وصفات طبيعية ببياض البيض لكل مشاكل البشرة

ريهام محمود
ريهام محمود
في
بشرة
17846

البيض يعتبر من اكتر المكونات اللي بنستخدمها في المطبخ والبيض مش بس مجرد وجبة مغذية وغنية بالبروتين لكن كمان يعتبر من الحاجات المفيدة جدا للبشرة, وده اللي هنعرفه النهاردة من خلال المقال بتاعنا هنتعرف على فوايد بياض البيض بشكل خاص و وصفات طبيعية ببياض البيض لكل مشاكل البشرة.

– طريقة فصل البياض عن الصفار:

تعالوا نشوف الاول طريقتين لفصل بياض البيض عن الصفار عشان نستخدمه في الماسكات:

1- الطريقة الاولى:

اول طريقة ممكن نفصل البياض عن الصفار بالايد, هنجيب طبقين ونكسر البيضة على الايد ونخلي البياض ينزل في الطبق والصفار نحطه في الطبق التاني.

وصفات طبيعية ببياض البيض لكل مشاكل البشرة 1
وصفات طبيعية ببياض البيض لكل مشاكل البشرة 1

2- الطريقة التانية:

تاني طريقة معانا هنستخدم فيها اي ازازة بلاستيك فاضية عندنا, اكسري البيضة في طبق وهاتي الازازة حطيها فوق الصفار واضغطي عليها بايدك وبعدين خففي الضغط على الازازة ببطء هتلاقي الصفار دخل جواها.

وصفات طبيعية ببياض البيض لكل مشاكل البشرة 2
وصفات طبيعية ببياض البيض لكل مشاكل البشرة 2

– فوايد بياض البيض للبشرة:

1- بيعالج التجاعيد والخطوط الرفيعة على البشرة.

2- بيعالج انتفاخات والاكياس تحت العين.

3- تضييق المسام.

4- بيقلل من الرؤوس السودا.

5- بيعالج ويحمي البشرة من حب الشباب والبثور والاثار اللي بتنتج عنهم.

6- بيشد البشرة.

7- بيقلل من شعر الوجه بشكل كبير جدا.

وصفات طبيعية ببياض البيض لكل مشاكل البشرة 3
وصفات طبيعية ببياض البيض لكل مشاكل البشرة 3

– وصفات طبيعية ببياض البيض لكل مشاكل البشرة:

دلوقتي بعد ما فصلنا الصفار عن البياض هنستخدم البياض بس في الوصفات اللي هنشوفها مع بعض.

1- ماسك للتقليل من زيوت البشرة:

ده من اسهل الماسكات اللي ممكن تتعمل لو مكسلة ومش عايزة تعملي ماسك بمكونات كتير, الماسك مفيد جدا للبشرة الدهنية لانه بيقلل دهون البشرة, والمغنسيوم اللي موجود في بياض البيض بيخلي البشرة شباب وشكلها صحي جدا.

اغسلي بشرتك كويس بمية دافية عشان تفتحي المسام وبعدين ادهني البياض على البشرة باي فرشة ممكن تستخدمي فرشة مكياج قديمة, او فرشة صبغة الشعر, سيبيه على البشرة لحد ما ينشف لحد ما تلاقي بشرتك مشدودة, وبعدها اغسليه بمية باردة, كرري الماسك مرتين في الاسبوع او كل ما تحسي ان بشرتك فيها زيوت كتير وعايزة تتخلصي منها.

2- ماسك لبشرة متوهجة ومشرقة بشكل فوري:

لو عايزة بشرة مشرقة ومتوهجة بشكل فوري يبقى اكيد هتحتاجي الماسك ده, بس هنضيف مع بياض البيض مكونات مختلفة حسب نوع كل بشرة.

البشرة العادية: هنستخدم مع بياض البيض عصير جزر مع لبن.

البشرة الجافة: بياض البيض مع الافوكادو المهروسة.

البشرة الدهنية: بياض البيض مع العسل وعصير الليمون.

البشرة الحساسة: بياض البيض مع الزبادي.

اخلطي بياض بيضة مع المكونات المناسبة لنوع بشرتك وقلبيهم مع بعض كويس, ادهني بشرتك بالماسك وسيبيه من 15 – 20 دقيقة على الاقل وبعدين اغسليه, كرري الوصفة مرة واحدة في الاسبوع.

