استخدامات مذهلة لقشر الفاكهة والخضروات .. اعرفيها معانا
زي ما كلنا عارفين ان اكل الفاكهة والخضروات من العادات الصحية جدا, واكيد لما ننتظم على اكلها يوميا هيتوفر عندنا قشر كتير من الفاكهة والخضار ومعظمنا او تقريبا كلنا بنرمي القشر ده لكن النهاردة بعد ما نقرا السطور الجاية مع بعض اكيد هنغير العادة دي وهنبطل نرمي القشر بعد ما نتعرف على استخدامات قشر الفاكهة والخضروات للمطبخ والبيت وكمان فوايدها الجمالية.
استخدامات قشر الفاكهة والخضروات:
1- شوربة بقشر الخضروات:
ممكن تعملي بقشر الخضار شوربة مغذية تستخدميها في الطبخ, طعمها بيبقى لذيذ جدا وفي نفس الوقت اقتصادية لانك مش هتشتري حاجة انتي هتعمليها بقشر الخضار اللي انتي طلعتيه, ممكن تستخدمي فيها اي نوع قشر خضار متوفر عندك زي قشر البصل, الجزر, الكرفس, البطاطس, الثوم, البصل الاخضر, الخس, الفاصوليا, الباذنجان, الفلفل, جذور الاعشاب زي البقدونس والكزبرة, يعني اي قشر او بواقي خضار كنتي بترميه تقدري تستفادي بيه في الشوربة.
نضفي القشور كويس واحفظيها في التلاجة لحد ما يتوفر عندك كمية من 3 – 4 كوبايات خضار حطيها في الحلة وضيفي لها المية وممكن تضيفي لها بردو بقايا طماطم او اي نوع خضار عندك, حطيها على نار هادية من 10 – 15 دقيقة, ارفعيها من على النار وسيبيها تبرد وخزنيها في ازازة في التلاجة لحد ما تيجي تستخدميها, وممكن تقعد عندك لحد 4 ايام.
ممكن كمان تستخدمي قشر الفواكة الحمضية زي البرتقان او الليمون تضيفيها للمشروبات العشبية عشان تديها نكهة مختلفة وتزود فايدتها, نضفي القشر كويس وسيبيه ينشف في الشمس او نشفيه في الفرن وضيفيه للمشروبات بتاعتك.
2- تعطير البيت بقشر الفاكهة:
ممكن تستخدمي قشر وبقايا الفاكهة لتعطير البيت, ممكن تستخدمي قشر الفواكة الحمضية زي البرتقان والليمون والجريب فروت, قشر الرمان, التفاح, واي نوع فاكهة تانية ممكن تكون متوفرة عندك وخصوصا اللي الوانها زاهية.
جمعي اي قشور من اختيارك او المتوفر عندك وحطيها في الشمس كام يوم لحد ما تنشف, بعد كده اخلطي معاها عيدان قرفة خشب كسريها وضيفيها معاها وجوزة الطيب وقرنفل وممكن كمان تضيفي لها اوراق ورد, حطي كل الخليط ده في علبة محكمة الغلق وسيبيها لمدة 3 ايام, بعد كده ممكن تستخدميها حطيها في اي طبق زينة عندك رتبيهم بشكل حلو وضيفي عليهم كام نقطة من اي زيت عطري زي زيت الياسمين او زيت اللافندر او اي نوع زيت تفضليه, وحطيها في اي مكان في البيت عندك هتخلي البيت ريحته حلوة جدا.
3- سكراب للبشرة وترطيبها:
القشر مفيد جدا لصحة الجلد لانه غني بالمواد المضادة للاكسدة وغيرها من المواد المغذية اللي بتدي نتيجة ممتازة جدا لتفتيح البشرة وتقشيرها وتطهيرها وكمان بتساعد على ترطيبها.
ممكن تستخدمي قشر الليمون, والتفاح, والبابايا, والرمان, والموز, الخوخ, ممكن تعمليها كقناع للبشرة او تستخدميه كسكراب تفركي البشرة والجسم بالقشر للتفتيح والترطيب.
