5 وصفات ماسكات للبشرة من بودرة الشاى الاخضر هتبينك أصغر من سنك الحقيقي بكتير

بقلمآية حسان فيبشرة visibility4278

فى المقال ده بنات حوا هتعرفك على 5 وصفات ماسكات للبشرة  من بودرة الشاى الاخضر كلها بتعتمد على الشاى الاخضر الناعم بشكل اساسي وده لانه الشاى الاخضر معروف بفوايده الكتيرة للجسم بشكل عام ولصحة جمال البشرة تحديدا لانه بيحتوى على مركبات زى الـ chlorophyll و الـلى بيعتبر من اقوى المركبات المضادة للأكسدة واللى كمان بتتخلص من السموم وبتحافظ على الخلايا من الضرر و كمان الشاى الاخضر بيقاوم التجاعيد وعلامات التقدم فى السن وخطوط البشرة.

بودرة الشاى الاخضر كمان لما بتتحط على البشرة بتحسن من الدورة الدموية للجلد و بتفتح البشرة و بتعبتر مضاد لحبوب الشباب لانها بتقلل من الالتهابات و بتقاوم البكتيريا.

ودلوقتى اعرفى معانا يلا ازاى تستخدمى بودرة الشاى الاخضر فى وصفات هتبينك أصغر من سنك الحقيقي بكتير ..

5 وصفات ماسكات للبشرة  من بودرة الشاى الاخضر هتبينك أصغر من سنك الحقيقي بكتير ..

1- ماسك بودرة الشاى الاخضر والالوفيرا للبشرة الدهنية:

الوصفة دى بتعبتر مثالية للبشرة الدهنية والعادية وكمان البشرة المختلطة وبتنعم البشرة لانها بتحتوى على الالوفيرا ، فى الوصفة دى هنستخدم جل الصبار او الالوفيرا الفريش لكن ممكن تستخدمى الجاهز اللى بتشتريه من الصيدلية وهيطلع نفس النتيجة.

المكونات اللى هتحتاجيها:

معلقة شاى من مسحوق الشاى الاخضر.

معلقتين اكل من الالوفيرا.

طريقة التحضير: 

اخلطى بودرة الشاى الاخضر مع الالوفيرا فى بولة او طبق صغيرة لحد ما يكونوا خليط يشبه العجينة، ممكن تحتاجى تقللى الالوفيرا او تزوديها حسب قوام العجينة علشان يبقى مظبوط. افردى الخليط ده على وشك وسيبيه حوالى 15 دقيقة و بعد مرور الوقت اشطفى وشك بمية دافية.

2- ماسك الافوكادو و بودرة الشاى الاخضر للتفتيح:

 الماسك ده مفيد لبشرتك ولجسمك كمان، لانه بودرة الشاى الاخضر بتنقى الجسم من السموم و العسل الابيض والافوكادو بيمدوا البشرة بالفيتامينات وكمان بيوفرولها الترطيب اللى بتحتاجه، ممكن كمان تضيفى كمية السكر البنى اللى فى الوصفة دى بتخليكى تقدرى تستخدميها فى تقشير البشرة. او ممكن تستغنى عن السكر وتستخدميها ماسك عادى.

المكونات اللى هتحتاجيها:

معلقة اكل من بودرة الشاى الاخضر.

ربع ثمرة افوكادو مهروسة.

3 معالق اكل من السكر البنى.

معلقة اكل من العسل الابيض.

طريقة التحضير: 

امزجى كل المكونات فى بولة واخلطيهم مع بعضكويس وافردى طبقة من الخليط ده على وشك او اى جزء من الجسم و افركى بلطف زى استخدام السكرب العادى فى حركة دائرية بأطراف صوابعك بس بعيد عن محيط عينيكى. وبعد كده سيبيه على بشرتك حوالى 10 دقايق وبعد مرور الوقت امسحى وشك بقطعة قماش قطنية مبللة بمية دافية.

3- ماسك بودرة الشاى الاخضر والكركم والموز لمقاومة التجاعيد : 

الكركم وبودرة الشاى الاخضر بيعتبروا من المواد اللى بتقاوم علامات تقدم سن البشرة و كمان بتعتبر مضاد جيد للالتهابات وزيت الزيتون بيعتبر من المواد اللى بتوفر الترطيب للبشرة و بيخلى البشرة مشدودة وناعمة و بيخليها متألقة ، والموز بيمدها بالمعادن والفيتامينات.

المكونات اللى هتحتاجيها:

ثمرة ونص من الموز المهروس.

نص معلقة شاى من الكركم.

نص معلقة شاى من بودرة الشاى الاخضر.

معلقة شاى من زيت الزيتون.

طريقة التحضير: 

امزجى الموز المهروس مع الكركم و بودرة الشاى الاخضر و زيت الزيتون مع بعض كويس فى بولة او طبق صغير وبعد كده افرديه على وشك 10 دقايق . وبعد مرور الوقت اشطفى وشك بمية دافية وجففيه بفوطة قطنية ناعمة بطريقة الطبطبة.

بعد اول استخدام للوصفة دى هتحسى ان بشرتك ناعمة و رطبة و منورة بشكل كبير.

4- ماسك بودرة الشاى الاخضر وزيت جوز الهند  ومية الورد للترطيب : 

الماسك ده من ماسكات للبشرة من بودرة الشاى الاخضر مش بس مرطب قوى لكن كمان بيعتبر مضاد قوى للالتهابات و البكتيريا.

المكونات اللى هتحتاجيها:

معلقتين من بودرة الشاى الاخضر.

نص معلقة من زيت جوز الهند.

مية ورد لخلط المكونات.

طريقة التحضير: 

حطى المكونات مع بعضها مع نقط بسيطة من مية الورد وافضلى اخلطيهم لحد ماتكونى خليط يشبه العجينة فى قوامه ويبقى سهل انك تفرديه على وشك، سيبيه على وشك لمدة 20 دقيقة وبعد كده امسحى وشك بقطعة قماش نضيفة مبلولة او فوطة مبلولة. بعد الماسك ده هتلاحظى انه وشك نضيف ومنور وكمان مترطب كويس وريحته حلوة .

5- ماسك التقشير ومضاد الالتهاب : 

اخر طريقة معانا من ماسكات للبشرة من بودرة الشاى الاخضر هو ماسك التقشير ومضاد الالتهابات ، الماسك او السكرب ده كمان بيرطب وينقى البشرة، وكمان بيعزز من مستويات الكولاجين فى البشرة بسبب النسب العالبة من مادة الـpolyphenolsl الموجودة فى الشاى الاخضر وده بيخلى بشرتك صحية اكتر وكمان مشدودة من غير خطوط او تجاعيد.

المكونات اللى هتحتاجيها:

حوالى 3/1 كوباية من زيت جوز الهند.

كوباية من السكر البنى

معلقة اكل من بودرة الشاى الاخضر الاورجانيك.

معلقة شاى من العسل الابيض.

طريقة التحضير: 

امزجى السكر مع بودرة الشاى الاخضر وبعد كده ضيفى العسل وزيت جوز الهند و قلبيهم كويس لحد ما يتخلطوا مع بعض تماما، وبعد ماتكونى غسلتى بشرتك او بعد الشاور مثلا اعملى السكرب ده لوشك وبعد كده اشطفيه. ممكن تستخدمى السكرب ده كل يومين مثلا وممكن تحطى باقى السكرب فى علبة او برطمان ازاز و تحتفظى بيه فى الحمام لحد اسبوعين.

اعرفى معانا كمان وصفات للبشرة من الشاى الاخضر !