طرق لتنضيف البشرة من غير صابون

ريهام محمود
ريهام محمود
في
بشرة
25703

في بعض انواع منظفات البشرة والصابون بتحتوي على مواد كيميائية بتكون قاسية على البشرة وممكن تعمل خلل في توازن الزيوت الطبيعية على البشرة اللي ممكن تسبب مشاكل جلدية وخصوصا لصاحبات البشرة الحساسة اللي بتتأثر بسرعة من اقل حاجة, طيب هل هنبطل نغسل وشنا؟ اكيد لا لكن احنا ممكن نستبدل المنتجات اللي فيها مواد مضره لروتين تنضيف طبيعي وفي نفس الوقت لطيف على البشرة وميسببش اي جفاف او قشور ويحافظ عليها رطبة, وده اللي هنعرفه النهاردة مع بعض من خلال السطور الجاية هنقول لكل بنات حوا طرق تنضيف البشرة من غير صابون بمكونات طبيعية.

تنضيف البشرة من غير صابون:

1- اللبن:

تدليك البشرة باللبن يعتبر وسيلة فعالة جدا للتخلص من الجلد الميت وترطيب البشرة, وكمان يعتبر مطهر طبيعي وبيساعد على تهدئة تهيج الجلد وشفاء الجروح, ببساطة ممكن تستخدمي اللبن لوحده تدلكي بيه بشرتك, او تخلطي معاه عصير ليمون او بابايا مهروسة.

تنضيف البشرة من غير صابون 1
تنضيف البشرة من غير صابون 1

2- السكر:

السكر كمان من المكونات المفيدة جدا اللي بتساعد على تقشير الجلد من غير ما تسبب له اي ضرر.

اخلطي السكر مع المية او اي نوع زيت زي زيت الزيتون او زيت اللوز الحلو او زيت جوز الهند لانه هيساعد على ترطيب البشرة, ولو بشرتك دهنية ممكن تضيفي جل الصبار للسكر والزيت, دلكي بشرتك بالراحة بالخليط في حركات دائرية وبعدين اشطفيه بالمية.

تنضيف البشرة من غير صابون 2
تنضيف البشرة من غير صابون 2

3- البابايا:

فاكهة البابايا مصدر غني جدا بالمواد الغذائية زي الكاروتينات, وفيتامين سي, وفيتامين بي, والانزيمات والمعادن, ولب البابايا بيحتوي على مجموعة متنوعة من المواد النباتية بما فيهم مادة البوليفينول ودي من المواد المضادة للاكسدة اللي بتحافظ على شباب ونضارة البشرة.

دلكي البشرة بشريحة بابايا, او اخلطي البابايا المهروسة مع عسل نحل او مية ورد وحطيه كقناع على البشرة لمدة من 15 – 20 دقيقة وبعدين اغسليه بالمية.

تنضيف البشرة من غير صابون 3
تنضيف البشرة من غير صابون 3

4- دقيق الشوفان:

الشوفان يعتبر منظف طبيعي للبشرة لانه بيحتوي على مادة الصابونين ومعروف ان المادة دي ليها خصائص تطهير ممتازة, وهنلاقيها داخلة في كتير من منتجات البشرة والشعر.

اطحني من 1 – 2 معلقة كبيرة شوفان وضيفي لها مية او اي نوع زيت من اختيارك لحد ما تتكون عندك عجينة افركي بيها البشرة وبعدين اغسليها بالمية, او ممكن تخلطي دقيق الشوفان مع اللبن وعسل النحل وتستخدميه كماسك على البشرة سيبيه لحد ما ينشف وبعدين اغسليه بالمية.

تنضيف البشرة من غير صابون 4
تنضيف البشرة من غير صابون 4

5- عسل النحل:

العسل مرطب طبيعي للبشرة وبيديها نضارة ونعومة, بالاضافة لده ان العسل فيه خصائص مهدئة للبشرة وبيمنع التهاب واحمرار الجلد.

بس دلكي بشرتك بالعسل لوحده في حركات دائرية وبعدين اغسليه بالمية, او ممكن تضيفي على العسل لبن وتدلكي بيه البشرة كمنظف ومرطب هايل جدا للبشرة, او تضيفي عليه معلقة صغيرة صودا الخبز “كربوناتو” كمنظف ومقشر للبشرة.

