لو جوزك بيعمل ال15 حاجة دول .. يبقى افضل زوج على الاطلاق

ريهام محمود

في

85847

الحياة الزوجية اكيد نجاحها بيعتمد على حاجات كتير جدا, لكن مع مرور الوقت احيانا بنهمل تفاصيل وحاجات صغيرة ورغم بساطتها الا انها مؤثرة جدا في انها تحافظ على حياة زوجية سعيدة, والنهاردة هنعرف مع بعض حاجات لو جوزك بيعملها يبقى افضل زوج على الاطلاق.

ومن ناحيتك لازم يكون في ملاحظة وتقدير للحاجات البسيطة دي, وانك تركزي على مميزاته واللي بيعمله عشانك بدل ما تركزي على العيوب, لان الزوج هو اكتر شخص مهم في حياتك ولازم تقدري كل اللي بيعمله عشانك وتشكريه عليها.

حاجات لو جوزك بيعملها يبقى افضل زوج:

1- بيثق فيكي:

الثقة مهمة جدا بين الزوجين, والزوج الشكاك اكيد من اسوأ انواع الازواج اللي بيشك في كل كلمة وكل فعل انتي بتعمليه, عشان كده ثقة الزوج تعتبر من اهم المميزات اللي هتحافظ على حياة زوجية سعيدة.

2- واضح وصريح معاكي:

انه يكون واضح وصريح معاكي يعني مش بيخبي عليكي اي حاجة في حياتة, بيحكي لك كل حاجة وبتبقي عارفة بيعمل ايه وعارفة كل خططه واللي بيفكر فيه وبيشاركك كل حاجة.

3- عارف ذوقك:

الزوج المثالي بيكون عارف ذوقك وبتحبي ايه وبتكرهي ايه حتى في ابسط الحاجات زي نوع الشوكولاتة اللي بتحبيه, نوع الافلام اللي بتحبي تشوفيها وهواياتك, يعني عارف كل حاجة انتي بتحبيها وبيعملها من غير ما تطلبي منه.

4- بيديكي وقت لنفسك:

بيديكي وقت لنفسك تعملي الحاجة اللي انتي بتحبيها, يعني مثلا تخرجي مع اصحابك, تشوفي فيلم بتحبيه لوحدك, تمارسي هواية ليكي, يعني بيسيب لك مساحة حرية تعملي اللي انتي عايزاه من غيره.

5- بيفتكر الاجازات:

دايما بيفتكر الاجازات ومش بس بيفتكرها هو بيخطط انكم تستمتعوا بيها, يعني ممكن تخرجوا مع بعض او تسافروا لمكان المهم هيكون حريص جدا انه يبسطك في الاجازة.

6- بيساعدك تكوني افضل:

هيساعدك تكوني احسن ودايما هيشجعك توصلي للي انتي عايزاه, ويديكي دايما طاقة ايجابية ويساعدك انك تثقي في نفسك اكتر.

7- هيضحك على نكتك:

هيضحك على نكتك حتى لو مش مضحكة! يمكن تشوفوا النقطة دي بسيطة اوي لكن هي من الحاجات المؤثرة لانه مش هيحسسك انك سخيفة او دمك تقيل مثلا وده هيخليكي تحكي له اي حاجة من غير ما تكوني خايفة انه ميتفاعلش معاكي او تتحرجي لان مهم جدا ان الطرفين يكونوا على طبيعتهم اوي مع بعض حتى لو في الحاجات الصغيرة والبسيطة.

8- بيصدقك:

ودي مكملة لنقطة الثقة انه يكون عارف كويس جدا انك صادقة معاه في كل حاجة بتقوليها او بتعمليها.

9- بيضحك معاكي:

يخليكي تضحكي ويضحك معاكي, الزوج المرح من اكتر الحاجات اللي ممكن تخلي الحياة الزوجية سعيدة, يعني يضحكك دايما ويهزر معاكي ده بيكسر ملل الحياة الزوجية جدا.

10- بيقدر مشاعرك:

دايما بيقدر مشاعرك وبياخدها بعين الاعتبار في كل تصرفاته معاكي, يعني يكون دايما خايف على زعلك, ولو انتي متضايقة او حاسه باي احساس سلبي يكون مقدر ده ويعرف يتعامل معاكي ويخرجك من الحالة اللي انتي فيها.

11- تحسي بحبه ليكي:

انك تكوني دايما حاسه بحبه ليكي من تصرفاته ومعاملته معاكي, وانك حب حياتة واهم واحدة وليكي الاولوية عنده قبل اي حاجة تانية.

12- بيخلي حياتك اسهل:

انه يكون دايما بيدي الحلول وبيسعى دايما لتجنب الخلافات, اي حياة زوجية مش بتخلى من المشاكل اكيد لكن لما بتحصل مشكلة بينكم دايما هتلاقيه بيدور على الحل مش بيعقد المشكلة زيادة وهيسعى دايما انه يتجنب الخلافات.

13- بيساعدك في شغل البيت:

المساعدة في شغل البيت من الحاجات المهمة جدا من مميزات الزوج المثالي, يعني مثلا يغسل الاطباق, يهتم بالاطفال, والمهم كمان انه يعمل ده من غير ما انتي تطلبي منه يعني يعمله عشان يحسسك انه بيحبك وعايز يساعدك ويريحك.