كريمات الجلد اللي حوالين الضوافر .. ليه محتاجينها؟ وازاي تعمليها بنفسك في البيت

ريهام محمود
ريهام محمود
في
أظافر
10915

في جزء مهم جدا من البشرة ممكن يكون في كتير مننا بيهمل الاهتمام بيه وهي بشرة الجلد اللي حوالين الضوافر الجزء ده بيبقى رقيق جدا ومحتاج عناية واهتمام زي اي جزء من البشرة, لان الجزء ده هو اللي بيحمي الضوافر من اي عدوى ويعتبر حاجز ضد دخول اي بكتيريا او جراثيم للضوافر اللي ممكن تسبب العدوى او الفطريات, عشان كده لازم نتجنب اننا نتخلص منه او نشيله لاننا كده هنفتح الطريق للبكتيريا والجراثيم انها تدخل للضوافر بكل سهولة وتضرها, وافضل طريقة للحفاظ عليه اننا نهتم بيه كويس عن طريق كريمات الجلد اللي حوالين الضوافر ونستخدم الادوات المناسبة ليها, والنهاردة هنقولكم من خلال موضوعنا طريقة الاهتمام بالبشرة حوالين الضوافر, وازاي تعملي كريم العناية بيها بنفسك في البيت.

كريمات الجلد اللي حوالين الضوافر:

افضل وقت للعناية ببشرة الجلد حوالين الضوافر هو بعد ما تكوني واخدة شاور دافي, لانه بيكون اكتر وقت الجلد لين واسهل في التعامل معاه من غير ما تأذي البشرة, ولو مش هتعمليهم بعد الشاور ممكن تنقعي ايديك في طبق فيه مية دافية لمدة لحد ما الجلد يطرى.

– طريقة عمل الكريم:

الكريم فايدته انه هيحافظ على البشرة ناعمة ويمنعها من الجفاف, وبالتالي ده هيحافظ على الضوافر صحية ويحميها من الضعف والتكسر.

المكونات:

– 2 معلقة كبيرة من زبدة الشيا.

– 1 معلقة كبيرة زيت جوز هند.

– ½ معلقة كبيرة زيت زيتون.

– نقطتين زيت فيتامين E.

– عصير ½ ليمونة.

الطريقة:

اول حاجة سيحي زبدة الشيا على حمام مية سخنة, بمجرد ما تدوب ضيفي لها زيت الزيتون وزيت جوز الهند وارفعيها من على النار, سيبيها تبرد شوية وبعدين ضيفي عصير الليمون وزيت فيتامين E, قلبيهم مع بعض لحد ما كل المكونات تمتزج مع بعض كويس, صبي الخليط في اي برطمان او علبة فاضية عندك, وسيبيها ليلة كاملة قبل الاستخدام, وقبل كل استخدام رجيها الاول كل مره.

كريمات الجلد اللي حوالين الضوافر 1
كريمات الجلد اللي حوالين الضوافر 1

– طريقة تانية للكريم:

المكونات:

– 1 معلقة كبيرة شمع عسل.

– 2 معلقة كبيرة زبدة الشيا.

– 5 نقط زيت اللافندر “اختياري”.

– 5 نقط زيت البرتقان “اختياري”.

– نقطتين من زيت فيتامين E.

الطريقة:

اخلطي زبدة الشيا مع شمع العسل ودوبيهم في حمام مية سخنة, وبعد ما يدوبوا ارفعيهم من على النار وضيفي لهم الزيوت, وبعدين صبي الخليط في علبة او برطمان وسيبيه لحد ما يتجمد في درجة حرارة الغرفة.

الكريمات ممكن تقعد معاكي لحد سنة كاملة من غير ما يحصلها حاجة, وخزنيها عادي في درجة حرارة الغرفة مش محتاجة تلاجة, لو الجو حر بس ممكن يتحفظ في التلاجة.

كريمات الجلد اللي حوالين الضوافر 2
كريمات الجلد اللي حوالين الضوافر 2

– طريقة الاستخدام:

ادهني الجلد بالكريم يوميا قبل النوم, وكل فترة وقت ما تحتاجي زقي الجلد بأدوات مناسبة ومش حادة عشان متأذيش البشرة, استخدمي الـ Wood orange stick ودي خاصة للجلد اللي حوالين الضوافر وهتلاقوها موجودة في الصيدلية.

كريمات الجلد اللي حوالين الضوافر 3
كريمات الجلد اللي حوالين الضوافر 3

الاستخدام المنتظم للكريم ده هيساعد انه يحافظ على بشرتك دايما ناعمة ويحميها من الجفاف, زي بالظبط البشرة لما تهملي استخدام الكريم المرطب ليها هتجف وهتبقى خشنة, كمان لما تهملي استخدام كريم حوالين الضوافر ده هيأدي انها تبقى جافة وخشنة, عشان كده مهم جدا اننا نهتم بترطيبها عشان نحافظ على البشرة والضوافر في نفس الوقت.

ملحوظة: لو هتروحي تعملي جلسة مانيكير للضوافر في صالون التجميل اطلبي من المتخصصة انها متشيلش او تقطع الجلد اللي حوالين الضوافر لكن بس تزقه بالراحة بالادوات المناسبة, لكن ممكن بس لو في اي زوائد جلدية ناشفة حوالين الضوافر تشيلها مش اكتر من كده عشان تحافظي على ضوافرك من اي عدوى.

كريمات الجلد اللي حوالين الضوافر 4
كريمات الجلد اللي حوالين الضوافر 4

16 غلطة بنعملهم في ضوافرنا .. وازاي نتجنبها ونخلي ضوافرنا صحية

غلطات بنعملهم في ضوافرنا
غلطات بنعملهم في ضوافرنا

مقالات متعلقه

بمكون واحد من مطبخك هيساعدك على تطويل وتبييض ضوافرك

بمكون واحد من مطبخك هيساعدك على تطويل وتبييض ضوافرك

12 قاعدة بسيطة هتساعدك في الحصول على باديكير مثالي

12 قاعدة بسيطة هتساعدك في الحصول على باديكير مثالي

ازاي تنضفي تحت اظافر الايدين والقدمين, ونصايح للعناية اليومية بالاظافر

ازاي تنضفي تحت اظافر الايدين والقدمين, ونصايح للعناية اليومية بالاظافر