14 وصفة طبيعية لتكبير ونفخ الشفايف
اكيد كل بنت بتحلم بشفايف ممتلئة وشكلها جذاب وعشان توصلي لده اكيد مش لازم تعمليها في مركز تجميل لانه ممكن تكون تكلفتها عالية ده غير انها مش دايما بتكون مضمونة, عشان كده النهاردة جايبين لكل بنات حوا وصفات طبيعية لتكبير ونفخ الشفايف بمكونات بسيطة ومتوفرة في كل بيت.
وصفات طبيعية لتكبير ونفخ الشفايف:
1- الوصفة (1):
المكونات:
- زبدة كاكاو.
½ معلقة صغيرة زيت قرفة او قرفة مطحونة.
½ معلقة صغيرة زيت قرنفل.
½ معلقة صغيرة شطة.
الطريقة:
اول حاجة هنجيب طبق نملاه مية لحد نصه ونحطها على النار ونخليها تغلي وبعدين في طبق تاني هنحط زبدة الكاكاو ونسيحها في حمام مية سخنة لحد ما تبقى سايلة وبعدين نضيف لها الشطة وزيت القرفة وزيت القرنفل ونقلب المكونات كويس مع بعض, وبعدين نصب الخلط في انبوبة زبدة الكاكاو الفاضية اللي عندنا او في اي علبة صغيرة, سيبيها تبرد وتتجمد في الهوا او حطيها في التلاجة لحد ما تتجمد, وبعدين استخدميها مرة واحدة في اليوم.
ممكن تحسي بوغزة خفيفة على الشفايف لما تستخدمي الوصفة ده طبيعي متقلقيش, وبعد استخدام الخلطة وغسلها من على الشفايف حطي زبدة كاكاو عادية عشان ترطبي شفايفك بعد الخلطة, وممكن تقللي كمية الشطة لو بشرتك حساسة اوي.
2- الوصفة (2):
المكونات:
معلقة كبيرة زيت زيتون.
معلقة صغيرة قرفة مطحونة.
معلقة كبيرة سكر او ملح.
الطريقة:
في طبق اخلطي القرفة مع زيت الزيتون وبعدين ضيفي لهم السكر او الملح, قلبي المكونات مع بعض كويس, والمفروض الخليط يبقى سميك شوية مش سائل, حطي الخليط على الشفايف من 5 – 10 دقايق مع تدليك خفيف للشفايف بصوابعك وعدبها اغسلي شفايفك بالمية.
3- الوصفة (3):
المكونات:
½ معلقة صغيرة زيت قرفة او قرفة مطحونة.
اي نوع زبدة كاكاو مفضلة ليكي.
الطريقة:
اقطعي جزء من زبدة الكاكاو اللي تكفيكي مرة واحدة يعني ممكن معلقة صغيرة, حطيها في طبق وضيفي عليها زيت القرفة وقلبيهم مع بعض لحد ما يمتزجوا كويس, حطي الخليط على الشفايف ودلكيه بصوابعك وبعدين امسحية بمنديل وحطي على شفايفك زبدة كاكاو للترطيب.
4- الوصفة (4):
المكونات:
1/3 معلقة صغيرة جنزبيل مطحون.
½ معلقة صغيرة شطة.
1/3 معلقة صغيرة زيت قرفة او قرفة مطحونة.
نقطة زيت نعناع.
1 معلقة صغيرة زيت زيتون او زيت لوز حلو او اي نوع زيت تفضلوه.
الطريقة:
في طبق صغير اخلطي الجنزبيل مع الشطة و القرفة وزيت النعناع قلبيهم وبعدين ضيفي زيت الزيتون قلبي الخليط ده وامزجي كل المكونات كويس مع بعض, خدي شوية من الخليط وحطيه على الشفايف ودلكيها بصوابعك لمدة 20 ثانية وبعدين سيبيها من 2 – 3 دقايق وبعدين امسحيها.
5- الوصفة (5):
المكونات:
1 معلقة صغيرة قرفة مطحونة او زيت قرفة.
فازلين.
فرشة اسنان.
الطريقة:
خدي كمية صغيرة من الفازلين وضيفي عليه القرفة المطحونة او زيت القرفة واخلطيهم كويس مع بعض, ادهني شفايفك بالخليط وبفرشة السنان دلكي الشفايف في حركات دائرية وبعدين سيبيه من 1 – 2 دقيقة وبعدين امسحيه بمنديل او اغسليه بالمية, وممكن تدهني شفايفك فازلين بعد الخلطة لو حسيتي انها محتاجة ترطيب.
6- الوصفة (6):
المكونات:
سكر.
زيت زيتون.
فرشة اسنان.
الطريقة:
اخلطي زيت الزيتون والسكر لحد ما يبقى الخليط عندك سميك شوية, بلي شفايفك بالمية وخدي من الخليط بفرشة السنان ودلكي شفايفك في حركات دائرية بالراحة لمدة دقايق وبعدين اغسليها بالمية.
7- الوصفة (7):
المكونات:
اي نوع ليب جلوس “ملمع شفايف”.
من 3 – 6 نقط زيت نعناع.
كمية بسيطة جدا شطة.
الطريقة:
هاتي الليب جلوس وضيفي عليه زيت النعناع والشطة, اخلطيهم كويس مع بعض وحطي الخليط على شفايفك, والميزة في الطريقة دي انك ممكن تحطيها في اي وقت تخلي الليب جلوس معاكي في الشنطة وتحطي منه اي وقت.
