10 استخدامات صحية وجمالية غير تقليدية للملح
الملح العادي اللي بنستخدمه في الاكل من الحاجات المفيدة جدا اللي ليها استخدامات تانية كتير غير استخدامه في الاكل بس, وده اللي هنعرفه مع بعض بالتفصيل من خلال المقال بتاعنا النهاردة هنتعرف على استخدامات الملح الجمالية والصحية.
استخدامات الملح الجمالية والصحية:
1- تهدئة التهاب الحلق:
التهاب الحلق ليه اسباب كتير زي البرد, او الهوا الجاف, او الصراخ بصوت عالي, وايا كان سبب الالتهاب الملح هيحل لك المشكلة عن طريق الغرغرة بالمية المالحة اللي هتساعدك على علاج الم والتهاب الحلق لانه يعتبر مطهر وبيساعد على مكافحة العدوى اللي ممكن تسبب التهاب الحلق.
ضيفي ½ معلقة صغيرة ملح لكوباية مية دافية, قلبي كويس لحد ما الملح يدوب في المية, اعملي غرغرة للحلق بالمية لمدة ثواني وبعدين اتخلصي من المية, استمري على الوصفة دي بشكل منتظم لمدة ايام لحد ما تتخلصي من الالتهاب.
2- علاج قرحة الفم:
قرحة الفم اللي بتظهر على الشفايف وبتسبب الم والتهاب وتورم للمنطقة دي, الملح هيساعدك على علاجها لانه بيسحب السوائل منها وهيسرع شفائها.
دوبي 2 معلقة صغيرة ملح في ¼ كوباية مية دافية, حطي الخليط على مكان القرحة وسيبيه 20 ثانية وبعدين اغسليه, كرري الوصفة من 3 – 4 مرات في اليوم يوميا لحد ما تتخلصي من المشكلة.
3- التخفيف من الم القدمين:
لو راجعة البيت من يوم مرهق مشيتي فيه كتير او لبستي كعب عالي فترة طويلة واتسبب لك في الم في القدمين والصوابع يبقى الحل ليكي هو الملح هيخلصك من اي الم.
هاتي طبق املية مية دافية وضيفي لها ½ كوباية ملح, انقعي رجلك في المية دي لمدة من 10 – 15 دقيقة, بعدين طلعي رجلك ونشفيها ودلكيها لمدة 5 دقايق, كرري الطريقة مرة واحدة كل يوم.
4- التهاب العين “العين الوردية”:
التهاب العين او اللي العين الوردية من الحالات اللي بتيجي لبعض الناس اللي بيعانوا من حساسية في العين من اقل حاجة, كمان الملح يعتبر حل للمشكلة دي لانه بيعمل كمطهر طبيعي وبيمنع الاسباب اللي بتسبب المشكلة زي البكتيريا او الفيروس, وبيهدي الم واحمرار العين.
اغلي كوباية من المية المقطرة مضاف ليها معلقة صغيرة ملح, سيبي الخليط يبرد لحد ما يبقى زي درجة حرارة الغرفة, وبعدين استخدمي المحلول ده لغسيل العين, ممكن تحطي المحلول في قطارة وتحطي منه في العين, كرريها اكتر مرة خلال اليوم.
5- علاج لدغات ولسعات الحشرات:
الملح يعتبر حل رائع وفعال جدا لعلاج لدغات ولسعات الحشرات بسبب الخصائص المطهرة اللي موجودة فيه بيساعد على تعقيم المكان وتقليل الالتهاب والالم.
اغسلي المنطقة كويس بالمية الدافية, اخلطي الملح مع شوية صغيرين مية يعني يادوب تبليه بس بالمية, بعدها حطيه على مكان اللسعة, سيبيه 30 دقيقة وبعدين اغسليه بالمية, كرريها حسب الحاجة.
6- علاج سيلان الانف:
سيلان الانف اللي بيحصل بسبب نزلات البرد الملح يعتبر علاج فعال جدا ليه ومناسب حتى للاطفال, كمان هيساعد على تنضيف الممرات الانفية اللي ممكن تتسد بسبب البرد وبتخلي التنفس صعب العلاج بالملح هيخليكي تتنفسي بشكل احسن.
ضيفي معلقة صغيرة ملح ل 2 كوباية مية دافية مقطرة, استخدمي المحلول ده جوه الانف, ممكن تستخدمي قطارة وتغسلي الانف من جوه بالمحلول لحد ما الكمية عندك تخلص, كرريها من مرة لمرتين في اليوم يوميا لحد ما تتخلصي من المشكلة.
7- التقليل من انتفاخ العين:
لو بتعاني من انتفاخ العين لاي سبب الملح هيحل لك المشكلة لانه بيساعد على استخلاص الرطوبة وشد الجلد وكمان تقليل الالتهاب.
هاتي طبق صغير حطي فيه مية دافية وضيفي لها ½ معلقة صغيرة ملح, انقعي قطعة قطن في المية دي, وبعدين غمضي عينيكي وحطيها على الجفون لمدة دقايق وبعدين بلي القطنة تاني من المية وحطيها تاني على العين وكرريها لمدة من 15 – 20 دقيقة.
8- الحفاظ على توازن البشرة:
الملح من الحاجات الهايلة جدا اللي بتساعد على الحفاظ على توازن البشرة بين انتاج الزيوت الطبيعية للبشرة والحفاظ على الترطيب في طبقات الجلد, ده غير انه بيحتوي على خصائص مضادة للالتهابات بتساعد على تهدئة الجلد.
