افضل 6 اكلات علشان تحصلى على بشرة نقية

مشاكل البشرة كتيرة ومختلفة ومابتخلصش، من الحبوب العادية لحبوب الشباب و التهابات البشرة والجفاف والخشونة وغيرها. ومشكلات البشرة دى ليها اسباب كتيرة اما روتين بشرة مش صحيح او بتستخدمى منتجات غير مناسبة وغيرها من الاسباب اللى طبيعى تيجى على بالنا.. لكن سبب رئيسى ومهم وتقريبا محدش فينا بيفكر فيه هو الاكل ! 

ولان اى حاجة بناكلها مش بس بتأثر على وزننا وشكل جسمنا لكن كمان بتأثر على بشرتنا وصحتها، اعرفى معانا افضل 6 اكلات علشان تحصلى على بشرة نقية

افضل 6 اكلات علشان تحصلى على بشرة نقية … 

1- السلمون :

السلمون بيعتبر هو افضل اكلات علشان تحصلى على بشرة نقية على الاطلاق، ولازم تاكليه بوفرة من فترة للتانية وده لانه غنى جدا بالاوميجا 3 والدهون الصحية اللى بيوفرها سمك السلمون وجسمك مابيقدرش ينتجها بشكل طبيعى، وكمان السلمون غنى بمواد مضاده للالتهاب طبيعية بتعتبر مثالية فى محاربة حب الشباب والتهابات البشرة، وبيشكل عازل طبيعى بيحمى بشرتك من الالتهابات و العدوى وخصوصا حب الشباب.

2- بذور الشيا :

مصادر الاوميجا 3 النباتية او الـ  Plant-based omega-3 sources بتعتبر مهمة ، وبذور الشيا وحبوب الشوفان بتعبر من اهم مصادر الاوميجا 3 النباتية اللى بتحارب حب الشباب ، بعكس بذور الكتان مثلا اللى بتحتاج تطحن علشان توصلى للاوميجا 3 اللى جواها. كمان بذور الشيا غنية بالكالسيوم والبروتين والالياف اللى هتحسن من صحتك بشكل عام.

3- الحبوب الكاملة :

الحبوب الكاملة كمان غنية جدا بالالياف اللى بتعادل من معدل السكر فى الدم وبتمنع الزيادة المفاجاة فيه اللى ممكن تسبب هيجان البشرة وظهور حب الشباب، علشان كده مهم تتجنبى الاكلات اللى بتزود من سكر الدم بنسبة كبيرة وتهتمى بأكل الحبوب الكاملة لانها  غنية بالالياف المهمة لصحة بشرتك ومقومة حب الشباب.

الحبوب الكاملة اللى ممكن تاكليها زى القمح و الارز البنى .

4- شاى المرمرية :

الشاى الاخضر هو اكتر نوع من انواع الشاى المشهور بفوايده المتعددة للصحة، لكن لما نتكلم عن صحة البشرة ومحاربة حب الشباب بشكل خاص شاى المرمرية له دور وفوايد كبيرة جدا ، الشاى ده غنى جدا بمضادات الاكسدة اللى بتقاوم التهابات وتهيج البشرة وبعكس الشاى الاخضر مابيسببش اى جفاف و بيعمل ترطيب كبير للبشرة والجسم ، كمان شاى المرمرية غنى بالمعادن والكالسيوم والحديد والماغنسيوم اللى بيساعدوا فى تجديد بشرتك وزيادة نضارتها من جوا ومن بره.

5- الحمص :

سلطة حمص بسيطة مفيدة جدا لمقاومة تهيج البشرة والحبوب اللى بتظهر فجأة لانها غنية جدا بالزنك اللى بيلعب دور اساسي فى تقوية الجهاز المناعى للجسم وده بنحتاجه علشان الجسم يقدر يقاوم تكون البكتيريا اللى بتسبب حب الشباب ، لانه المعدلات المنخفضة من الزنك بتتسبب بشكل مباشر فى تهيج البشرة وتكون الحبوب ، الحمص كمان غنى بالالياف اللى اللى بتساعد على استقرار نسبة السكر فى الجسم.

ممكن تضيفى الحمص المسلوق للسلطة الخضراء او شوربة الفراخ او تعمليه سلطة زى الطحينة.

6- السبانخ والكرنب :

الخضروات الورقية زى السبانخ والكرنب بتساهم بشكل مباشر فى نقاء وصحة البشرة لما تكونى بتحاولى تقاومى حب الشباب لانهم بيعملوا ترطيب مباشر للبشرة وكمان السبانخ والكرنب بالتحديد مفيدين جدا للحصول على بشرة نقية بسبب انهم من الخضروات الغنية بفيتامين A اللى بيشتغل مع الزنك على تقوية المناعة وزيادة نضارة وصحة البشرة ممكن تضيفى اوراق من السبانخ لاى مشروب ديتوكس تفضليه او تضيفى السبانخ  وكرنب السلطة الاحمر او الاخضر لاى سلطة خضراء تفضليها.

اعرفى معانا كمان وصفات طبيعية سهلة وفعالة هتجدد بشرتك وتحافظ عليها صحية ..