7 عادات في لغة الجسد بيعملهم الاشخاص الناجحين .. اعرفيهم معانا

الجسم ليه اللغة الخاصة بيه واحيانا لغة الجسد بتتكلم بصوت اعلى من الكلمات, والدراسات اثبتت ان الاشخاص اللي بيعرفوا بيستخدموا لغة الجسد في التعبير بطريقة فعالة عندهم مستويات اعلى من الذكاء العاطفي, والنهاردة هنقولكم على اكتر عادات في لغة الجسد بيعملهم الاشخاص الناجحين.

عادات في لغة الجسد بيعملهم الاشخاص الناجحين:

1- الجلوس بشكل مستقيم:

القعدة على الكرسي بطريقة مسترخية اوي وتكوني ساندة بكوعك على الترابيزة قدامك ومغطية وشك بايدك دي كلها علامات لعدم احترام اللي قدامك وانك مش مهتمة باللي بتسمعيه, لكن العكس لو قعدة بشكل مستقيم وضهرك مفرود والكتفين مشدودين هتباني عندك ثقة اكتر في نفسك, وافتكري دايما كل ما كان جسمك مفرود ومشدود ده دليل نجاحك وثقتك بنفسك لكن الجسم المسترخي دليل على عدم الثقة في النفس.

2- استخدام الايماءات بشكل صحيح:

لو بتعملي ايماءات وحركات زيادة عن اللزوم ده ممكن يدي انطباع للي قدامك انك ممكن تكوني بتكذبي وبتحاولي تداري كذبك بحركات وايماءات كتير او انك بتحاولي تخبي حاجة معينة, والايماءات المفتوحة زي الاشارة بالذراعين بعيد ده دليل انك ممكن تكوني بتخبي حاجة.

3- فتح الذراعين:

لما تربعي ايدك وانتي بتكلمي حد دي اشارة واضحة جدا انك مش متقبلة كلامة او مش متفقة معاه حتى لو مبتسمة وانتي بتسمعيه لكن لغة جسدك عبرت عن شعورك الحقيقي, عشان كده انك تربعي ايدك او تعملي رجلك كروس وانتي قعدة مش من العادات الكويسة في لغة الجسد.

4- متلمسيش شعرك:

لو انتي من الاشخاص اللي دايما يلمسوا شعرهم او بيلعبوا فيه او كل شوية تقعدي تظبطي فيه يبقى لازم تتخلصي من العادة دي لانها دليل علة عدم احساسك بالامان او عدم الاهتمام بالحديث اللي بيتقال, عشان كده وقفي العادة دي وحاولي انك تركزي على التواصل مع اللي قدامك بشكل طبيعي.

5- الابتسامة:

على الرغم ان الابتسامة طول الوقت مش بتدعم فكرة ان ليكي شخصية قوية, لكن الابتسامة مطلوبة في المكان المناسب وفي الوقت المناسب لان ده دليل على السيطرة على الوضع حواليكي وانك تقدري تحافظي على هدوئك مهما كانت الظروف اللي بتمري بيها.

6- اتصال العين:

التواصل بالعين من اهم الحاجات في لغة الجسد, التركيز زيادة عن اللزوم في عين الشخص اللي بيكلمك ممكن يقلق اللي قدامك او يخوفه منك ويوصله انك عايزة تلقطي كل ايماءاته وكلماته لانك حاسه بعدم امان من ناحيته, لكن في نفس الوقت تجنب التواصل بالعين هيبعت رسالة للي قدامك انك ممكن يكون عندك حاجة بتخبيها, عشان كده حاولي ان يكون تواصل العين بشكل طبيعي يعني ولا التركيز اوي ولا تجنبها خالص واستخدمي التوقفات او ابعديها من فترة للتانية عشان توصلي الرسالة الصحيحة للي قدامك.

7- السلام بالايد:

لما تسلمي على اللي قدامك ميبقاش السلام ضعيف اوي ولا قوي اوي في نفس الوقت, لكن يكون سلام بشكل معتدل يعني لو شخص مد ايده للسلام اتأكدي ان ايدك ثابتة وسلمي بشكل فوري لان ده هيدي احساس للي قدامك انك عندك ثقة في نفسك وحاسه بالامان من ناحيته.

9 خدع نفسية هتخليكي شخصية جذابة جدا