7 حاجات ماينفعش تعمليهم لو لسه خارجة من علاقة او ارتباط

اما بتبقى لسه خارجة من خارجة من علاقة او ارتباط بتبقى حاسة انك ضعيفة و سهل تتكسرى، و قلبك بيوجعك ومش عارفه هتعملى ايه فى حياتك ولا هتكملى ازاى، ورغم انه اى صورة للحزن والزعل ممكن تكون مفهومة ومقبولة الا الحاجات الجاية دى ، فى المقال ده بنات حوا هتقولك على 7 حاجات ماينفعش تعمليهم لو لسه خارجة من علاقة او ارتباط علشان تساعدى نفسك تتخطى المرحلة الصعبة دى اسرع وتخرجى منها اقوى ..

7 حاجات ماينفعش تعمليهم لو لسه خارجة من علاقة او ارتباط

1- ماتقضليش طول الوقت تتكلمى عنه : 

اول حاجة بتتقالنا فى المواقف اللى زى دى ” هى اتكملى ، وفضضى الكلام بيريح” والحقيقة انه ده ممكن يكون نصيحة عظيمة جدا فى الاول، لكن لازم تعرفى امتى تبطلى تتكلمى عنه لانه الكلام الكتير عنه هيفضل طول الوقت يفكرك بيه وهيصعب عليكى انك تنسيه ، لكن لو بطلتى تتكلمى عنه تدريجيا هتبطلى كمان تفكرى فيه.

2- خدى وقتك قبل ما تدخلى فى ارتباط جديد : 

لما بنبقى لسه  خارجين من علاقة او ارتباط بنبقى عايزين نرتبط بأول حد يقابلنا لكن للاسباب الغلط ، مش صح انك ترتبطى بحد وانتى لسه خارجة من ارتباط فاشل علشان تثبتى لنفسك انك قوية او تبينى للـ EX بتاعك انك نسيتيه خلاص، ضرورى تاخدى وقتك قبل ما تدخلى فى علاقة او ارتباط جديد.

3- ماتعزليش نفسك : 

رغم اننا بعد اى break up بنميل لاننا نعزل نفسنا وماننزلش من البيت و نفضل نعيط قدام التليفزيون ، لكن ده مش صح ابدا . العزلة دى هترجعك لورا وتخلى صعب عليكى انك تتخطى الفترة الصعبة دى. حاولى تشغلى نفسك بأى رياضة تكونى بتحبيها او بالقراية وكمان مهم تنزلى تتمشى وتشوفى اصحابك. ماينفعش ابدا تعزلى نفسك.

4- ماتسترجعيش الكلام اللى بيضايقك : 

فى الخناقات مع الطرف التانى بنقول وبنسمع كلام بيجرحنا وبيبقى صعب جدا علينا، حاولى  ماتفضليش تسترجعى الكلام ده فى عقلك كل شوية وحاولى تنسيه خالص وتقفلى عليه علشان ماتفضليش توجعى نفسك بيه كل شوية.

5- مفيش حاجة اسمها “نفضل اصحاب” : 

ودى اسوا حاجة فى اى break up ، بعد ما تنفصلى عنه مفيش حاجة اسمها نفضل اصحاب او نرجع اصحاب تانى ، هو خلاص دوره فى حياتك انتهى ولازم يخرج منها بشكل كامل.

6- ماتفضليش تتابعيه على السوشال ميديا : 

فى سبب للمثل المعروف ” البعيد عن العين ، بعيد عن القلب” ماينفعش خالص انك تفضلى تتابعيه على السوشال ميديا وتشوفى كل اخباره وصوره و تقعدى تقرى الـ conversations اللى كانت بينك وبينه، اول حاجة لازم تعمليها بعد ما تنفصلوا هى انك تشيليه من عندك خالص و تمسحى كل الرسايل اللى كانت بينكم.

7- ماتشغليش نفسك بشريكته الجديدة:

لو ارتبط بعدك ماتشغليش نفسك بشريكته الجديدة، بالعكس خليها اخر همك وحاولى ماتحطيش نفسك معاها فى مقارنات.. ابعدى عنه تماما وسيبيه يعيش حياته زى ما يحب وانتى كمان لازم تعيشي حياتك وماتشغليش نفسك بـ ” هى احلى منى فى ايه ” او ” فيها ايه يعنى مش فيا” . انتى حكايتك معاه خلاص انتهت ولازم تبداى تشغلى نفسك بحياتك وبس.