المطلقة .. ازاي تتعايش في المجتمع المصري بعد الطلاق

بقلمريهام محمود فيعلاقات visibility1423

مطلقة !! لقب مرعب في مجتمعنا اول ما بيتسمع بيبدأو الناس يحكموا على صاحبته باحكام كتير من غير ما حتى يعرفوها او يعرفوا ظروفها ويبدأوا يتدخلوا في حياتها وتصرفاتها وكل حاجة تخصها لمجرد انها مطلقة وبتزيد عليها الضغوط من الاهل قبل الناس اللي حواليها خوفا من نظرة المجتمع ليها, وبتبدأ هي نتيجة الضغوط دي شخصيتها تتغير وتبقى اكتر عداونية وجراءة عشان تقدر تواجه المجتمع اللي بيلاحقها بنظراته وتعليقاته السلبية والتدخل في حياتها, واللي مش بتقدر تواجه بتهرب باي طريقة بانها ممكن تلبس نقاب مثلا عشان بس محدش يعرفها وتتدارى من نظرات المجتمع ليها, طيب ازاي المطلقة تتعايش في المجتمع المصري بعد الطلاق؟ ده اللي هنحاول النهاردة نقدمه ليكم من خلال موضوعنا.

ازاي المطلقة تتعايش في المجتمع المصري بعد الطلاق:

الطلاق يعتبر تجربة قاسية جدا في مجتمعنا بشكل خاص بسبب نظرة المجتمع زي ما قولنا ولكن كمان الست بعدها بتدخل في حالة نفسية سيئة وتبص لنفسها انها فشلت وبتبقى خايفة من المستقبل وبتفقد الثقة في نفسها وفي اللي حواليها, عشان كده النهاردة هنعرف مع بعض شوية نصايح تساعدك انك تتخطي المرحلة دي وترجعي تعيشي حياة طبيعية من غير خوف.

ازاي المطلقة تتعايش في المجتمع المصري
ازاي المطلقة تتعايش في المجتمع المصري

1- رجعي ثقتك في نفسك:

اول حاجة لازم تعمليها انك تحاولي ترجعي ثقتك في نفسك تاني, ابدأي دوري في نفسك تاني على اللي بيميزك, لو انتي مطلقة في سن صغيرة يبقى فكري لسه الحياة قدامك وان لسه في فرص كتير مستنياكي, ولو مطلقة في سن اكبر ومعاكي اطفال يمكن هتحسي باحباط شوية من المسئولية لكن ده مش هيمنع ابدا انك تحاولي تتخلصي من كل الافكار السلبية وترتبي حياتك وتعملي توازن بين مسئولية اطفالك وانك توصلي للتوازن والسلام النفسي والرضا عن نفسك الاول وبعدين مع اللي حواليكي.

2- دوري على اهداف جديدة:

من احسن الحاجات اللي ممكن تعمليها انك تبدأي تدوري على اهداف جديدة في حياتك يعني لو مثلا بعد الجواز مكملتيش دراستك كمليها, او اعملي دراسات عليا في مجال دراستك اللي خلصتيه, ولو مش بتشتغلي ممكن تدوري على شغل في مجالك, او لو كان عندك هواية قبل الجواز وبطلتيها بعد ما اتجوزتي ممكن ترجعي تمارسيها تاني وتشغلي وقتك, اقري ووسعي مداركك ومعرفتك, يعني حاولي تحطي خطة لنفسك باللي عايزة تعمليه وابدأي نفذي.

3- اتعلمي من اخطائك:

اقعدي مع نفسك وابدأي فكري في كل حاجة مريتي بيها والاخطاء اللي وقعتي فيها في تجربتك وتحاولي انك تصلحي اخطائك دي عشان متقعيش فيها تاني, وتبصي لحياتك كلها وتبدأي تعيدي حساباتك تاني.

4- متستعجليش في الارتباط مرة تانية:

من الاخطاء اللي ممكن تقعي فيها انك تتسرعي في الدخول في تجربة تانية عشان تخرجك من الم تجربتك القديمة او حتى عشان تتخلصي من نظرة المجتمع ليكي, لكن ده اكبر غلط ممكن تقعي فيه لان ده هيخلي اختيارك مش صح وتفشلي للمرة للتانية وده هيصعب حل المشكلة زيادة, عشان كده عدم الاستعجال مطلوب جدا لازم تدي نفسك فرصة كافية من غير ارتباط تاني, لازم تدي نفسك وقتك كافي وتستعيدي ثقتك في نفسك الاول زي ماقولنا وتستعيدي حياتك وساعتها تقدري تختاري شريك حياة تاني على اسس صحيحة ومتقعيش في نفس اخطاء التجربة الاولانية.

