وصفات طبيعية للتخلص من الحبوب تحت الجلد .. ونصايح لمنع ظهورها

ريهام محمود
ريهام محمود
في
بشرة
11642

مشكلة بيعاني منها كتير من البنات وهي حبوب تحت الجلد اللي بتظهر على البشرة وبيكون صعب التخلص منها لو متعالجتش في الوقت المناسب وبالطريقة او العلاج الصح, والنهاردة من خلال موضوعنا هنعرف مع بعض اسباب ظهور النوع ده من الحبوب على البشرة, و وصفات طبيعية لعلاج الحبوب تحت الجلد.

– ايه هي الحبوب اللي تحت الجلد؟

دي عبارة عن بثور بتظهر على البشرة بسبب خلل في الغدد الدهنية على البشرة,  بيبدأ يتراكم كمية كبيرة من الدهون على الغدد الدهنية وده بيأدي لالتهاب المنطقة ويخليها تحمر مع الم وتتشكل الحبوب اللي تحت الجلد.

– اسباب ظهور حبوب تحت الجلد:

ممكن تظهر بسبب الاستخدام الكتير للمكياج, او كريم الاساس بكمية كبيرة بطبقة سميكة على البشرة, او استخدامات واقي شمس او مرطب مش مناسب لبشرتك ممكن يسبب ظهور النوع ده من الحبوب.

الضغط على الرؤوس البيضا او السودا على البشرة في محاولة للتخلص منها ده ممكن يخلي الحالة تسوء اكتر والرؤوس تتحول لحبوب تحت الجلد.

ممكن تظهر على البشرة في وقت الدورة الشهرية بسبب تغير الهرمونات في الجسم.

بتظهر لما تتكون دهون على البشرة ومافيش مكان ممكن تخرج منها الدهون الزيادة دي, ولو احنا حاولنا نخرجها ده بيخليها حساسة اكتر وتسبب التهاب والم في البشرة اكتر من الحبوب العادية, عشان كده تعتبر من افضل الطرق لعلاجها اننا منلمسهاش خالص او نحاول نضغط عليها عشان نتجنب الالتهاب او انها تسيب ندبات على البشرة يكون صعب علاجها, لكن بس نستخدم العلاج الطبي المناسب او الوصفات الطبيعية زي اللي هنعرفها النهاردة مع بعض.

وصفات طبيعية لعلاج الحبوب تحت الجلد 1
وصفات طبيعية لعلاج الحبوب تحت الجلد 1

– وصفات طبيعية لعلاج الحبوب تحت الجلد:

1- الضغط الدافي:

من افضل الطرق عشان نخلي الدهون المتجمعة تحت الجلد تخرج هو الضغط الدافي عليها.

جيبي فوطة قطن صغيرة تكون نضيفة وبليها كويس بمية دافية وبعدين اعصريها واتخلصي من المية الزيادة, وبعدين اضغطي بالفوطة وهي دافية على مكان الحبوب اللي تحت الجلد المكان هيطرى وهيسهل خروج الدهون, وكرري الطريقة دي 3 مرات في اليوم كل ساعتين لحد ما تتخلصي من كل الدهون المحبوسة جوه البشرة.

وممكن تستخدمي بدل المية الدافية باكت شاي دافي اضغطي بيه على الحبوب بنفس طريقة الفوطة.

ممكن كمان تستخدمي زيوت دافية بدل المية والشاي ومن افضل الزيوت اللي ممكن تستخدميها زيت شجرة الشاي او زيت البابونج, دفي الزيت واستخدمي منه نقطتين بس على قطنة واضغطي بيها على مكان الحبوب.

وصفات طبيعية لعلاج الحبوب تحت الجلد 2
وصفات طبيعية لعلاج الحبوب تحت الجلد 2

2- الضغط بالتلج:

الضغط بالتلج بيساعد على تهدئة البشرة من الالتهاب.