جففي قشر البرتقان في الشمس لمدة من 3 – 4 ايام واطحنيه لحد ما يبقى عندك على شكل بودر, اخلطي 2 معلقة صغيرة من بودرة البرتقان مع 2 معلقة صغيرة زبادي و1 معلقة صغيرة عسل نحل, افردي الخليط على البشرة وسيبيه من 15 – 20 دقيقة وبعدين افركيه من على البشرة واغسليه بمية دافية, كرري الماسك ده من 2 – 3 مرات في الاسبوع لبشرة منورة ونضره.
هاتي قشر الخوخ ورشي عليه من جوه شوية سكر واعملي بيه سكراب للبشرة افركي بشرتك في حركات دائرية, هتنشط البشرة وتحافظ على رطوبتها.
قشر الفواكة الحمضية من الحاجات الهايلة جدا للبشرة ممكن تفركي بشرتك بيها من 2 – 3 مرات في الاسبوع هتحافظ لك على شباب البشرة, وهتقلل التجاعيد والبقع الداكنة, وهتساعد على شد الجلد.
ممكن تفركي البشرة بقشر الافوكادو او البابايا او قشر الموز لترطيب البشرة بشكل عميق جدا.
4- تبييض الاسنان:
عشان تبيضي اسنانك بياض ناصع مترميش قشر الموز او الفواكة الحمضية لان القشور دي بتحتوي على حمض الستريك اللي بيساعد على تقليل البقع الصفرا المتراكمة على الاسنان.
افركي الاسنان بالجزء الناعم الداخلي من قشر الموز او الليمون او البرتقان لمدة دقايق, وبعدين اغسلي اسنانك بالفرشة والمعجون بالطريقة العادية عشان تزيلي اي بقايا قشر, كرري الطريقة دي مرة واحدة في اليوم يوميا لحد ما تتخلصي من اي بقع على الاسنان وتوصلي للبياض اللي انتي عايزاه.
ممكن كمان نستخدم قشر الموز لتلميع الشوز الجلد, افركي الشوز بالجزء الداخلي لقشر الموز وبعدين امسحيها بقماشة نضيفة هتلاقي الشوز بتاعك بيلمع كأنه جديد.
ممكن كمان تنضفي اوراق الزرع بقشر الموز, امسحي كل ورقة بالجزء الداخلي من القشر هيرجع لونه زاهي تاني.
5- سماد للزرع:
لو عندك زرع في البيت ممكن تستخدمي قشر الفاكهة والخضار كسماد للزرع بتاعك لانها غنية بالمواد المغذية اللي بتزود خصوبة التربة, ولان القشور قابلة للتحلل هتختلط كويس بالتربة وتخلي الزرع بتاعك يطلع احسن.
هاتي قصرية زرع فاضية عندك واعملي حفرة في التربة بتاعتها وارمي فيها قشور الفاكهة والخضار وسيبيها شهر او شهرين عشان تتحلل وممكن كل فترة تقلبيها, وبعدها تقدري تحطي اي بذور في التربة بتاعتك لانها هتبقى كده غنية بالسماد المغذي وجاهزة للزرع, تقدري تزرعي اي حاجة انتي عايزاها ولو عندك جنينة ممكن تعملي نفس الطريقة فيها.
6- منظف للمعادن:
ممكن تستخدمي قشر الحمضيات زي الليمون والبرتقان والجريب فروت لتنضيف المعادن وتلميعها زي النحاس والنحاس الاصفر لان حمض الستريك الموجود فيها بيساعد جدا على اعادة لمعان المعادن, ممكن تستخدميها لتلميع اطارات عيون البوتجاز اللي دايما بنلاقي صعوبة في تنضيفها.
اغسليها بالمية العادية ورشي عليها شوية كربوناتو وبعدين هاتي القشر وافركيها كويس وبعدين اشطفيها بالمية وسيبيها تنشف هتلاقيها رجعت تلمع كأنها لسه جديدة.
7- اعملي فلفل الليمون:
لو هتعصري ليمون قبل ما تعصرية ابشري القشر بتاعة واستخدميه كتوابل عشان تضيفي نكهة وريحة حلوة لاكلاتك, ممكن تعملي بيه فلفل الليمون وتستخدمية كتوابل في تتبيلة الفراخ والسمك بيدي نكهة وريحة حلوة جدا.
