8 تركيبات اكل لو اكلتيهم مع بعض هتساعدك على خسارة الوزن .. و 6 لازم تتجنبيهم
التنويع في الاكل او الجمع بين الاكلات مش بس تعتبر مجرد وجبة لذيذة لكن ممكن تساعد كمان على خسارة الوزن بطريقة صحية جدا, وكتير من الدراسات اثبتت ان الجمع بين اكلات معينة بيحسن عملية الهضم, وبيدي جسمك طاقة زيادة, وبيساعد على خسارة الوزن, والنهاردة في موضوعنا هنقولكم على 8 تركيبات اكل هتساعدك على خسارة الوزن بطريقة صحية جدا, وكمان 6 انواع اكل الافضل انك تتجنبيهم.
– تركيبات اكل هتساعدك على خسارة الوزن:
1- الخضار + البيض المسلوق:
اثبتت الدراسات ان البيض بيساعد على امتصاص الكاروتينات “الاصباغ اللي بتدي اللون للخضروات” والكاروتينات مش بس بتساعد على خسارة الوزن لكن كمان بتحمي من فقدان البصر والسرطان وبتساعد على تغذية البشرة, عشان كده المره الجاية لما تيجي تاكلي السلطة ضيفي لها بيضة مسلوقة هتفرق معاكي جدا.
2- التونة + الزنجبيل:
الزنجبيل بيسرع عملية تفريغ المعدة وكتل الانزيمات اللي ممكن تسبب التهابات, والتونة بتحتوي على الاوميجا 3 اللي بتمنع تخزين الدهون في منطقة البطن, عشان كده الجمع ما بين التونة والزنجبيل هيكون افضل اختيار عشان تتخلصي من الدهون الزيادة في منطقة البطن بشكل خاص.
3- السبانخ + زيت الافوكادو:
الجمع ما بين السبانخ وزيت الافوكادو تعتبر من افضل التركيبات لسد الشهية او السيطرة عليها, زيت الافوكادو كمان بيحسن مستويات الكوليسترول وبيحتوي على فيتاميات اي وبي وعلى البوتاسيوم, والسبانخ بتدي شعور بالشبع وفي نفس الوقت هي منخفضة السعرات الحرارية جدا.
4- الذرة + البقوليات:
الدراسات اثبتت ان النظام الغذائي المعتمد على البقوليات مرة واحدة في الاسبوع من اكتر الانظمة الفعالة لخسارة الوزن واضافة الذرة للبقوليات بيزود من تاثير التخسيس وبيساعد على خسارة الوزن بشكل اكبر لانه بيحتوي على نشا قوي اللي بيخلي الجسم ميمتصش معظم السعرات الحرارية والجلوكوز.
5- الشمام + العنب الاحمر:
الشمام يعتبر مدر طبيعي للبول وبيساعد على منع احتباس البول, والعنب بيحتوي على مضادات الاكسدة اللي بتساعد على تقليل تراكم الدهون, عشان كده الشمام والعنب الاحمر يعتبروا تركيبة مثالية جدا لمنع احتباس المية اللي ممكن تسبب انتفاخ وزيادة في الوزن.
6- الدجاج + الشطة:
الدجاج غني بالبروتينات وبيساعدك انك تفضلي حاسة بالشبع فترة طويلة وبالتالي جسمك هيكتسب عدد سعرات حرارية اقل لما تيجي تاكلي تاني, والشطة بتساعد على تسريع حرق الدهون وسد الشهية عشان كده ضيفي الشطة لتتبيلة الفراخ عشان تزودي من تأثيرها لخسارة الوزن.
7- البطاطس + الفلفل الاسود:
وفقا للدراسات ان البطاطس بتدي شعور بالشبع اكتر من الحبوب الكاملة وكمان غنية بالبوتاسيوم, لو عايزة تخسري وزنك كلي البطاطس مسلوقة او مشوية من غير اضافة زبدة او اي دهون ليها, او رشي عليها فلفل اسود لانه بيساعد على منع تشكيل خلايا دهنية جديدة.
8- القهوة + القرفة:
القرفة بتحتوي على مضادات الاكسدة القوية اللي بتقلل من دهون البطن, والقهوة بتقلل الشهية, فلو عايزة تخسري وزن بطريقة بسيطة ابدأي يومك بشرب فنجان قهوة مضاف ليها القرفة كل يوم.
– 6 تركيبات اكل تجنبيهم:
بعد ما قولنا تركيبات الاكل اللي ممكن تساعدك على خسارة الوزن هنقولك على 6 تركيبات الافضل انك تتجنبيهم:
1- اتجنبي اكل البروتينات والكربوهيدرات مع بعض, على سبيل المثال الهامبورجر.
2- اكل نوعين مختلفين من البروتينات, زي مثلا اللحوم اللي فيها دهون مع البيض.
3- البروتينات والنشويات مع بعض, زي الفراخ مع المكرونة.
4- اكل النشا والسكر مع بعض, زي البطاطس والكاتشب.
5- السكريات والدهون, زي الايس كريم والمخبوزات.
6- الفواكه مع انواع اكلات تانية, زي مثلا الفراولة مع الايس كريم.
كل الحاجات دي اكلها مع بعض ممكن يسبب زيادة في الوزن, عشان كده لو انتي عايزة تخسري وزن اتجنبي اكل التركيبات دي مع بعض.