هاتي مكعبين تلج ولفيهم في فوطة ناشفة نضيفة, واضغطي بيهم على المنطقة اللي فيها الحبوب, كرري الطريقة دي 3 مرات على الاقل في اليوم.

وصفات طبيعية لعلاج الحبوب تحت الجلد 3
وصفات طبيعية لعلاج الحبوب تحت الجلد 3

3- عصير الليمون:

عصير الليمون يعتبر قابض طبيعي للبشرة, وهيساعد على تصغير المسام, وحمض الستريك الموجود في الليمون هيساعد على تجفيف الحبوب.

اعصري ليمونة كاملة, وبلي قطعة قطن من عصير الليمون واضغطي بيها على مكان الحبوب, سيبي الليمون على البشرة من 10 – 15 دقيقة وبعدين امسحي البشرة بفوطة مبلولة بمية باردة, كرري الطريقة 3 مرات في اليوم.

وصفات طبيعية لعلاج الحبوب تحت الجلد 4
وصفات طبيعية لعلاج الحبوب تحت الجلد 4

4- التفاح والعسل:

العسل والتفاح يعتبرو مزيج هايل جدا للتخلص من حبوب تحت الجلد, لان العسل يعتبر مرطب طبيعي للبشرة, وعامل مضاد للبكتيريا ومطهر طبيعي وده كله هيساعد على قتل البكتيريا اللي ممكن تسبب الحبوب او اي مشاكل جلدية تانية, كمان الجلد مغذي جدا للبشرة, والتفاح بيحتوي على حمض الماليك اللي بيحافظ على توازن البشرة.

دلكي البشرة بالعسل وسيبيه 10 دقايق وبعدين اغسليه بمية دافية, كرري الوصفة 3 مرات في اليوم.

او اخلطي معلقة كبيرة من العسل مع تفاحة مهروسة, افردي الخليط على البشرة وسيبيه 10 دقايق وبعدين اغسليه بمية دافية, كرري الوصفة مرتين في اليوم.

وصفات طبيعية لعلاج الحبوب تحت الجلد 5
وصفات طبيعية لعلاج الحبوب تحت الجلد 5

5- خل التفاح:

خل التفاح بيحافظ على صحة الجلد وبيغذيه, ويعتبر مطهر طبيعي للبشرة وبيحافظ على توازن البشرة.

اخلطي كمية من خل التفاح مع ضعف الكمية من المية عشان تخففيه, بلي قطعة قطن من الخليط واضغطي بيها على مكان الحبوب, اعمليها مرة واحدة بس في اليوم.

وصفات طبيعية لعلاج الحبوب تحت الجلد 6
وصفات طبيعية لعلاج الحبوب تحت الجلد 6

6- الكحول الطبي:

واحدة من اامن واسرع الطرق للتخلص من حبوب تحت الجلد هي استخدام الكحول الطبي لانه مضاد للبكتيريا والالتهابات.

بلي قطعة قطن بالكحول ودلكي المنطقة اللي فيها الحبوب بالراحة وبعدين سيبي الكحول 10 دقايق على البشرة واغسليه بعدها بمية باردة ونشفيها ورطبي بشرتك بكريم مرطب مناسب, الطريقة دي هتعمل تخدير للالم وهتقلل من حجم الحبوب.

وصفات طبيعية لعلاج الحبوب تحت الجلد 7
وصفات طبيعية لعلاج الحبوب تحت الجلد 7

7- معجون الاسنان:

معجون الاسنان كمان واحد من العلاجات اللي ممكن تستخدميها لعلاج الالتهاب والالم اللي بيحصل بسبب الحبوب, والافضل تستخدمي معجون اسنان بالنعناع لان النعناع مضاد للبكتيريا وبيساعد على تقليل الاحمرار والتورم وكمان الالم اللي بيسببه الحبوب.

ادهني مكان الحبوب بمعجون الاسنان بالليل ونامي بيها واغسليها الصبح بمية باردة.