تنضيف البشرة من غير صابون 5
تنضيف البشرة من غير صابون 5

6- زيت جوز الهند:

حطي معلقة صغيرة من زيت جوز الهند على ايدك ودفي الزيت بانك تفركيه في ايديكي كويس جدا وبعدين دلكي بيه بشرتك في حركات دائرية لمدة دقيقة, بعدها هاتي قماشة نضيفة وبليها بمية سخنة واعصريها كويس وحطيها على وشك لمدة 30 ثانية وبعدين امسحي بيها الزيت من على البشرة, الطريقة دي هتنضف البشرة وهترطبها جدا.

تنضيف البشرة من غير صابون 6
تنضيف البشرة من غير صابون 6

7- الليمون:

الليمون معروف بخصائصة المطهرة والمبيضة للبشرة, ممكن تدهني عصير الليمون بشكل مباشر على البشرة, لكن لو بشرتك حساسة ممكن تخلطي معاه زبادي وتسيبيه على البشرة من 10 – 15 دقيقة وبعدين اغسليه بمية دافية.

تنضيف البشرة من غير صابون 7
تنضيف البشرة من غير صابون 7

8- مية الورد:

مية الورد تعتبر مكون مثالي جدا لتطهير البشرة وترطيبها وكمان بتدي لون وردي طبيعي للبشرة, هاتي قطن قطعية قطع صغيرة وبليه كويس جدا بمية الورد ووزعيه على بشرتك كلها وخصوصا المناطق اللي بتفرز دهون زيادة زي الجبين والدقن والانف وسيبيه شوية لحد ما تحسي انه القطن نشف من مية الورد.

تنضيف البشرة من غير صابون 8
تنضيف البشرة من غير صابون 8

9- الخيار:

عصير الخيار من المكونات الفعالة جدا في تنضيف وترطيب البشرة والحفاظ على نضارتها, ومثالي جدا للاستخدام على البشرة الحساسة والجافة, ادهني بشرتك بعصير الخيار سيبيه ينشف واغسليه بالمية, كرريها من 2 – 3 مرات في الاسبوع لمدة شهر هتغير بشرتك تماما وهتخليها صحية ومنورة.

تنضيف البشرة من غير صابون 9
تنضيف البشرة من غير صابون 9

10- الافوكادو:

الافوكادو مطهر ومنظف ومرطب طبيعي للبشرة وكمان بيغذيها, اهرسي الافوكادو وضيفي له كام نقطة من عصير الليمون ودلكي بيه بشرتك.

تنضيف البشرة من غير صابون 10
تنضيف البشرة من غير صابون 10

11- عصير البطيخ:

عصير البطيخ منظف ومرطب للبشرة وخصوصا لو بشرتك جافة هيكون مفيد جدا لانه بيحافظ على رطوبة البشرة, ادهني بشرتك بعصير البطيخ بشكل يومي, ولو بشرتك دهنية ممكن تضيفي له جل الصبار.

تنضيف البشرة من غير صابون 11
تنضيف البشرة من غير صابون 11

12- عصير الرمان:

عصير الرمان مش بس بينضف البشرة كمان بيفتحها وبيخلصك من اثار الشمس, حطي 3 معالق كبيرة من الرمان في الخلاط اضربيهم كويس لحد ما تتكون عندك عجينة ضيفي عليهم 2 معلقة كبيرة لبن ساقع واضربي المكونات مع بعض اعملي سكراب وتدليك لبشرتك بالخليط لمدة دقايق وبعدين سيبيه من 2 – 3 دقايق كمان لحد ما ينشف واغسليه بمية باردة.

تنضيف البشرة من غير صابون 12
تنضيف البشرة من غير صابون 12

10 وصفات لجمالك من مكونات طبيعية وخضراء بالكامل

10 وصفات لجمالك من مكونات طبيعية وخضراء بالكامل
10 وصفات لجمالك من مكونات طبيعية وخضراء بالكامل

مقالات متعلقه

تحدي اليوم الواحد لتوهج بشرتك قبل الفرح

تحدي اليوم الواحد لتوهج بشرتك قبل الفرح

علاج الايورفيدا للبشرة في البيت في 3 خطوات سهلة

علاج الايورفيدا للبشرة في البيت في 3 خطوات سهلة

5 علاجات طبيعية بتستخدمها كارينا كابور لبشرة نضرة وشباب

5 علاجات طبيعية بتستخدمها كارينا كابور لبشرة نضرة وشباب