16 غلطة فى ديكور الـ living room بنعملهم فى ديكور البيت

آية حسان
آية حسان
22610

بتفرشي شقتك جديد او حابة تجددى من ديكور البيت،  وعايزة تستغلى المساحات صح و تعملى ستايل لشقتك مختلف ومميز، يبقى لازم “ماتعمليش” الحاجات الجاية دى !

فى المقال ده اعرفى معانا 16 غلطة فى ديكور الـ living room بنعملهم فى ديكور البيت  ضرورى تتجنبيهم .. 

16 غلطة فى ديكور الـ living room بنعملهم فى ديكور البيت ..

1- تركيز الاضاءة فى نص الاوضة بس : 

الاضاءة هى اللى بتعمل جو فى الاوضة،  علشان كده توزيع الاضاءة فى الاوضة مهم وماينفعش  تكتفى بنجفة فى نص سقف الاوضة وخلاص. اعملى لنفسك نظام اضاءة حسب احتياجاتك يعنى اضاءة للقراية، اباجورات ، لمبات فى السقف و هكذا.

تركيز الاضاءة فى نص الاوضة بس

2- اختيار مقاس السجادة غلط : 

السجاجيد من المقاسات الصغيرة بتعمل عدم توازن فى الاوضة، بعكس السجاجيد اللى مقاسها مناسب للمساحة او السجاجيد الكبيرة بشكل عام لانها بتدى احساس انه الاوضة واسعه وبراح. مهم جدا انك تختارى مقاس السجادة صح بدقة.

اختيار مقاس السجادة غلط

3- اختيار مكان غير مناسب للتليفزيون : 

انسب مكان تحطى فيه التليفزيون هو على حيطة فاضية تماما، وماينفعش تحطيه على حيطة قدامها شباك او الوان واضحة لانها هتنعكس على شاشة التليفزيون وهتبقى مزعجة لعينيكى ومش هتشوفى كويس. وكمان المسافة بين الكنبة والتليفزيون بتعتمد على حسب شاشة التليفزيون ، بس ما ينفعش انها تقل ابدا عن 50 لـ 100 سم واكتر .

اختيار مكان غير مناسب للتليفزيون

4- قلة الاهتمام بمخدات الكنبة : 

رابع نصيحة معانا فى تنسيق ديكور الـ living room هى انك لما تيجيى تختارى مخدات الكنبة او الـ sofa cushions لازم تحطى فى بالك انها مهم تكون مريحة و ناعمة، ولازم تكون المادة بتاعتها او الخامة يعنى مناسبة لخامة وقماش الكنبة نفسها والمساند. فلو مثلا الكنبة بتاعتك قماشها من القطيفة او الشامواه ماينفعش تبقى مخدات او cushions الكنبة من القطن او الاقمشة اللى شبه الحرير. و الكنبة الكبيرة بس هى اللى تستوعب عدد كبير من المخدات، اما لو الكنبة حجمها صغير اكتفى بمخدتين او 3 من حجم صغير بس.

قلة الاهتمام بمخدات الكنبة

5- انك تلزقى الكنبة فى الحيطة : 

لو الاوضة عندك مساحتها كبيرة يبقى ما ينفعش ابدا انه تلزقى الكنبة فى الحيطة، لو المساحة عندك تكفى انك تبعدى الكنبة عن الحيطة يبقى اعملى كده علشان هتخلى الاوضة تبان مساحتها اكبر.

انك تلزقى الكنبة فى الحيطة

6- اختيار عفش لونه غامق مع اوضة سقفها منخفض : 

لو اشتريتى عفش لونه غامق زى الانتريه ده هيضيق الاوضة و يخلى السقف يبان واطى وقريب من الارض، علشان كده لو السقف عندك اصلا مش عالى يبقى ماتختاريش انتريه لونه غامق لانه هيبين الاوضة زحمة وضيقة، حاولى تختارى قطع اساس بألوان فاتحة وطبيعية.

اختيار عفش لونه غامق مع اوضة يقفها منخفض

7- اختيار العفش حسب الديزاين، مش على حسب ذوقك:

مش علشان الاثاث شكله حلو فى المعرض او الصور يبقى شكله هيبقى حلو في بيتك او هيناسبك. حاولى تختارى العفش حسب ديزاين بيتك يعنى مودرن ا و كلاسيك او غيره وشوفى ايه اللى يناسب ذوقك من الستايل ده، لانه ممكن حسب اختياراتك انتى تختارى قطع مالهاش دعوة او ماتنفعش مع بعضها وتبقى مضطرة تفرقيهم عن بعض.

اختيا العفش حسب الديزاين، م ش على حسب ذوقك

8- اختيار قطع اثاث بنفس اللون او بدرجات من نفس اللون : 

حاولى تختارى قطع اثاث بنفس اللون او بدرجات من اللون نفسه لانه حتى الاثاث له موضة و موضته ممكن تبطل، زى الصالون المدهب و الانتريهات اللى حجمها كبير كده.. الحاجات دى راحت عليها خلاص . خدى بالك من قطع الاثاث اللى فيها خطوط واضحة واشكال محددة، حتى لو اختارتى كنبة عادية اختارى معاها قطع اثاث بنقشات وتصميمات جريئة من نفس اللون او بألوان تتناسب معاها.