ابشري قشر 6 ليمونات حجم متوسط, وضيفي لهم 2 معلقة كبيرة فلفل اسود مطحون, افردي الخليط في صينية وحطيه في الفرن لمدة ساعة او لحد ما ينشف خالص, اطحني الخليط في الخلاط لحد ما يبقى ناعم, خزنيه في برطمان او اي علبة عندك واستخدميه مع الاكل, وممكن يقعد عندك شهور من غير ما يحصله اي حاجة.
8- شمعة قشر البرتقان:
بعد ما تعصري البرتقان مممكن تستخدمي القشر بتاعه كشمعة, اقسمي البرتقانة نصين وخدي النص اللي فيه الجزء الابيض اللي في نص البرتقانة يكون اطول عشان تستخدميه كفتيل تولعيه, املي القشرة بزيت الزيتون وخلي الجزء الابيض يتشرب من الزيت كويس ولو حسيتي ان القشرة شربت الزيت شوية امليها تاني, ودلوقتي تقدري تستخدميها كشمعة هتدي شكل حلو وكمان ريحة حلوة للمكان.
9- سناكس لذيذ:
ممكن تستخدمي قشر البطاطس او البطاطا كسناكس صحي لذيذ جدا, اغسلي قشر البطاطس كويس جدا بمية جارية, ضيفي لها شوية عصير ليمون وزيت زيتون وقلبيهم مع بعض كويس, رصي القشر في صينية على ورقة زبدة وحطيها في الفرن على درجة حرارة 200 درجة مئوية لمدة 5 دقايق قلبيها مرة واحدة وبعدين سيبيها 5 دقايق كمان لحد ما يبقى لونها دهبي, طلعيها ورشي عليها ملح وفلفل وكليها كسناكس لذيذ وخفيف.
10- جيلي لذيذ:
ممكن تستخدمي قشر التفاح او الخوخ او الجوافة او البرتقان تعملي منه جيلي تحطيه على البسكويت او الخبز او الكوكيز.
اغسلي القشر كويس جدا بمية جارية وعلى كوباية من القشر اخلطي معاها ¼ كوباية من السكر البني او السكر العادي وضيفي لهم شوية بشر قشر ليمون وحوالي ربع معلقة صغيرة بكتين “هنلاقيه في السوبر ماركت ده بيستخدم مع المربات وبيساعد انه يدي قوام الجيلي”, حطي كل المكونات في طاسة او حلة وضيفي لهم المية حسب القوام اللي انتي عايزاة لو عايزاة خفيف زودي المية والعكس وسيبيهم على نار هادية وقلبيهم من وقت للتاني وبعد ساعة تقريبا هيكون الجيلي جاهز عندك, احفظيه في برطمان او ازازة واستخدميه.
11- تنضيف الكاتل:
مع الوقت الكاتل بيتراكم فيه رواسب عشان نتخلص منها بكل سهولة هاتي قشر الليمون حطيه في الكاتل مع المية وسيبيه يغلي بعد الغلي سيبيه لمدة ساعة وبعدين اتخلصي من المية واشطفيه بمية عادية.
12- التخلص من النمل بقشر الخيار:
لو بتعاني في البيت من مشكلة النمل قشر الخيار هيخلصك من المشكلة دي, حطي القشر على المكان اللي بيخرج منه النمل وسيبيه ليلة كاملة هتلاقي النمل هرب من المكان ومش هيرجع تاني.
13- صبغ القماش:
ممكن تستخدمي قشور الفاكهة والخضروات لصبغ القماش بطريقة فعالة ومش مكلفة في نفس الوقت, ممكن تستخدمي قشر البرتقان, والليمون, السبانخ, قشر البصل, التوت الاحمر والاسود, الكرنب الاحمر, البنجر, حسب اللون اللي انتي عايزاه.
هتبقي محتاجة على الاقل كوباية من اي نوع خضار او فاكهة عايزة اللون بتاعة وضيفي عليه ضعف الكمية مرتين مية بحيث انها تغطيه كويس حطيه على نار متوسطة وبعد شوية قللي النار خليها هادية وسيبيه لمدة ساعة
اطفي النار وسيبيه يبرد لحد ما يبقى زي درجة حرارة الغرفة, حطي اللون اللي طلع عندك في اي حاجة ازاز وكده يبقى جاهز لصبغ اي حاجة عندك باللون اللي انتي اختارتيه, بس انقعي قطعة الملابس اللي عايزة تصبغيها في اللون لحد ما توصلي لدرجة اللون اللي انتي عايزاه.
