15 حيلة تخسري بيهم وزنك من غير مجهود
كلنا عارفين ان فقدان الوزن محتاج مجهود ووقت وصبر عشان نوصل للوزن اللي احنا عايزينه لكن الدراسات اثبتت ان لو عملتي بعض التغييرات في عاداتك اليومية ممكن تخسري وزنك من غير مجهود, وده اللي هنعرفه النهاردة مع بعض من خلال موضوعنا هنقول لكل بنات حوا حيل لخسارة الوزن من غير مجهود بشكل طبيعي وبحاجات بسيطة جدا لو خلتيها من عاداتك اليومية هتوصلي للوزن المثالي اللي بتتمنيه.
حيل لخسارة الوزن من غير مجهود:
1- اتنفسي بعمق:
التنفس بعمق بيقلل من مستوى الكورتيزول في الجسم وده الهرمون المسئول عن تنظيم زيادة الوزن والاجهاد, بالاضافة لده ان التنفس بعمق بيزود كمية الاكسجين وده هيساعد على تسريع عملية التمثيل الغذائي, ولو اخدتي زفير اسرع من الطبيعي او المعتاد ده هيساعد على القضاء على كمية اكبر من ثاني اكسيد الكربون وده هيخلي الخلايا تستخدم طاقة بشكل اكبر وبالتالي ده هيساعد على خسارة الوزن.
2- كلي خضار اكتر في وجبة الفطار:
وجبة الفطار بتوفر 25% من احتياجاتك اليومية من الطاقة وتعتبر هي اهم وجبة في اليوم اللي بتضمن لك تحسين الاداء الفكري والجسدي, ولما تبدأي يومك باكل الخضار ده بيساعد على الشعور بالشبع فترة طويلة, وتقليل السعرات الحرارية في الوجبات اللي هتاكليها بعد كده خلال اليوم, وكمان بتحسن من عملية الهضم.
3- اقعدي بشكل مستقيم:
الجلوس بشكل مستقيم سواء وانتي في شغلك او قعدة بتاكلي او بتتفرجي على التليفزيون يعني وانتي بتمارسي اي نشاط ده يعتبر وسيلة ممتازة جدا لانقاص الوزن بطريقة سريعة وفعالة, لان العادة البسيطة دي بتقلل من مستوى الكورتيزول في الجسم وبتحتاج طاقة اكتر ما انتي تتخيلي.
4- كلي الاكل السبايسي او الحراق:
الاكل السبايسي والغني بالتوابل بيحتوي على الكابسايسين وده مكون بيسرع عملية حرق الدهون في الجسم بالاضافة كمان انه بيقلل الدهون في الجسم لانه بيحفز بشكل طبيعي تدمير الخلايا الدهنية, كمان الاكل الحراق بيزود من عملية التمثيل الغذائي في الجسم بنسبة 20% لمدة 30 دقيقة على الاقل وخلال الفترة دي جسمك هيحرق الدهون من غير اي مجهود منك.
5- استخدمي مناديل المطبخ للتخلص من الدهون الزيادة:
لو انتي من محبات الاكلات المقلية وصعب عليكي تستغني عنها يبقى على الاقل قللي فيها نسبة السعرات الحرارية بانك تتخلصي من الدهون الزيادة باستخدام مناديل المطبخ عشان تمتص اي دهون فيها وساعتها هتقدري تاكلي اكلك المفضل مع سعرات حرارية اقل بكتير.
6- كلي قدام المرايا:
من العادات البسيطة والفعالة جدا انك تاكلي قدام المرايا وتبقي شايفة نفسك وانتي بتاكلي لانك هتكوني منتبهة جدا لكمية الاكل اللي بتاكليها وده هيساعدك انك متاكليش كمية اكل كبيرة, المرة الجاية لما تيجي تاكلي جربي الحيلة دي وقولي لنا النتيجة.
