مترميش قشر البصل واستخدميه لجمال بشرتك وشعرك ولصحتك

البصل من الحاجات اللي بنستخدمها يوميا في الاكلات بتاعتنا واكيد كلنا بنرمي القشر بتاعه, لكن بعد موضوعنا النهاردة مش هترمي قشر البصل تاني بعد ما تعرفي فوايدة الجمالية والصحية, هنتعرف مع بعض من خلال السطور الجاية على فوايد واستخدامات قشر البصل لجمال بشرتك وشعرك وازاي تستفادي منه.

– فوايد واستخدامات قشر البصل:

1- قشر البصل بيحتوي على مضادات الاكسدة المفيدة جدا لشباب ونضارة الجلد, كمان مفيد جدا من الناحية الصحية بيساعد على تقوية القلب والاوعية الدموية, وتقليل خطر الاصابة بامراض الدماغ, بيساعد على خفض الكوليسترول السيء وضغط الدم, ومنع الالتهابات, تقوية العضلات, علاج الاكتئاب, بيساعد على قتل بعض اشكال الخلايا السرطانية.

2- لما تستخدمي قشر البصل في الاكل المغذيات الدقيقة اللي موجودة فيه بتزود القيمة الغذائية للطبق بتاعك, وبيساعد كمان في تنضيف الجهاز الهضمي, ممكن تحطي القشر مع الشوربة او الصلصات.

3- لو بشرتك ملتهبة او بتعاني من لدغات الحشرات, دلكي مكان الاصابة بقشر البصل من 2 – 3 مرات في اليوم لعلاج الالتهاب ولدغات الحشرات, وممكن تستخدميه بطريقة تانية انك تغلي القشر في المية وتستخدمي مية قشر البصل تدهني بيها المنطقة المصابة وهتلاحظي النتايج مع الاستمرار.

4- لو بتعاني من الم وتقلصات العضلات, الحل بسيط جدا انقعي معلقة صغيرة من قشر البصل في كوباية مية دافية وسيبيه فترة منقوع  لحد ما يطرى او تلاقي ان لون المية اتغير , واشربي المية دي قبل العشا كل يوم, هتلاحظي مع الاستمرار ان الم وتقلصات العضلات اختفت.

5- لو بتعاني من اي مشاكل جلدية زي حب الشباب او بثور او التهابات او دمامل, انقعي القشر في مية دافية لحد ما يطرى وخديه ضيفي عليه زيت زيتون لحد ما تتكون عندك عجينة افرديها على البشرة وسيبيها 5 دقايق وبعدين اغسليها بمية باردة, كرري الوصفة مرتين يوميا, وممكن تضيفي لقشر البصل زيت جوز هند بدل زيت الزيتون.

6- لترطيب البشرة والشعر, ضيفي شوية من قشر البصل على كوباية مية دافية وممكن تزودي كمية المية حسب طول وكثافة شعرك وسيبي القشر منقوع شوية, وبعدين اغسلي شعرك بالشامبو بالطريقة العادية واغسلي شعرك بمية قشر البصل, وللبشرة اغسليها بنفس المية.

7- لعلاج الكحة والبرد وارتفاع الحرارة اغلي قشر البصل في كوباية مية وصفيها وضيفي عليها معلقة صغيرة عسل نحل, واشربيها يوميا لعلاج الكحة ونزلات البرد وارتفاع درجة الحرارة.

– وصفات باستخدام قشر البصل:

1- تفتيح وترطيب وتنعيم البشرة:

– اخلطي ملعقة كبيرة من دقيق الحمص مع ومعلقة كبيرة من قشر البصل و معلقة صغيرة زبادي, قلبيهم مع بعض لحد ما تتكون عندك عجينة قوامها معقول, افرديها على بشرتك وسيبيها 10 دقايق وبعدين اغسليها بمية دافية, كرري الوصفة يوميا.