ومكونات الماسك ليها فوايد كتير جدا للبشرة, عصير الجزر بيحسن لون البشرة وبيمنع التجاعيد وبيرطب الجلد, اللبن بيزود انتاج الكولاجين في البشرة وحمض اللبنيك اللي موجود في اللبن بيساعد على التخلص من الجلد الميت وتضييق المسام, الافوكادو بيحافظ على شباب البشرة, العسل يعتبر مرطب ومهديء طبيعي للبشرة, الليمون مبيض طبيعي للبشرة.

3- ماسك للتخلص من حب الشباب:

بياض البيض من المكونات الهايلة جدا اللي بتساعد في علاج حب الشباب ومش بس كده كمان بيصلح تلف الجلد, وبيخفف من الندبات والاثار اللي بيسبها حب الشباب, كمان بيحمي البشرة وبيمنع انها تتعرض تاني لحب الشباب لانه بيقضي على البكتيريا اللي بتسبب البثور والحبوب.

المكونات:

بياض بيضة.

عصير ليمون.

½ معلقة صغيرة عسل.

الطريقة:

اخلطي بياض البيض مع العسل والليمون وادهني بشرتك بالخليط وسيبيه لحد ما ينشف وبعدين اغسليه بمية باردة, كرريه مرتين في الاسبوع.

العسل بيقضي على البكتيريا اللي بتسبب حب الشباب, ومرطب طبيعي للجلد, عصير الليمون كمان من المكونات اللي بتقضي على البكتيريا المسببة للحبوب والبثور ومع الوقت كمان بيقلل عيوب الجلد.

4- ماسك للحبوب والبثور الصعبة والقديمة:

لو انتي بتعاني من الحبوب والبثور من فترة طويلة وعندك حبوب كتير وصعبة هتبقي محتاجة مكون اقوى من العسل والليمون اللي استخدمناهم في الوصفة اللي فاتت عشان كده هنستخدم للحبوب الصعبة مع بياض بياض زيت شجرة الشاي لانه بيحتوي على عناصر وخصائص قوية جدا بتساعد على قتل البثور.

المكونات:

بياض بيضة.

4 نقط من زيت شجرة الشاي.

الطريقة:

اخفقي بياض البيض شوية وبعدين ضيفي له زيت شجرة الشاي, ادهني الخليط على بشرتك ومجرد ما تحسي بوخزة خفيفة على البشرة اغسليها بمية باردة, ممكن تكرريه مرتين في الاسبوع.

5- سكراب بياض البيض والعسل والشوفان:

سكراب بياض البيض والشوفان ممتاز جدا للبشرة بيخلصك من الجلد الميت والميزة فيه انه امن ولطيف جدا على البشرة يعني ممكن تستخدميه اكتر من مرتين في الاسبوع من غير قلق ولا خوف على بشرتك.

المكونات:

بياض بيضة.

معلقة صغيرة عسل.

معلقة صغيرة دقيق الشوفان.

الطريقة:

اخلطي المكونات مع بعض كويس لحد ما تتكون عندك عجينة سميكة, واستخدميه في فرك البشرة بحركات دائرية.

وصفات طبيعية ببياض البيض لكل مشاكل البشرة 4
وصفات طبيعية ببياض البيض لكل مشاكل البشرة 4

6- ماسك للتخلص من عيوب وبقع البشرة واثار حب الشباب:

الماسك ده مفيد جدا في علاج بقع وعيوب البشرة وكمان اثار حب الشباب.

المكونات:

بياض بيضة.

معلقة صغيرة عصير برتقان.

½ معلقة صغيرة كركم.

الطريقة:

اخلطي بياض البيض وعصير البرتقان واضربيهم مع بعض كويس وبعدين ضيفي لهم الكركم قلبيهم مع بعض, ادهني البشرة بالخليط وسيبيه 15 دقيقة, كررية مرة واحدة في الاسبوع.

عصير البرتقان لانه غني جدا بفيتامين سي بيساعد بشكل فعال على تفتيح البشرة, والكركم يعتبر مضاد للبكتيريا ومكون ممتاز جدا لعلاج بقع البشرة.

7- ماسك للبشرة الجافة:

الجلد الجاف وتقشر البشرة من المشاكل المزعجة جدا اللي بيعاني منها كتير من البنات, الماسك ده هيساعدنا من التخلص من المشكلة دي وهيساعد جدا على ترطيب البشرة بشكل فعال.