وصفات طبيعية لعلاج الحبوب تحت الجلد 8
وصفات طبيعية لعلاج الحبوب تحت الجلد 8

8- الملح الانجليزي:

الملح الانجليزي يعتبر من العلاجات الممتازة جدا لحبوب تحت الجلد لانه بيحتوي على المعادن “كبريتات المغنسيوم” اللي بتساعد على قتل البكتيريا اللي بتسبب الحبوب وده بدوره بيساعد على تقليل الالتهاب والالم لحد كبير.

جيبي ¼ كوباية مية سخنة وضيفي لها معلقة كبيرة ملح انجليزي وقلبيه وسيبي المية تبرد لحد ما توصل لدرجة حرارة الغرفة, بلي قطعة قطن من المية واضغطي بيها على مكان الحبوب وبعدين سيبي المية لحد ما تنشف على البشرة, وبعدها اغسلي البشرة بمية باردة, كرري الوصفة 3 مرات في اليوم لحد ما تتخلصي من الحبوب.

وصفات طبيعية لعلاج الحبوب تحت الجلد 9
وصفات طبيعية لعلاج الحبوب تحت الجلد 9

9- جل صبار الالوفيرا:

الالوفيرا غنية جدا بالمواد المضادة للاكسدة اللي يعتبر عامل مضاد للبكتيريا, ادهني بشرتك بجل الصبار بالليل وسيبيه لحد الصبح اغسليه بالمية, كرريه يوميا.

وصفات طبيعية لعلاج الحبوب تحت الجلد 10
وصفات طبيعية لعلاج الحبوب تحت الجلد 10

10- خشب الصندل:

خشب الصندل وهنلاقيه موجود عند العطار هو واحد من العلاجات الفعالة جدا للتخلص من مشكلة حبوب تحت الجلد.

اخلطي معلقة كبيرة من خشب الصندل المطحون مع معلقة صغيرة عسل, ومعلقة صغيرة لبن, ومعلقة صغيرة مية ورد, قلبيهم لحد ما يتشكل عندك معجون سائل, ادهنيه على البشرة وسيبيه 30 دقيقة او لحد ما ينشف وبعدين اغسليه بالمية, كرري الوصفة مرة واحدة في اليوم.

وصفات طبيعية لعلاج الحبوب تحت الجلد 11
وصفات طبيعية لعلاج الحبوب تحت الجلد 11

11- مية الورد:

مية الورد تعتبر قابض طبيعي للبشرة, وبتساعد على قتل البكتيريا وتقليل الاحمرار والالتهاب اللي بتسببه الحبوب.

بلي قطنة بمية الورد واضغطي بيها على الحبوب لمدة 5 دقايق, كرريها تلات مرات في اليوم.

وصفات طبيعية لعلاج الحبوب تحت الجلد 12
وصفات طبيعية لعلاج الحبوب تحت الجلد 12

12- القرفة:

القرفة بتحتوي على مادة تعتبر عامل مضاد للبكتيريا اللي بيساعد على شفاء الجلد وعلاج الحبوب.

اخلطي معلقة صغيرة من العسل مع تقريبا نص معلقة من القرفة المطحونة, ادهني الخليط على مكان الحبوب وسيبيه لحد ما ينشف وبعدين اغسليه بمية باردة, كرري الوصفة 3 مرات في اليوم.

وصفات طبيعية لعلاج الحبوب تحت الجلد 13
وصفات طبيعية لعلاج الحبوب تحت الجلد 13

– نصايح عامة:

1- الحبوب لما هتكون في مراحلها الاولى هتلاقي مكانها لونه احمر وده معناه انك لازم تبدأي تعالجيها, استخدمي الضغط البارد او الدافي زي ما قولنا في الطرق اللي فوق.

2- تاني مرحلة للحبوب انها بتبدأ تشكل دهون وفي المرحلة دي بردو هتستمري في العلاج بالضغط الدافي او البارد عليها.

3- اشربي مية كتير عشان المية بتساعد على تنقية البشرة.

4- كلي خضار وفاكهة طازة كتير.