اخلطي 2 معلقة صغيرة ملح مع 4 معالق عسل نحل, حطي الخليط على البشرة وسيبيه من 10 – 15 دقيقة, وبعدين هاتي فوطة نضيفة انقعيها في مية دافية وبعدين طلعيها واتخلصي من المية الزيادة وحطيها على وشك مع ضغط خفيف لمدة 30 ثانية, بعدها افركي الماسك من على بشرتك في حركات دائرية وبعدين اغسليه بمية دافية.
9- تنضف المسام:
الملح بيساعد على تنضيف وتطهير المسام بعمق لانه زي ما قولنا بيساعد على توازن انتاج زيوت البشرة وفي نفس الوقت بيقتل البكتيريا اللي ممكن تسبب البثور وحب الشباب.
ضيفي معلقة صغيرة ملح ل ½ كوباية مية دافية وقلبيهم لحد ما الملح يدوب, وحطي المية في ازازة ببخاخ ورشي منها على بشرتك, استخدميه من مرة لمرتين في اليوم يوميا.
10- سكراب للجسم وتجديد الجلد:
الملح يعتبر مقشر طبيعي للجسم بيساعد على ازالة الجلد الميت وترطيب البشرة.
اخلطي ¼ كوباية ملح مع ½ كوباية زيت زيتون او زيت جوز هند, وممكن تضيفي 10 نقط من اي نوع زيت عطري تفضليه, افركي جسمك بالخليط في حركات دائرية باستخدام ليفة او بايدك.
او اخلطي ½ كوباية ملح مع ¼ كوباية من جل صبار الالوفيرا و ¼ كوباية من اي نوع زيت “ممكن زيت زيتون او زيت جوز هند” و10 نقط من اي زيت عطري, وافركي الجسم بنفس الطريقة.
11- علاج قشرة الشعر:
الملح من العلاجات الطبيعية الفعالة لعلاج قشرة الشعر, لانه بيساعد على تحفيز الدورة الدموية لفروة الراس وبيحافظ عليها صحية وبيمتص الدهون الزيادة والرطوبة اللي بتسبب نمو الفطريات اللي بتتسبب في القشرة.
قسمي شعرك لخصل وابدأي رشي من معلقة لمعلقتين من الملح على فروة الراس ودلكيها باطراف صوابعك بالراحة من 10 – 15 دقيقة, بعدها اغسلي شعرك بالمية والشامبو بالطريقة العادية, وهتلاحظي نتجة فورية.
12- معجون اسنان طبيعي:
الملح يعتبر بديل طبيعي لمعجون الاسنان, اللي هيساعدك تحافظي على اسنانك نضيفة وخالية من اي بكتيريا, كمان بيساعد في التخلص من طبقات البلاك على الاسنان وده بالتالي بيمنع كتير من مشاكل الاسنان.
هاتي فرشة الاسنان بليها بالمية وحطيها في الملح وابدأي دلكي بيها سنانك بالطريقة العادية, كرري الطريقة مرة واحدة في اليوم.
وممكن كمان تخلطي كميات متساوية من الملح وصودا الخبز “الكربوناتو” واغسلي بيها سنانك بنفس الطريقة, هتساعدك على تبييض الاسنان بشكل فعال.
بس لما نيجي نستخدم الملح ندلك بالراحة عشان مناذيش مينا الاسنان او اللثه.
13- غسول طبيعي للفم:
الملح يعتبر مطهر طبيعي بيساعد على قتل البكتيريا اللي ممكن تسبب رائحة الفم الكريهة والتهاب اللثة.
ضيفي ½ معلقة صغيرة ملح و ½ معلقة صغيرة كربوناتو ل ¼ كوباية مية وقلبيهم لحد ما يدوبوا في المية, واعملي غرغرة بالخليط وبعدين اتخلصي منها واغسلي الفم بالمية العادية.
14- تبييض الاظافر:
الملح بيساعد على تنعيم الجلد اللي حوالين الضوافر, وبيساعد على تبييض وتقوية الضوافر.
في طبق اخلطي معلقة صغيرة ملح مع معلقة صغيرة كربوناتو ومعلقة صغيرة عصير ليمون وضيفي لهم ½ كوباية مية وانقعي ضوافرك في الخليط ده لمدة 10 دقايق وبعدين افركي ضوافرك بفرشة اسنان نضيفة وبعدها اغسليها بالمية ورطبيها.
15- اسلقي البيض اسرع بالملح:
لو عايزة تعملي بيض مسلوق في وقت اسرع ضيفي لمية سلق البيض شوية ملح لانه بيساعد على رفع درجة الغليان وبالتالي هيخلي البيض يتسلق اسرع وفي وقت اقل, كمان بيمنع تشقق البيض جوه المية.
16- تنضيف وتلميع الفضة:
الملح يعتبر منظف وملمع طبيعي للفضة, هاتي طبق افردي فيه ورق فويل وحطي عليه مية سخنة وضيفي لها 2 معلقة كبيرة ملح, و2 معلقة كبيرة صودا الخبز “الكربوناتو” واختياري ممكن تزودي معلقة كبيرة خل ابيض, انقعي الفضة في الخليط لمدة من 3 – 5 دقايق وممكن تفركيها بفرشة اسنان قديمة عندك, وبعدين طلعيهم واغسليهم بمية دافية.
16 استخدام مفاجيء لغسول الفم مكنتيش تعرفيها قبل كده