وعشان تخلي صبغة الملابس تثبت لمدة طويلة واللون ميروحش, لو هتصبغي بقشر الفاكهة اغلي قطعة الملابس اللي هتصبغيها قبل الصبغة في 4 كوبايات مية مضاف ليها ¼ كوباية ملح لمدة ساعة.
ولو هتصبغي بقشر الخضار اغلي قطعة الملابس قبل الصبغة في 4 كوبايات مية مضاف ليهم كوباية خل ابيض لمدة ساعة.
بعد كده اشطفي الملابس بمية باردة, وبعدين انقعيها في الصبغة لحد ما توصلي للون المطلوب زي ما قولنا.
بالنسبة للالوان عشان تجيبي لون بنفسجي او ارجواني ممكن تستخدمي الكرنب الاحمر, الاخضر بالسبانخ, احمر مشرق بالبنجر, البرتقاني الهادي بقشر البصل, اصفر فاتح بقشر البرتقان, يعني حسب اللون اللي انتي عايزاه اختاري نوع الفاكهة او الخضار, والالوان دي ممكن تستخدميها للملابس ولتلوين الوش للاطفال مثلا انها امنة جدا, او لتلوين البيض.
14- فطائر بقشر الجزر:
ممكن بقشر الجزر تعملي فطائر سريعة, ضيفي قشر الجزر مع شوية دقيق واي نوع اعشاب تفضليها وبيض حطي كميات على حسب كمية قشر الجزر اللي عندك ضيفي الاضافات التانية لحد ما يبقى القوام معقول مش سميك ولا سايل اوي وخدي منه بكبشة او معلقة واقليه في الزيت على نار متوسطة.
15- قشر البطاطس للهالات السودا وانتفاخات العين:
باستخدام قشر البطاطس ممكن تتخلصي من الهالات السودا وانتفاخات العين بسهولة جدا وكمان بينعم ويرطب الجلد بسبب انزيم الكاتيكولاز الموجود فيه, حطي القشر على كل عين وسيبيه لمدة 10 دقايق يوميا هيخلصك من مشكلة الهالات والانتفاخات.
16- قشر التفاح والطماطم لتنقية المية:
اكتشف الباحثين ان قشر الطماطم والتفاح فيهم مادة ماصة فعالة لتنقية المية, انقعي قشر الطماطم والتفاح في الكحول لمدة يوم عشان تتخلصي من كائنات دقيقة فيهم وبعدين طلعيهم وسيبيهم ينشفوا كويس وبعدين حطي في طبق مية الحنفية العادية اللي عايزة تنقيها وانقعي فيها القشر لمدة ساعة وبعدين طلعيه, كده تبقى المية عندك نقية جدا وجاهزة للاستخدام للشرب او للاكل.
17- قشر البرتقان كمنظف للبيت:
قشر البرتقان مع الخل الابيض يعتبر منظف فعال جدا للبيت, انقعي القشر في الخل لمدة كام يوم لحد ما القشر يطرى, وبعدين طلعيه من الخل وارميه, وكده يبىقى المنظف جاهز عندك تقدري تستخدميه في التنضيف.
– ممكن يستخدم لتنضيف النوافذ حطيه في ازازة ببخاخ ورشي على النوافذ والمرايات وبعدين امسحيها بقماشة نضيفة, ممكن حتى تنضفي بيه ازاز النضارة.
– كمنظف ومطهر للحمام حطيه في ازازة ببخاخ ورشية على البلاط, قعدة التواليت, الدش, الحنفيات, هيساعد على تلميعهم وهيقتل اي جراثيم وبكتيريا موجودة.
– ممكن تنضفي بيه رخامات المطبخ, ولوح التقطيع.
– لتسليك البلاعة وصفاية الحوض, اخلطي خليط الخل مع كربوناتو وحطيه في البلاعة او في صفاية الحوض هيسلكها ويزيل اي حاجة سادة الانابيب عندك.
– منعم طبيعي للغسيل, صبي الخليط في الدرج الخاص بالمنعم في الغسالة مع دورة الغسيل بتاعتك, هينعم الهدوم ومن غير ما يسيب اي اثر لريحة خل عليها.
16 استخدام مفاجيء لغسول الفم مكنتيش تعرفيها قبل كده
