10 غلطات بتعمليهم مع العدسات ممكن تضر عينك
كتير من البنات بيحبوا يلبسوا لانسيز كتغيير وتجديد في اللوك, لكن ساعات كتير بنستخدمها غلط او بنعمل حاجات من غير ما ناخد بالنا ممكن تضر العين, والنهاردة هنقول لكل بنات حوا اللي بيحبوا لبس اللانسيز اكتر 10 غلطات بتعمليهم مع العدسات ممكن يضروا عينك عشان تتجنبيها وتحافظي على عيونك صحية.
غلطات بتعمليهم مع العدسات ممكن يضروا عينك:
1- بتلبسي العدسات فترة طويلة اوي:
لبس العدسات لفترة طويلة من الحاجات المضرة لصحة العين اللي ممكن تأدي لضعف النظر او كمان فقدان الرؤية لانها بتبقى مغطية قرنية العين اللي موجود فيها الاوعية الدموية اللي بتوصل الاكسجين للعين, وبتمنع الدموع انها توصل للقرنية وبالتالي ده بيمنعها من اداء مهمتها لتنضيف العين.
كمان لبس العدسات فترة طويلة ممكن يخلي القرنية معرضة للجراثيم بشكل اكبر, وبغض النظر عن نوع العدسات او ماركتها الافضل اننا منلبسهاش فترة طويلة اوي ونشيلها من وقت للتاني عشان نسمح للاكسجين انه يوصل للقرنية.
2- النوم بالعدسات:
النوم بالعدسات واحدة من الغلطات اللي بنعملها وممكن تسبب ضرر للعين, لان زي ما قولنا في النقطة اللي فاتت ان لبسها فترة طويلة بيمنع الاكسجين انه يوصل للقرنية وده ممكن يأدي لتهيج العين وهيخلي عينك مش مرتاحة وممكن يوصل لاصابة العين بعدوى خطيرة, وهنلاقي البنات اللي بيناموا بالعدسات هيقوموا الصبح هيحسوا بجفاف في العين والرؤية هتبقى مش واضحة.
والاخطر كمان ان العدسات ممكن تدخل في الجزء الخلفي من العين بسبب الحركة اثناء النوم, والنوم بالعدسات واحدة من اكتر اسباب الاصابة بالتهاب القرنية الميكروبي.
3- لبس العدسات في المية:
لبس العدسات في المية سواء حمام السباحة او في البانيو او تحت الدش من الاسباب من الحاجات اللي لازم تتجنبيها نهائيا, لان المية تعتبر ارض خصبة لانواع مختلفة من البكتيريا وغيرها من مسببات الامراض اللي ممكن تأدي لالتهاب العين وضرر شديد ممكن يوصل لفقدان الرؤية.
عشان كده لازم تشيليها قبل ما تتعرضي للمية باي شكل, كمان متخزنيش العدسات في المية لازم تستخدمي المحلول الملحي المعقم الخاص بيها بس.
4- استخدام مية الحنفية لتنضيف العدسات:
من الغلطات اللي ممكن نكون بنقع فيها هو تنضيف العدسات بمية الحنفية, لان مية الحنفية مش معقمة وممكن تنقل بكتيريا للعدسات وغيرها من مسببات الامراض اللي ممكن تتنقل لها, كمان المية ممكن تحتوي على الاميبا اللي ممكن تسبب نوع خطير من التهاب القرنية اللي ممكن يكون صعب علاجه, وممكن تسبب ضعف الرؤية.
عشان كده اتجنبي خالص غسلها بمية الحنفية واغسليها بالمحلول الملحي الخاص بالعدسات او بقطرة العين.
5- لبس العدسات بعد انتهاء فترة صلاحيتها:
العدسات زيها زي اي حاجة تانية ليها تاريخ انتهاء صلاحية, والعدسات القديمة او منتية الصلاحية تعتبر ارض خصبة للجراثيم, وكمان مع الاستخدام بيتراكم عليها البروتينات والبكتيريا اللي ممكن تضر العين وتأدي للعدوى.