5- خلي عندك ارادة قوية:

لازم تكون عندك ارادة قوية انك تتغلبي على سلبيات الطلاق وتواجهي نفسك والمجتمع, وتحاولي انك تنجحي وتتغلبي على الافكار السلبية وتثبتي للمجتمع اللي بيبص للمطلقة انها انسانة فاشلة انها ممكن تنجح ودي مش نهاية العالم بالنسبة لها وتغيري نظرته للمطلقة.

6- رتبي حياتك المادية:

لو انتي كنتي معتمدة على الزوج ومش بتشتغلي يبقى لازم بعد الطلاق تفكري في مصدر يجيبلك دخل مادي تقدري تكفي بيه متطلباتك ومسئولياتك, ابدأي دوري على شغل في مجال دراستك, او لو عندك هواية معينة ممكن تستغليها تجيبي منها دخل, يعني رتبي حياتك وشوفي انتي ممكن تعملي ايه وتعتمدي على نفسك ازاي.

ازاي المطلقة تتعايش في المجتمع المصري بعد الطلاق
ازاي المطلقة تتعايش في المجتمع المصري بعد الطلاق

7- اتجنبي مقابلة قرايب ومعارف طليقك:

حاولي على قد ما تقدري انك تتجنبي قرايب او معارف او اي حد ليه صله بطليقك لمدة متقلش عن 6 شهور عشان تتجنبي انك كل شوية تفتحي الموضوع وتتكلمي في المشاكل تاني وتدخلي في حالة نفسية سيئة وتطول معاكي فترة الخروج من ازمة الطلاق, لانه المفروض في الفترة اللي بعد الطلاق تحاولي تبعدي تفكيرك عن كل الافكار السلبية وكل اللي عانيتي منه والمشاكل والذكريات السيئة مع الزوج, ولو مثلا انتي بعد الطلاق عايشة في نفس البيت متنقلتيش لمكان تاني حاولي تجددي في شكل البيت وتغيري شكله وملامحه اللي ممكن تفكرك بذكرى معينة.

8- التواصل مع الطليق بايجابية:

 يمكن هتقولي ان النقطة دي بعكس النقطة اللي فاتت او متناقضة معاها لكن في حالة وجود اطفال هيكون ضروري انك تتواصلي مع طليقك بايجابية لانه هو في النهاية ابو اطفالك واكيد من حقه يشوفهم وحقهم هما كمان انهم يشوفوه.

9- اهتمي بنفسك:

اكيد بعد الطلاق بتدخلي في حالة نفسية سيئة وبتهملي نفسك, لكن عشان تستعيدي ثقتك بنفسك لازم تهتمي بشكلك ومظهرك, وتجربي حتى انك تغيري اللوك بتاعك تلبسي استايل جديد او الوان جديدة, تغيري لون شعرك وحاولي تختاري لوك جريء, وتشيلي من تفكيرك نظرة المجتمع لاي حاجة هتعمليها المهم انتي ترضي وتبسطي نفسك.

10- قضي وقت مع الناس الايجابيين:

قربي من الناس اللي انتي عارفة انهم بيحبوكي وممكن يسمعوكي في اي وقت واللي تفكيرهم ايجابي وابعدي عن السلبيين اللي ممكن يزودوا حالة الاحباط عندك, خليكي دايما مع اللي فاهمين مشاعرك وحاسين بيكي وبترتاحي في الكلام معاهم.

11- فكري دايما بايجابية:

عشان توصلي ان المجتمع يبص لك بنظرة ايجابية وتغيري نظرته لازم انتي الاول تفكري بشكل ايجابي وتبصي لتجربة الطلاق انها زي اي تجربة في الحياة وارد فيها الفشل, ومتتكسفيش من نفسك او من تجربتك.

12- انسي اللي فات وابدأي من جديد:

انسي اللي فات وابدأي حياة جديدة من تاني واشغلي وقتك بحاجات مفيدة زي ما قولنا ممكن دراسة, او شغل, او هواية عشان تفتحي لنفسك ابواب جديدة وتتعرفي على اصدقاء جداد تساعدك انك تعيشي حياة جديدة ومختلفة عن حياتك القديمة.