8- الوصفة (8):
المكونات:
من 3 – 4 اعواد قرفة خشب.
زيت زيتون.
الطريقة:
هاتي برطمان صغير حطي فيه اعواد القرفة واملي البرطمان بزيت الزيتون لحد ما الزيت يغطي القرفة, اقفلي البرطمان وسيبيه لمدة من اسبوع لاسبوعين, هتلاقي لون الزيت بتاعك اتغير وبقى بني غامق كده يبقى جاهز للاستخدام, ادهني شفايفك بالزيت وسيبيه شوية وبعدين امسحيه, خليط الزيت ده ممكن يقعد عندك حوالي من شهر لشهرين.
9- الوصفة (9):
المكونات:
1 معلقة صغيرة شمع العسل.
5 معالق صغيرة زيت زيتون.
½ معلقة صغيرة زيت قرفة.
الطريقة:
اخلطي شمع العسل مع زيت الزيتون وسيحيهم مع بعض في حمام مية لحد ما الشمع يسيح وبعدين ضيفي لهم زيت القرفة, قلبي كل المكونات كويس مع بعض, وبعدين صبي الخليط في اي علبة صغيرة عندك, سيبيها لحد ما تبرد خالص وبعدين استخدميها ادهني بيها شفايفك.
10- الوصفة (10):
المكونات:
زيت زيتون.
كمية بسيطة شطة.
الطريقة:
اخلطي زيت الزيتون مع الشطة, وادهني شفايفك بالخليط وسيبيه دقايق وبعدين امسحيه او اغسليه بالمية.
11- الوصفة (11):
المكونات:
1 معلقة صغيرة زبدة كاكاو.
1 معلقة صغيرة زيت زيتون او زيت لوز حلو.
من 5 – 8 نقط زيت قرفة.
الطريقة:
سيحي زبدة الكاكاو وضيفي عليها زيت الزيتون او زيت اللوز وزيت القرفة, قلبي المكونات كويس واحتفظي بيهم في علبة صغيرة للاستخدام, ادهني بيها شفايفك وممكن تسيبيها عادي على الشفايف او تمسحيها بعد دقيقة.
12- الوصفة (12):
المكونات:
اي لون روج عندك.
فازلين او زبدة كاكاو.
زيت لوز حلو.
زيت قرفة.
الطريقة:
هاتي طبق حطي فيه كمية صغيرة من الفازلين, اقطعي ¼ صوباع الروج وضيفيه للفازلين ودخليه الميكروويف لمدة 30 ثانية لحد ما يسيحوا او ممكن تسيحيه على النار من فوق وقلبيهم, ضيفي عليهم زيت القرفة وزيت اللوز وقلبي المكونات كلها وامزجيهم كويس مع بعض, وبعدين صبي الخليط في اي علبة صغيرة وسيبيه لحد ما يبرد ويتجمد واستخدميه على شفايفك, الميزة في الطريقة دي انها هتدي كمان لون للشفايف حسب لون الروج اللي انتي تختاريه.
13- الوصفة (13):
المكونات:
1 معلقة صغيرة زيت جوز الهند.
½ معلقة صغيرة شمع العسل.
2 معلقة صغيرة زيت زيتون او زيت لوز حلو.
1 معلقة صغيرة عسل نحل.
من 2 – 3 معالق زيت قرفة.
الطريقة:
حطي زيت جوز الهند وشمع العسل في طبق وسيحيهم على حمام مية سخنة قلبيهم لحد ما يسيحوا خالص مع بعض, ضيفي لهم زيت الزيتون او زيت اللوز وزيت القرفة والعسل قلبي المكونات كلها وصبيها في اي علبة فاضية وسيبيها تبرد وتتجمد في الهوا او حطيها في التلاجة, واستخدميها على شفايفك اي وقت الخلطة دي كمان بترطب الشفايف جدا وبتديها لمعة.
الوصفة (14):
المكونات:
2 معلقة صغيرة شمع العسل.
2 معلقة صغيرة زيت جوز الهند.
2 معلقة صغيرة زيت لوز حلو.
نقطتين زيت اليانسون.
الطريقة:
حطي زيت جوز الهند وشمع العسل في طبق وسيحيهم في الميكروويف لمدة 20 ثانية او سيحيهم على حمام مية سخنة بعد ما يسيحوا كويس ضيفي لهم زيت اللوز الحلو وزيت اليانسون, وقلبيهم وامزجي المكونات كويس مع بعض, صبي الخليط في علبة فاضية وسيبيه لحد ما يبرد واستخدميه.
مع كل الوصفات نجربها الاول على جزء صغير من الشفايف عشان نتأكد انها مش حساسة, ولو مظهرش اي حساسية بس بعد ما حطيتي حسيتي انها مسببة لك عاملة وخزة زيادة عن اللزوم على شفايفك امسحيها فورا وحطي على الشفايف اي نوع زيت “زيت جوز هند, زيت زيتون, زيت لوز” متستخدميش عليها مية قبل الزيت, وبعد ما تدهني الزيت مرري عليها مكعب تلج عشان تهدي المنطقة.
تفتيح الشفايف الغامقة بوصفات طبيعية من مطبخك