عشان كده الافضل انك تتجنبي لبس العدسات القديمة منتهية الصلاحية عشان تحافظي على صحة عينك.
6- التعامل مع العدسات وايدك مش نضيفة:
احيانا ممكن تنسي تغسلي ايدك قبل ما تلبسي العدسات ودي من الحاجات اللي ممكن تنقل لها الجراثيم, عشان كده مهم جدا انك متنسيش تغسلي ايدك كويس جدا بالمية والصابون قبل ما تلمسي العدسات, كمان اتأكدي انك نشفتي ايدك كويس جدا قبل ما تلمسي العدسات لان الميكروبات اللي ممكن تسبب التهاب العين موجودة بردو في المية.
7- بتلبسي العدسات حتى لو ضرت عينك:
لو حسيتي او لاحظتي اي احمرار في العين او حكة او تورم او حرقان في العين لازم تشيلي العدسات فورا لان ده ممكن يضر العين ويسبب العدوى, ولو حصل اي ضرر يبقى اكيد في حاجة غلط في العدسات ممكن يكون فيها شوائب مثلا ومحتاجة تنضيف كويس.
8- مش بتعتني بالعدسات والحافظة بتاعتها بشكل كافي:
العدسات والحافظة بتاعتها محتاجين عناية كافية عشان متضرش عينك, يعني نضفي العدسات كويس جدا بالمحلول الملحي بتاعها, اغسلي ايدك قبل ما تلمسي العدسات زي ما قولنا, احفظيها في الحافظة بتاعتها مع محلول جديد بعد ما تلبسيها كل مرة, عقمي الحافظة عشان تمنعي نمو اي بكتيريا فيها ممكن تتنقل للعدسات نضفيها باستمرار بالمحلول الملحي الخاص بالعدسات وامسحيها بفوطة نضيفة من غير وبر او سيبيها تنشف في الهوا قبل استخدامها تاني, المفروض تغيري الحافظة كل 3 شهور على الاقل.
9- خلط المحلول الجديد مع القديم:
ده من الاخطاء من اللي كتير بيقعوا فيه اننا نحط محلول جديد في الحافظة على اللي موجود فيها وده غلط لان هيخلي المحلول يفقد فعاليتة وده اكيد هيزود فرصة تطور عدوى العين.
عشان كده الافضل انك تستبدلي المحلول القديم بجديد, وكمان تغسلي الحافظة بشوية محلول ونشفيها بمنديل وبعدين حطي الجديد.
10- اهمال فحص العين:
سواء كنتي بتلبسي عدسات عادية او نظر او حتى نضارات لازم تعملي فحص للعين كل فترة, او لو بتحسي بتعب في العين حتى لو بسيط لازم تروحي تكشفي عليها لان اي مشاكل بيكون اسهل علاجها في البداية قبل ما تتطور ويبقى صعب علاجها.
عشان كده لو بتعاني من اي احمرار او حرقان او الم او عدم وضوح الرؤية وخصوصا بعد استخدام العدسات متتجاهليش ده وروحي فورا للدكتور, ومهم عشان تحافظي على صحة عينك انك تغيري نوع اللانسيز بتاعك بانتظام للنوع الاحدث.
نصايح اضافية:
1- حطي دايما المكياج بتاعك بعد ما تحطي العدسات.
2- اتجنبي استخدام مزيل مكياج العيون او حتى منظف الوش وانتي حاطه العدسات.
3- اتجنبي لبس العدسات لو حاسه باي الم في العين.
4- متفركيش عينك وانتي لابسة العدسات.
5- اشتري العدسات من مصدر موثوق.
6- متشاركيش العدسات بتاعتك مع حد.
7- حطي دايما الحافظة في شنطتك وانتي خارجة عشان لو اضطريتي انك تقلعيها بره لاي سبب.
ازاي تخلي عيونك اجمل واحلى طبيعيا
