فوايد واستخدامات خل التفاح الجمالية والصحية

ريهام محمود
ريهام محمود
في
بشرة
11176

خل التفاح مكون بسيط ورخيص لكن ليه فوايد كتير جدا للبشرة والشعر ومش بس كده كمان ليه فوايد للصحة بشكل عام, وده اللي هنعرفه النهاردة من خلال موضوعنا هنتعرف على فوايد واستخدامات خل التفاح الجمالية والصحية.

فوايد واستخدامات خل التفاح:

– الفوايد الجمالية:

1- لنمو ولمعان وترطيب الشعر:

خل التفاح بيساعد على تنضيف ونمو ولمعان الشعر وبيساعد على ترطيبه , اخلطي كوباية مية مع معلقة صغيرة خل تفاح وبعد ما تغسلي شعرك بالشامبو اشطفيه بالخليط ده الشطفة الاخيرة, كرريها 3 مرات في الاسبوع لافضل النتايج.

2- علاج قشرة الشعر:

يعتبر كمان علاج فعال لعلاج قشرة الشعر, اخلطي كميات متساوية من خل التفاح والمية وحطي الخليط على الشعر ودلكية من 3 – 5 دقايق وبعدين سيبيه 15 دقيقة كمان واغسليه بالمية بس متغسليش شعرك بالشامبو بعدها.

3- تبييض الاسنان:

خل التفاح يعتبر مبيض طبيعي للاسنان, بلي صوباعك بخل التفاح وادعكي الاسنان لمدة دقيقة, وبعدين اغسلي سنانك بالمية, درجة الحموضة الموجودة في خل التفاح هتساعد على ازالة البقع وتبييض الاسنان بشكل طبيعي.

4- التخلص من رائحة الفم الكريهة:

خل التفاح من الحاجات الفعالة اللي بتساعد على التخلص من مشكلة رائحة الفم الكريهة, لانه بيحتوي على البروبيوتيك ونوع من الحمض بيساعد على قتل البكتيريا اللي بتسبب الريحة الكريهة, كمان بيساعد على ازالة السكر من النظام الغذائي بتاعك, خدي كل يوم معلقة كبيرة خل تفاح 3 مرات في اليوم.

5- علاج حروق الشمس:

خل التفاح يعتبر حل لتهدئة حروق الشمس, املي البانيو مية دافية وضيفي لها كوباية خل تفاح و1/4 كوباية زيت جوز هند, وكام نقطة من زيت اللافندر, وانقعي جسمك في المية 10 دقايق هتهدي جدا من حروق الشمس.

5- علاج السيلوليت:

اخلطي زيت الزيتون مع تلات اضعاف الكمية من خل التفاح يعني لو هتحطي مثلا معلقة زيت زيتون يبقى قصادها 3 معالق خل تفاح, دلكي اماكن السيلوليت بالخليط مرتين في اليوم, واستمري عليه يوميا لحد ما توصلي للنتيجة المطلوبة.

6- علاج فطريات الاظافر والجلد:

المركبات المضادة للبكتيريا والمضادة للفطريات الموجودة في خل التفاح بيخليه علاج طبيعي للبشرة وفطريات الاظافر, بكل بساطة ادهني مكان الفطريات بخل التفاح مرتين في اليوم , ممكن كمان تستخدمي خليط من زيت جوز الهند وزيت الاوريجانو لعلاج الفطريات.

7- تنعيم القدمين وعلاج تشقق الكعبين:

اخلطي خل التفاح مع مية دافية وانقعي فيها رجلك لمدة من 15 – 20 دقيقة يوميا, هتساعد على تنعيم القدمين وعلاج تشققات الكعبين.

8- تونر طبيعي للبشرة لعلاج حب الشباب والاكزيما:

درجة الحموضة في خل التفاح بيخليه علاج ممتاز جدا لمشاكل الجلد, ادهني المنطقة المصابة بالحبوب او اللي بتعاني من اي مشاكل بخل التفاح يوميا, وادهني بعدها البشرة بخليط متساوي من زيت جوز الهند واي نوع من الزيوت الاساسية عشان تسرع وتدعم علاج البشرة.

9- مزيل عرق طبيعي:

البكتيريا السيئة هي السبب الرئيسي في ريحة الجسم الكريهة, وخل التفاح يعتبر مزيل عرق طبيعي لانه بيقضي على البكتيريا, ادهني تحت الابطين بخل التفاح هيخلصك من ريحة العرق طول اليوم.

10- علاج الثآليل:

من الحاجات اللي خل التفاح فعال في علاجها هو مرض الثآليل اللي بيجي في الجلد, ادهني المكان المصاب بخل التفاح يوميا وسيبيه من بالليل للصبح, هتظهر النتايج خلال اسبوع واحد او وقت اطول في بعض الحالات حسب درجة الاصابة.

فوايد واستخدامات خل التفاح 1
فوايد واستخدامات خل التفاح 1

– الفوايد الصحية:

1- خفض الكوليسترول الضار:

اثبتت الدراسات ان خل التفاح بيساعد على خفض الكوليسترول الضار اللي ممكن يتسبب في امراض القلب, ومش بس بيخفض الكوليسترول الضار كمان بيزود من نسبة الكوليسترول الجيد في الدم, ممكن تشربي كل يوم على الريق كوباية مية مضاف ليها معلقة صغيرة خل تفاح.

2- عصير الصحة:

عصير الصحة هو عبارة عن خليط من عصير تفاحتين احمر وكوباية عصير توت وضيفي لهم 2 معلقة صغيرة خل التفاح قلبي المكونات كلها مع بعض كويس واشربي منه, المشروب ده يعتبر مضاد للاكسدة وبيساعد على انقاص الوزن.