7- استخدمي السلم:
استخدمي السلم بدل الاسانسير, اثبتت الدراسات ان طلوع دورين كل يوم ممكن تساعدك على خسارة حوالي 2 كيلو في السنة ولو طلعتي 6 ادوار هتخسري حوالي 7 كيلو في السنة يعني كل ما زودتي استخدامك للسلم وعدد الادوار هيساعدك تخسي بشكل اكبر واسرع, ودي تعتبر حيلة فعالة جدا باقل مجهود يذكر.
8- مارسي تمرينات القوة:
الخبراء اكدوا ان تمرينات القوة هي اكتر فاعلية من اي تمرينات تانية في حرق الدهون, ابدأي الاول مع الاوزان الخفيفة وزوديها بالتدريج, بس خلي بالك انك متحطيش ضغط زيادة على العضلات والمفاصل عشان تتجنبي اي اصابة الافضل انك تمارسيها مع متخصص عشان تبقي ماشية صح.
9- اشربي كوبايتين مية قبل كل وجبة:
بينصح الخبراء بشرب كوبايتين مية قبل كل وجبة عشان تتجنبي انك تاكلي كميات اكل كبيرة, لان العادة البسيطة دي هتخليكي تحسي بالشبع وبالتالي هتاكلي اقل وبيمنع انك تاكلي بشراهة زيادة وبيسرع عملية التمثيل الغذائي في الجسم ونتيجة لده جسمك هيحرق سعرات حرارية اكتر.
10- اتمشي:
المشي من الرياضات البسيطة جدا والفعالة لخسارة الوزن هتساعدك انك تخسري تقريبا 255 سعرة حرارية في الساعة مع المشي البطيء وممكن توصل ل 391 سعرة حرارية مع المشي السريع, عشان كده الافضل انك تستغلي اي وقت فاضي عندك تروحي تتمشي فيه او لو حتى راجعة من مشوار بدل ما تركبي عربيتك او مواصلات اتمشي واستفادي انك تخسري وزنك.
11- اعملي Stretching:
الـ Stretching من العادات البسيطة جدا اللي ممكن تمارسيها بشكل يومي وهتساعدك على خسارة الوزن وتعتبر من الرياضات اللي بتقل فيها الاصابات زي اللي ممكن تتعرضي لها في ممارسة اي رياضة تانية, اليوجا تعتبر اختيار ممتاز جدا وممكن تمارسيها قبل اي نشاط بدني او رياضة تانية, وهي مش بس مفيدة للصحة لكن كمان بتحرق كمية من السعرات الحرارية.
12- استخدمي اطباق اصغر:
طبق صغير مليان بالاكل تعتبر حيلة ممكن تخدعي بيها المخ انه دي كمية اكل كبيرة وبالتالي هيوصله اشارة بالشبع بعد اكل كمية بسيطة حتى لو الطبق مليان خضار بس, استخدمي الحيلة دي بشكل يومي ومع اي نوع اكل.
13- كلي ببطء:
لما تاكلي ببطء وتمضغي الطعام بالراحة ده بيدي فرصة ووقت كافي ان المخ توصله اشارة بالشبع وبالتالي ده هيخليكي متاكليش كمية اكل كبيرة وده بدوره هيقلل من السعرات الحرارية.
14- اقفي اثناء الانتظار:
لو انتي في اي مكان بره ومستنية الباص او اي مواصلة خليكي واقفة متقعديش لان الوقفة بتحرق تقريبا 50 سعرة حرارية في الساعة اكتر من وانتي قعدة.
15- خدي حمام سخن:
اثبت الباحثين انه الحمام السخن بيحرق نفس كمية السعرات الحرارية اللي ممكن تحرقيها في مشي 30 دقيقة, ودي تعتبر من اسهل الحيل في خسارة الوزن من غير اي مجهود خالص كل اللي هتعمليه انك تاخدي حمام سخن كل يوم.