اختيار قطع اثاث بنفس اللون او بدرجات من نفس اللون

9- تعليق الصور او توزيعها غلط : 

الارتفاع المثالى لاى صورة او برواز تحطيه على الحيطة = 153 سم من الارض، لو عندك صور كتير وعايزة تعلقيها حاولى تجربى تعملى جاليرى صور على الحيطة بانك تعلقيهم جنب بعض بشكل معين بدل ما تستخدمى البراويز، او وزعيهم شوية فى كل زاوية من الاوضة.

تعليق الصور او توزيعها غلط

10- اختيار قطع اثاث بحجم كبير :

اكتر غلطة شائعة بنعملها هى اننا بنختار قطع اثاث بحجم كبير ماتتناسبش مع مساحة الـ living room  بالذات لما نيجى نختار الكنبة، قطع الاثاث اللى حجمها مش مناسب بتخلى الاوضة تبان اصغر واضيق، لو عندك living room كبيرة يبقى اختارى اى حجم كنبة تحبيه، لكن للاوض الصغيرة كنبة بـ two seats  وكرسيين بمساند هما افضل حل ليكى.

اختيار قطع اثاث بحجم كبير

11- مابتوظفيش الـliving room صح :

حاجة كمان  مهمة فى تنسيق ديكور الـ living room لو عندك اوضة مستطيلة فى شكلها ، تقدرى تصححى من شكل الاوضةباستخدام مكتبة او cabinet، لكن لو الاوضة عندك شكلها مربع يبقى ماعندكيش مشكلة ..

شوفى الافكار دى علشان توظفى مساحة الـ Living room او اى اوضة فى شقتك  صح : 

الـ living room واوضة النوم: خلى دايما اوضة النوم بعيد عن مدخل البيت ويبقى السرير قريب من الشباك.

الـ living room والمطبخ: ممكن ترتبيهم زى ما تحبى، لكن يفضل انه يبقى المطبخ فيه شباك علشان تطبخى براحتك جنب منفذ هواء وكمان الشباك يدخل نور.

الـ living room و اوضة السفرة: تقدرى تلاقى بسهولة عفش بأحجام تناسب مساحة الـ Living room واوضة السفرة، استغلال المساحات فى الاوضتين دول مش هيبقى صعب.

الـ living room واوضة المكتب: المكتب ممكن يتحط فى زاوية صغيرة حتى لو مالوش اوضة خاصة بيه، لكن المهم انك توفريله مصدر جيد للاضاءة.

مابتوظفيش الـliving room صح

12- مابتبرزيش منتصف الـ living room : 

الـ living room لازم يبقى فيها لون واضح وطابع خاص بيها، زى انك تبرزيها باستخدام دفاية، لوحة مميزة، مراية، ورق حائط او اى حاجة تانية ممكن تجذب الاهتمام. ممكن تبرزى باقى مساحة الاوضة باستخدام تنسيقات الالوان.

مابتبرزيش منتصف الـ living room

13 – بتحطى زرع بأحجام صغيرة : 

الاحسن انك تحطى زرعة واحدة فى قصيص زرع كبير لانه هيخلى مساحة الاوضة تبان اكبر عن انك تستخدمي اكتر من قصيص زرع بحجم صغير.

بتحطى زرع بأحجام صغيرة

14 – بتستخدمى غطاء قديم للانتريه : 

لما بتغيرى غطاء الانتريه او زى ما بنقول عليها ” التلبيسة” ده بيغير من شكل الانتريه ومن شكل الاوضة كلها ، وكأنك اشتريتى انتريه جديد، وتقدرى من خلاله تغيرى من ستايل الاوضة عندك خالص وتخليه مودرن، علشان كده ماينفعش تستخدمى غطاء قديم للانتريه لانه ممكن يبين الاوضة عندك قديمة و مش in style .

بتستخدمى غطاء قديم للانتريه

15- بتلتزمى بستايل واحد : 

لو التزمتى بستايل واحد للاوضة كلها ، الاوضة هتبان مش دافية ومملة . امزجى بين الستايلات المختلفة زى الـ eclectic, retro, loft, grunge وكمان الالوان وقطع الاثاث المختلفة علشان تعملى ستايل فريد خاص بيكى.

بتلتزمى بستايل واحد

16- بتقللى المساحة بسبب الستاير : 

اخر حاجة معانا من 16 غلطة فى ديكور الـ living room بنعملهم فى ديكور البيت هى الاختيار الغلط للستاير، الستاير ممكن تخلى مساحة الاوضة تبان اصغر واضيق لو اتعلقت غلط، خليكى حريصة انك تعلقى الستاير قريب من السقف على قد ما تقدرى وعلى عرض واسع علشان السقف يبان عالى و الاوضة تبان اكبر، وحاولى دايما تختارى الالوان الفاتحة و ستاير سادة مش منقوشة كتير علشان ماتعملش دوشة فى الاوضة وتضيقها.

بتقللى المساحة بسبب الستاير

اعرفى معانا كمان اكتر 6 الوان trendy لدهانات غرف النوم فى 2017

مقالات متعلقه

تغيير وتطوير.. اعرفي إزاي تجددي بيتك من غير فلوس كتير

تغيير وتطوير.. اعرفي إزاي تجددي بيتك من غير فلوس كتير

افكار ديكور لغرفة المعيشة Living Room بستايلات مختلفة

افكار ديكور لغرفة المعيشة Living Room بستايلات مختلفة

نصايح وأفكار ازاي تختاري لون الحوائط المناسب لغرفة النوم.. لتأثير أفضل على مودك وصحتك النفسية

نصايح وأفكار ازاي تختاري لون الحوائط المناسب لغرفة النوم.. لتأثير أفضل على مودك وصحتك النفسية