3- تطهير الجسم من السموم:

خل التفاح يعتبر بيساعد على تطهير الجسم من السموم, وبيساعد على توازن درجة الحموضة في الجسم, وتحفيز القلب والاوعية الدموية, وبيحسن حركة الامعاء والهضم, بيقلل من خطر الاصابة بالامراض الخطيرة زي السرطان, بيزود طاقة الجسم, عشان كده يعتبر ديتوكس ممتاز لتطهير وتنضيف الجسم.

4- علاج الحرقة والحموضة:

واحدة من الاسباب الرئيسية للحرقة والحموضة بعد الاكل هو ان درجة الحموضة في المعدة بتكون مش متوازنة وعدم وجود الانزيمات والبروبيوتيك, وخل التفاح بيعوض كل نقص المكونات دي وبالتالي بيعادل درجة حموضة المعدة, ضيفي معلقة صغيرة من خل التفاح على كوباية مية واشربيه قبل كل وجبة بـ 5 دقايق.

5- بيساعد على انقاص الوزن:

اثبتت الدراسات ان خل التفاح من الحاجات الفعالة اللي ممكن تساعد في انقاص الوزن, وده لانه بيقلل رغبة الجسم في السكر, وبيحسن عملية ازالة السموم من الجسم, وكمان حمض الخليك اللي موجود في خل التفاح بيساعد على تخفيض نسبة الدهون في الجسم.

6- بيحافظ على مستوى السكر في الدم وبيحسن مرض السكر:

اثبتت الدراسات ان حمض الخليك اللي موجود في خل التفاح بيساعد على توازن السكر في الدم, وتحسين مرض السكر, ضيفي خل التفاح للسلطة بشكل يومي, او ضيفي معلقة كبيرة خل تفاح على كوباية مية واشربيها قبل كل وجبة.

7- العلاج من سم نبات اللبلاب:

كلنا عارفين ان نبات اللبلاب من النباتات السامة اللي ممكن تضر الجلد لو اتعرض له, والمعادن الموجودة في خل التفاح زي البوتاسيوم بتساعد على منع التورم والالتهاب اللي ممكن يحصل للجلد, وبيساعد على تطهير البشرة من السموم وبالتالي ده هيساعد على شفاء الجلد بسرعة.

8- خفض ضغط الدم:

اثبتت الدراسات ان استهلاك خل التفاح بشكل يومي بيساعد على خفض الدهون الثلاثية وضغط الدم المرتفع بشكل فعال جدا, ضيفيه للسلطة او ضيفي معلقة كبيرة على كوباية مية واشربيها يوميا.

9- علاج الحساسية:

خل التفاح يعتبر علاج فعال للحساسية اللي ممكن تحصل للجلد في تغيير المواسم, كمان بتدعم جهاز المناعة, وعلاج الجيوب الانفية, ضيفي 2 معلقة كبيرة من خل التفاح في كوباية مية كبيرة واشربيها 3 مرات في اليوم.

10- علاج الدوالي:

خل التفاح علاج طبيعي ممتاز للدوالي لانه بيحسن الدورة الدموية ومضاد للالتهابات وده بيساعد على تقليل الانتفاخ, اخلطي كميات متساوية من خل التفاح ومية الورد ودلكي بيها مكان الدوالي في حركات دائرية يوميا, وهتلاحظي تحسن الدوالي خلال اسابيع.

11- علاج البرد والتهاب الحلق:

خل التفاح يعتبر هو الحل الفعال والنهائي لعلاج البرد والتهاب الحلق بشكل سريع لانه غني بالفيتامينات والبروبيوتيك وحمض الخليك, ضيفي 2 معلقة كبيرة خل تفاح لكوباية مية واشربي منه 3 مرات في اليوم.

12- تقوية العظام:

خل التفاح بيساعد على امتصاص الكالسيوم وبالتالي ده بيساعد على تقوية العظام, اخلطي معلقة كبيرة من خل التفاح مع كوباية مية واشربيها كل يوم قبل او بعد الوجبة.

فوايد واستخدامات خل التفاح 2
فوايد واستخدامات خل التفاح 2

13- تنضيف البيت:

لان خل التفاح بيحتوي على خصائص مضادة للبكتريا يعتبر منظف طبيعي ممتاز جدا للبيت, هاتي ازازة ببخاخ وحطي فيها كميات متساوية من خل التفاح والمية ونضفي فيها البيت رشي الاسطح والشبابيك والازاز, وتنضيف الحمام.

14- تنضيف الحيوانات الاليفة:

لو انتي من محبات الحيوانات الاليفة في البيت زي القطط مثلا وبتعاني من الحشرات او البراغيت اخلطي كميات متساوية من المية والخل ونضفيه كويس بالخليط ده مرة يوميا لحد ما تتخلصي من اي حشرات.

فوايد واستخدامات خل التفاح 3
فوايد واستخدامات خل التفاح 3

فوايد واستخدامات الجزر الجمالية والصحية

فوايد واستخدامات الجزر الجمالية والصحية
فوايد واستخدامات الجزر الجمالية والصحية

مقالات متعلقه

تونر خل التفاح للبشرة ، فوايده وازاي تعمليه

تونر خل التفاح للبشرة ، فوايده وازاي تعمليه

10 نصايح لتقليل تصبغات الوجه بشكل طبيعي.. سهله تطبقيها وبمكونات طبيعية

10 نصايح لتقليل تصبغات الوجه بشكل طبيعي.. سهله تطبقيها وبمكونات طبيعية

امشى على الوصفات دى و هتتخلصى من المسام الواسعة فى 3 أيام بس وبشكل نهائى !

امشى على الوصفات دى و هتتخلصى من المسام الواسعة فى 3 أيام بس وبشكل نهائى !