نظام دايت فعال جدا لخسارة الوزن في وقت قصير
النهاردة جايبين لكل بنات حوا نظام دايت لخسارة الوزن بشكل فعال جدا عن تجربة شخصية لواحدة من البلوجر وجاب معاها نتيجة وحبت تشاركه عشان غيرها يستفيد بتجربتها, والنظام هيساعدك على خسارة الوزن في وقت قصير وفي نفس الوقت من غير مجهود كبير او انك تحتاجي تعملي اكلات مخصوص لكن بس كل اللي هتعمليه ان في انواع اكل هتستبدليها بانواع تانية في نظامك الغذائي اليومي وده اللي هنعرفه من خلال موضوعنا النهاردة.
نظام دايت لخسارة الوزن في وقت قصير:
1- الخبز:
استبدلي الخبز العادي, بنوع البسكويت الـ Hard Biscuits, او الـ Crackers والانواع دي هتلاقيها موجودة في السوبر ماركت, او الخبز البني, وقللي عن الكمية اللي كنتي بتاكليها في العادي, واحدة واحدة هتلاقي ان معدتك اتعودت على كمية معينة مش هتزودي عنها.
2- المشروبات الغازية:
حتى لو مش بتشربي كمية كبيرة من المشروبات الغازية او على فترات لما تيجي تشربي منها اختاري النوع الدايت او الخالي من السكر, وقللي الكمية, والافضل مع الوقت انك تتجنبي شربها خالص.
3- السكر:
استبدلي السكر العادي, بالسكر البني او الانواع الدايت اللي بتكون فيها سعرات حرارية قليلة, ودي تعتبر حيلة سهلة وبسيطة جدا عشان تقللي من السعرات الحرارية اللي بتدخل جسمك.
4- العصاير:
استبدلي العصاير الصناعية اللي موجودة في السوق اللي بتكون مليانة سكر وسعرات حرارية للعصاير الفريش الطبيعية من غير سكر.
5- القهوة:
لو انتي من محبات القهوة استبدلي القهوة السودا بنوع القهوة الخضرا, والنوع ده من القهوة مفيد جدا وبيساعد على حرق دهون الجسم, هي بيكون طعمها مختلف شوية عن القهوة العادية لكن هتتعودي عليها مع الوقت.
6- وجبة الفطار:
وجبة الفطار تعتبر هي الوجبة الاساسية اللي بتدينا طاقة لباقي اليوم وكمان بتمنع زيادة الوزن, لان لو ماكلتيش وجبة الفطار ده هيخليكي تاكلي كميات اكل اكتر في وجبة الغدا وبالتالي كمية سعرات حرارية اكتر هتدخل الجسم وتأدي لزيادة الوزن عشان كده متتجنبيش وجبة الفطار حتى لو مستعجلة او معنديش وقت حاولي انك تحافظي على الوجبة دي يوميا.
7- الشوكولاتة:
معظم البنات تقريبا من عشاق الشوكولاتة ومش بيقدروا يستغنوا عنها لكن طبعا الشوكولاتة من الحاجات اللي ممكن تسبب زيادة الوزن لو اكلتي منها كمية كبيرة, عشان كده هنديكي الحل عشان متستغنيش عنها خالص استبدلي الشوكولاتة العادية بالشوكولاتة الغامقة وكل ما كان النوع غامق ومر اكتر ده معناه انها بتحتوي على دهون اقل.
8- الفاكهة:
الفاكهة معروف انها من الحاجات المفيدة للصحة بشكل عام, لكن في انواع فاكهة فيها سعرات حرارية عالية زي الفواكة المجففة, الموز, جوز الهند, المانجا, البلو بيري الافضل تجنبها او التقليل منها على قد ما تقدري, واعتمدي على الفواكة اللي لونها احمر بشكل خاص لانها غنية بمضادات الاكسدة, والفواكة الخضرا زي الكيوي او لاتفاح الاخضر اللي بتمد الجسم بكمية كبيرة من الفيتامينات.
9- تتبيلة السلطة Dressings:
المايونيز وتتبيلات السلطة المختلفة بيبقى فيها سعرات حرارية عالية, ممكن تستبدليها بجبنة كريمي, او الافوكادو, او زيت الزيتون, صحية اكتر وبسعرات حرارية اقل.
10- الزبادي:
الزبادي ممكن تعتمدي على الزبادي الطبيعية اللي معمولة في البيت بدل الزبادي اللي من السوبر ماركت, ولو مش هتقدري تعمليها في البيت يبقى اشتري النوع اللايت واتجنبي كاملة الدسم او اللي بالفاكهة.
وهي اضافت انها مع النظام ده بدأت تمشي كل يوم لمدة 30 دقيقة بس, وفعلا النظام ده جاب معاها نتيجة فعالة جدا وساعدها انها تخس بأقل مجهود وفي وقت قصير.