المكونات:

بياض بيضة.

معلقة صغيرة زبادي.

½ ثمرة افوكادو.

الطريقة:

اهرسي الافوكادو ناعم وضيفي عليه بياض البيض والزبادي وقلبي المكونات مع بعض كويس, افردي الخليط على البشرة وسيبيه لحد ما ينشف وبعدين اغسليه بمية باردة, كرريه مرة واحدة في الاسبوع.

8- سكراب لحفظ توازن البشرة:

درجة حموضة البشرة لازم تكون متوازنة عشان تبقى صحية, يعني متبقاش دهنية اوي ولا جافة زيادة عن اللزوم, وهنا يجي دور ماسك بياض البيض والكربوناتو اللي هيساعد انه يعمل توازن للرقم الهيدروجيني للجلد, وتخفيف اي التهاب او احمرار في الجلد.

المكونات:

بياض بيضة.

معلقة صغيرة كربوناتو.

الطريقة:

اخلطي بياض البيض مع الكربوناتو واضربيهم كويس مع بعض وافركي البشرة بالخليط في حركات دائرية لمدة دقايق, كرريه مرة واحدة في الاسبوع.

9- ماسك للبشرة الحساسة جدا:

في انواع بشرة بتكون حساسة اوي لاي حاجة بتتحط عليها, والماسك ده مخصوص للي بيعانوا من البشرة الحساسة زيادة عن اللزوم اللي بتتأثر من اي حاجة.

المكونات:

بياض بيضة.

زبادي.

عسل نحل.

عصير خيار.

الطريقة:

اخلطي المكونات كلها مع بعض, اغسلي بشرتك بمية دافية وافردي الماسك عليها وسيبيه لما ينشف وبعدين اغسليه بمية باردة, كرريه من مرة لمرتين في الاسبوع.

والماسك فايدته بتيجي من حمض اللبنيك اللي في الزبادي اللي بيساعد على تقليل تجاعيد البشرة, والعسل بيحتوي على خصائص مضادة للبكيتريا, والخيار بيساعد على تهدئة الجلد لانه بيحتوي على خصائص تبريد.

10- ماسك لترطيب البشرة:

ده ماسك سريع وسهل للبشرة الجافة وهيساعد انه يرجع لها رطوبتها وهيخليها ناعمة جدا وشكلها صحي.

المكونات:

بياض بيضة.

معلقة صغيرة زيت زيتون.

الطريقة:

اخلطي بياض البيض والزيت واضربيهم مع بعض كويس وافردي الخليط على البشرة وسيبيه 20 دقيقة وبعدين اغسليه بمية باردة, كرريه من مرة لمرتين في الاسبوع.

وصفات طبيعية ببياض البيض لكل مشاكل البشرة 5
وصفات طبيعية ببياض البيض لكل مشاكل البشرة 5

11- ماسك للتخلص من الرؤوس السودا والبيضا:

الطريقة بسيطة جدا وفعالة للتخلص من الرؤوس السودا, ادهني البشرة ببياض البيض وبعدين هاتي مناديل ورق قطعيها وحطيها على المناطق اللي فيها رؤوس او على الوش كله واضغطي عليها كويس وبعدين حطي فيها طبقة تانية من بياض البيض سيبي الماسك لحد ما ينشف خالص, وبعدين شيلي الماسك من تحت لفوق عكس اتجاه الشعر, وبعدها اغسلي البشرة بمية دافية.

وصفات طبيعية ببياض البيض لكل مشاكل البشرة 6
وصفات طبيعية ببياض البيض لكل مشاكل البشرة 6

وصفات طبيعية سهلة وفعالة هتجدد بشرتك وتحافظ عليها صحية

وصفات طبيعية لتجديد البشرة
وصفات طبيعية لتجديد البشرة

مقالات متعلقه

3 نقط من السيروم ده هتخليكي ماتحتاجيش للمكياج

3 نقط من السيروم ده هتخليكي ماتحتاجيش للمكياج

مكون واحد بس لمنع علامات الشيخوخة

مكون واحد بس لمنع علامات الشيخوخة

مكونات طبيعية اساسية ومتعددة الاستخدامات للبشرة والشعر

مكونات طبيعية اساسية ومتعددة الاستخدامات للبشرة والشعر