– او تنقعي قشر البصل في كوباية مية دافية, واغسلي بشرتك يوميا بالمية بتاعته, وبعدين امسحيها بمية ورد.

– او اخلطي معلقة صغيرة من عجينة قشر البصل مع معلقة صغيرة كركم لحد ما تتكون عندك عجينة قوامها مناسب, طبقي الخليط على البشرة وسيبيه 30 دقيقة او لحد ما ينشف واغسليه بالمية, كرريها 3 مرات في الاسبوع, الوصفة دي هتفتح البشرة وتخلصك من البقع الغامقة, لو بشرتك حساسة ممكن تضيفي معلقة صغيرة عسل نحل مع الخليط.

2- شد البشرة وعلاج التجاعيد وتصغير المسام الواسعة وعلاج حب الشباب:

– اخلطي معلقة كبيرة من عجينة قشر البصل مع معلقة كبيرة طماطم مهروسة ونقطة من زيت النيم, ادهني بشرتك بالخليط وسيبيه 30 دقيقة وبعدين اغسلية بالمية, كرري الوصفة يوميا.

– او تستخدمي عجينة قشر البصل لوحدها يوميا, خدي معلقة كبيرة من معجون البصل وافرديها على البشرة وسيبيها 10 دقايق واغسليها بالمية, كرري الوصفة يوميا وهتلاحظي الفرق على بشرتك خلال اسبوع واحد.

3- نمو وتكثيف الشعر:

اخلطي عجينة قشر البصل مع عسل النحل لحد ما تتكون عندك خليط بقوام متوسط, حطي الخليط من جذور الشعر للاطراف ودلكي بيه فروة الراس وسيبيه ساعة او ممكن تسيبيه من بالليل للصبح هيكون افضل عشان الشعر يستفاد اكتر وبصيلات الشعر تتغذى كويس, وبعدين اغسلي الشعر بالطريقة العادية, كرري الوصفة من مرة لمرتين في الاسبوع.

4- علاج الشيب والقشرة ومنع تساقط الشعر وتطويله:

اغلي شوية من قشر البصل في لتر مية لمدة من 5 – 10 دقايق, صفي المية واستخدميها على الشعر وسيبيها 12 ساعة يعني ممكن تسيبيها من بالليل للصبح, وبعدين اغسليها بالمية والشامبو.

5- صبغ الشعر:

لو عايزة تلوني شعرك بلون كستنائي فاتح وخايفة على شعرك من ضرر الصبغة ممكن تستخدمي قشر البصل لتلوينه, ضيفي حوالي 30 جرام من قشر البصل لربع لتر مية وسيبيه يغلي ربع ساعة وبعدين صفيه وضيفي للمية 5 جرام جليسرين “اختياري” وبعدين اغسلي شعرك بالمية دي, كرري الوصفة يوميا لحد ما توصلي للون اللي انتي عايزاه.

وفي طريقة تانية اغلي شوية من قشر البصل في 3 كوبايات مية وصفي المية وضيفي عليها فنجان نسكافية و 2 فنجان كاكاو ومعلقة كبيرة زيت زيتون وكوباية زبادي وممكن تضيفي للخليط شوية حنة عشان تبقى عندك عجينة سميكة بس اضافتها اختياري يعني ممكن تستغني عنها, وزعي الخليط على شعرك وسيبيها تنشف واغسلي الشعر, كرري الوصفة حسب الحاجة لحد ما توصلي للون اللي انتي عايزاه.

6- لتخسيس الوزن:

هاتي قشر البصل واغسليه كويس بالمية, اخلطي منه معلقة ونص مع 2 كوباية مية واغليها لمدة 5 دقايق وبعدين صفية, واشربي كوباية من المية دي قبل كل وجبة, الوصفة دي ممكن تنزل الوزن حوالي 10 كيلو في شهر واحد.

الماسك السحري لبشرة نقية وشعر لامع باستخدام الحلبة بس