وصفات طبيعية لعلاج الحبوب تحت الجلد 14
وصفات طبيعية لعلاج الحبوب تحت الجلد 14

– حماية البشرة من الحبوب تحت الجلد:

اكيد زي ما بنقول الوقاية خير من العلاج, عشان كده هنقولكم شوية نصايح عشان تحمي البشرة من ظهور حبوب تحت الجلد.

1- حافظي على نضافة البشرة:

اهم طريق لحماية البشرة من النوع ده من الحبوب هو اننا نحافظ دايما على نضافتها, لان تكون الدهون واختلاطها مع عوامل الجو ده بيأدي ان المسام تتسد وتظهر الحبوب اللي تحت الجلد, عشان كده لازم ننضف البشرة من مرتين لتلات مرات في اليوم بالغسول المناسب او باي طريقة تنضيف انتي بتستخدميها لبشرتك.

2- متبالغيش في تطهير البشرة:

اكيد زي ما قولنا نضافة البشرة مهمة جدا لكن كمان المبالغة في التنضيف او تطهير البشرة ممكن يأدي لظهور مشكلة الحبوب دي, يعني التنضيف للبشرة الدهنية يكون مرتين في اليوم, وللبشرة الجافة مرة واحدة هيكون كافي لتنضيف وترطيب البشرة, وممكن تضيفي نقط من اي نوع زيت “زيت الزيتون, زيت جوز الهند, زيت شجرة الشاي” للمية اللي بتغسلي بيها وشك او المطهر اللي بتستخدميه, او ممكن تضيفي خل تفاح او جل صبار الالوفيرا.

3- اشربي مية كفاية:

المية من الحاجات المهمة جدا اللي بتحافظ على صحة البشرة, لازم تشربي يوميا من 8 – 10 كوبايات مية, ده هيساعد على ترطيب الجلد جدا, وهيحسن عملية التمثيل الغذائي للجسم, وهيهدي البشرة, لان المية بتساعد على تخليص الجسم من السموم وتنضيف الجهاز الهضمي, وبالتالي ده هينعكس بشكل ايجابي جدا على بشرتك.

4- كلي اكل صحي:

حاولي تمشي على نظام غذائي صحي وتتجنبي الاكلات اللي ممكن تضر بشرتك او تنعكس عليها بشكل سلبي زي الاكلات السريعة اللي فيها نسبة دهون عالية, واعتمدي اكتر على الاكلات المفيدة زي الفاكهة والخضار الطازة الغنية بالمعادن والفيتامينات اللي بتحتاجها البشرة.

5- ابعدي عن الضغط والتوتر:

النوم بشكل كافي وعدم الاجهاد من افضل الطرق لبشرة صحية خالية من اي عيوب, لان خلايا البشرة بتتجدد اثناء النوم, ولما تنامي بشكل كويس وعدد ساعات كافية ده بيقلل من التوتر لحد كبير جدا وده بالتالي بينعكس بشكل ايجابي على بشرتك, كمان التنفس بشكل عميق, والتمارين الرياضية كمان مهمة جدا لان لما الجسم بيعرق خلال التمارين بيطرد كل السموم وبينضف الجسم وبيقلل التوتر.

وصفات طبيعية لعلاج الحبوب تحت الجلد 15
وصفات طبيعية لعلاج الحبوب تحت الجلد 15

10 غلطات في العناية بالبشرة بتزود مشكلة حب الشباب وبتخليه اسوأ .. وازاي تتجنبيها

غلطات في العناية بالبشرة
غلطات في العناية بالبشرة

مقالات متعلقه

5 علاجات طبيعية بتستخدمها كارينا كابور لبشرة نضرة وشباب

5 علاجات طبيعية بتستخدمها كارينا كابور لبشرة نضرة وشباب

10 نصايح جمالية دخليهم في روتينك هيفرقوا معاكي

10 نصايح جمالية دخليهم في روتينك هيفرقوا معاكي

10 وصفات طبيعية لتغذية بشرتك في الشتا

10 وصفات طبيعية لتغذية بشرتك في الشتا