.

– معلقة كبيرة سكر.

– معلقة صغيرة ملح.

– كوكيز شوكولاتة.

– فراولة او توت.

الطريقة:

اضربي الكريم شانتيه وضيفي له الملح والسكر واضربيهم مع بعض كويس لمدة دقيقة, وبعدين ضيفي لهم الزبادي والفاكهة وكسري الكوكيز لقطع متوسطة وضيفيه وقلبيهم كلهم مع بعض.

وصفات بالزبادي صحية ولذيذة 3
وصفات بالزبادي صحية ولذيذة 3

4- زبادي بزبدة الفول السوداني والموز:

المكونات:

– 2 ثمرة موز مجمدة.

– كوباية زبادي.

– 2 معلقة كبيرة لبن مكثف.

– 2 معلقة كبيرة زبدة فول سوداني.

– ½ معلقة صغيرة ملح.

– 4 وحدات اي نوع بسكويت تفضليه.

الطريقة:

اخلطي الموز مع الزبادي واللبن المكثف وزبدة الفول السوداني والملح واضربيهم مع بعض في الخلاط لحد ما يبقى الخليط ناعم, كسري البسكويت وضيفيه على الخليط وقلبيهم مع بعض, وحطيه في الفريزر لحد م يتجمد.

وصفات بالزبادي صحية ولذيذة 4
وصفات بالزبادي صحية ولذيذة 4

5- زبادي بالعسل وعين الجمل:

الطريقة دي بسيطة جدا بس هتحمصي عين الجمل على النار او في الفرن شوية على درجة حرارة 180 لمدة 7 دقايق, وبعدين طلعيه وضيفي له العسل وصبي الخليط على الزبادي العادي او زبادي بالفاكهة اي نوع تفضليه.

وصفات بالزبادي صحية ولذيذة 5
وصفات بالزبادي صحية ولذيذة 5

6- سموزي الزبادي بالمانجا:

المكونات:

– ثمرة مانجا كبيرة متقطعة.

– ثمرة موز متقطعة شرايح.

– 250 ملل زبادي.

– كوباية تلج مجروش.

– ½ معلقة صغيرة حبهان مطحون “اختياري”.

– نعناع للتزيين.

الطريقة:

اخلطي كل المكونات مع بعض ماعدا النعناع واضربيهم في الخلاط, وضيفي سكر او عسل حسب الرغبة, صبي الخليط في كوبايات وزينيه بالنعناع.

وصفات بالزبادي صحية ولذيذة 6
وصفات بالزبادي صحية ولذيذة 6

7- زبادي مع الفاكهة المجففة والبسكويت:

المكونات:

– ½ كوباية فاكهة مجففة “توت,كريز,اناناس, اي نوع تفضلوه”.

– ½ كوباية لبن.

– 2 معلقة كبيرة عسل اسود.

– معلقة صغيرة قرفة.

– رشة فانيليا.

– رشة جنزبيل.

– كوباية ومعلقتين دقيق ارز بني.

– 2 كوباية زبادي.

الطريقة:

سخني الفرن كويس, واثناء ما بتسخنيها هاتي صينيه افردي فيها ورق خبز او ورق زبدة, اخلطي كل المكونات مع بعض ماعدا الزبادي وقلبيهم مع بعض كويس افردي الخليط في الصينية تقريبا بعرض 2 بوصة وارتفاع 1 بوصة, حطيها في الفرن لمدة 10 دقايق.

 بعدين طلعيها من الفرن وسيبيها تبرد 10 دقايق وقطعيها شرايح رفيعة بالسكينة.

رجعيها تاني في الفرن لمدة 10 دقايق كمان لحد ما تنشف او تبقى مقرمشة.

طلعيها وسيبيها تبرد شوية وبعدين غمسي اطراف شرايح البسكويت في الزبادي وحطيها في التلاجة لحد ما الزبادي تتجمد عليها.

وصفات بالزبادي صحية ولذيذة 7
وصفات بالزبادي صحية ولذيذة 7

8- زبادي مع رقائق الشوكولاتة:

المكونات:

– كوباية زبادي.

– معلقة كبيرة زبدة فول سوداني.

– معلقة كبيرة سكر.

– معلقة كبيرة رقائق شوكولاتة Chocolate Chips.

– ¼ معلقة صغيرة فانيليا.

الطريقة:

هتخلطي كل المكونات مع بعض ماعدا رقائق الشوكولاتة, اضربيهم مع بعض في الخلاط, وبعدين حطيها في الفريزر لحد ما تتجمد, ولما نيجي ناكلها نحط على الوش رقائق الشوكولاتة.

وصفات بالزبادي صحية ولذيذة 8
وصفات بالزبادي صحية ولذيذة 8

13 اكلة سهلة ممكن تعمليهم في مج لو مش عايزة تاكلي كتير

اكلات سهلة تعمليها في مج
اكلات سهلة تعمليها في مج

مقالات متعلقه

طريقة عمل كيك الصفوف اللبنانية

طريقة عمل كيك الصفوف اللبنانية

وصفة Sfogliatelle:من الذ وصفات الحلويات الايطالية

وصفة Sfogliatelle:من الذ وصفات الحلويات الايطالية

في 5 دقايق بس.. اعملي وصفة ترافل الشوكولاتة البيضاء مع جوز الهند

في 5 دقايق بس.. اعملي وصفة ترافل الشوكولاتة البيضاء مع جوز الهند