طريقة عمل وصفة مافن البيض بالجبنة المخبوزة فى الفرن

آية حسان
آية حسان
2226

لو كنتى زهقانة من الفطار التقليدى او على نظام غذائى وعايزة فطار جديد يشبع ويبقى غنى بالبروتين والعناصر الغذائية وفى نفس الوقت طعمه حلو، يبقى الوصفة دى هى اللى بتدور عليها. الوصفة دى مثالية فى استخدام بقايا الاكل من لحوم او فراخ وممكن تستخدمى معاها اى نوع جبن او توابل تحبيها، وهتوفر معاكى كتير فى العزايم او لو كنتوا عيله مكونة من عدد افراد كبير. شوفى معانا بالصور والخطوات ازاى تعملى وصفة مافن البيض بالجبنة المخبوزة فى الفرن او الـ Cheesy Eggs Baked in a Muffin Tin .. 

طريقة عمل وصفة مافن البيض بالجبنة السهلة المخبوزة فى الفرن ..

المقادير:

12 بيضة حجمها كبير.

نص معلقة شاى من الملح.

نص معلقة شاى من الفلفل الاسود.

نص معلقة شاى من التوم البودر.

رشة زيت.

نص كوباية بصل متقطع صغير اوى.

كوباية من الجبنة الموزاريلا المبشورة ” او اى نوع جبنة تحبيه زى الجبنة الرومى مثلا.”

نص كوباية من البسطرمة او السجق المتحمر.

كوباية سبانخ مفرومة او اى نوع خضار تحبيه زى البروكلى.

قالب مافن 12 فتحة.

طريقة التحضير :

cheesy eggs baked in a muffin tin

الخطوة الاولى: حضرى المقادير

حضرى كل المقادير بالكمية المكتوبة لانه لو زودتى فى حاجة هيطلع الحشو زيادة و هيبقى الاكل تقيل، ولو كنتى مابتفضليش اللحوم على الفطار ممكن تستغنى عنها و تكتفى بالخضار بس، لكن مهم يبقى خضار خفيف وبيستوى بسرعه زى السبانخ مثلا علشان يستوى مع البيض فى نفس الوقت وماياخدش وقت اطول.

الخطوة الاولى

الخطوة الثانية: اضربي البيض

شغلى الفرن وسيبيه يسخن على درجة حرارة 180، وفى بولة او طبق عميق اضربى البيض مع الفلفل الاسود والملح والتوم البودر.

الخطوة الثانية

الخطوة الثالثة: شوحى البصل مع البسطرمة

فى طاسة تيفال، رشي زيت قليل ” نقطتين بس” و حطى البصل مع البسطرمة او السجق المتقطع وخليهم يتشوحوا على النار لحد ما لونهم يبقى بنى خفيف ، يعنى حوالى من 3 لـ 5 دقايق.

لو مستعجلة وماعندكيش وقت ممكن تتخطى الخطوة دى وتضيفى البصل مع البسطرمة وهما نيين، لكن الخطوة دى بتضيف للطعم وتخليه احلى.

الخطوة الصالية

الخطوة الرابعة: ضيفى الجبنة والخضار:

اضربي البيض تانى كام ضربة كده وبعدين ضيفى السبانخ و الجبنة و البصل المتشوح مع البسطرمة او السجق وقلبى كويس اوى.

الخطوة الرابعة

الخطوة الخامسة: صبى الخليط فى صينية المافن

وزعى الخليط بالتساوى على فتحات قالب المافن، لحد قرب الاخر بحاجة بسيطة لكن برده سيبى مسافة صغيرة علشان البيض هينفش شوية.

الخطوة الخامسة

الخطوة السادسة: دخليهم الفرن 

دخليهم الفرن من 20 لـ 25 دقيقة او لحد ما السكينة تطلع نضيفة من قلب المافن، للتخزين لفى كل واحدة فى بلاستيك الاكل الشفاف لوحدها وممكن تخزنيها فى الفريزر لحد شهر وفى التلاجة لحد 5 ايام. 

وعلشان تسخنيها تانى حطيها فى الميكروييف لحوالى من 30 لـ 60 ثانية.

الخطوة السادسة

مقالات متعلقه

الشتاء هو موسم البطاطا.. اعرفي إزاي تعملي بطاطا مشوية في البيت من غير ولا غلطة

الشتاء هو موسم البطاطا.. اعرفي إزاي تعملي بطاطا مشوية في البيت من غير ولا غلطة

عمرك كلتي بطاطس بس بطيخ؟! .. اعرفي معانا وصفة بطاطس البطيخ مع صوص المارشملو

عمرك كلتي بطاطس بس بطيخ؟! .. اعرفي معانا وصفة بطاطس البطيخ مع صوص المارشملو

طريقة عمل وصفة حلقات البطاطس بالثوم المقلية

طريقة عمل وصفة حلقات البطاطس بالثوم المقلية