فوايد واستخدامات الجزر الجمالية والصحية

خبراء الصحة والتغذية بيعتبروا الجزر واحد من افضل الاطعمة الصحية لانه غني جدا بالمواد المضادة للاكسدة والالياف الغذائية والفيتامينات زي فيتامين ايه وسي وكاي وبي 8 بالاضافة انه بيحتوي على حمض البانتوثونيك والفولات والبوتاسيوم والحديد والنحاس والمنجنيز, والميزة فيه انه منخفض السعرات الحرارية وخالي من الدهون يعني مش بيزود الوزن, وفوايد الجزر مش بتقتصر على الصحة بس كمان ليه فوايد كتير جدا للبشرة والشعر, والنهاردة في موضوعنا هنتعرف على فوايد واستخدامات الجزر الصحية والجمالية من خلال مجموعة وصفات طبيعية.

فوايد واستخدامات الجزر الجمالية والصحية:

– الفوايد الصحية الغذائية للجزر:

1- الجزر غني جدا بالبيتا كاروتين او فيتامين اي, كوباية واحدة من الجزر المقطع بتمد الجسم تقريبا 1096 ميكروجرام من فيتامين اي وده بيساعد على تحسين صحة العضم, وصحة الجلد, وتقوية النظر, والطبيعي ان احتياج الجسم اليومي لفيتامين اي للنساء 700 ميكروجرام وللرجال 900 ميكروجرام يعني الجزر هيمد الجسم بنسبة فيتامين اي اللي محتاجها يوميا, بيساعد كمان على تقوية جهاز المناعة, ومفيد جدا للحوامل ولصحة الجنين.

2- كوباية من عصير الجزر بتوفر تقريبا 13% من النسبة اللي محتاجها الجسم من فيتامين سي يوميا, وفيتامين سي بيعمل كمضاد للاكسدة وبالتالي ده بيساعد في الحماية من نزلات البرد والالتهابات والانفلونزا, بيحمي الاسنان واللثة, بيحارب الجذور الحرة المسببة للسرطان, بيسرع التئام الجروح , وبيحسن صحة العضم والاسنان والجلد.

3- الجزر بيحتوي على نسبة عالية من فيتامين بي 6 والفيتامين ده بينظم عملية التمثيل الغذائي في الجسم والجهاز المناعي, بيساعد في تشكيل خلايا الدم الحمرا, بيحسن صحة القلب, بيزود انتاج هرمون الميلاتونين “هرمون السعادة” المسئول عن الحالة المزاجية, مفيد في علاج فقدان الذاكرة, بيحمي من الم العضلات, والاكتئاب, والقلق, وضعف التركيز.

4- عصير الجزر بيحتوي على المعادن الاساسية زي الكالسيوم والمنجنيز والفوسفور والنحاس والبوتاسيوم, والعناصر دي بتساعد على تنظيم ضغط الدم ومعدل ضربات القلب, بيحسن صحة العضم وبالتالي هيحميها من الكسور وهشاشة العظام.

5- الجزر غني بالكالسيوم المفيد لصحة العضم والاسنان, كوباية من عصير الجزر بيوفر حوالي 8% من الكالسيوم اللي محتاجه الجسم بشكل يومي.

6- تقدري تاكلي الجزر ني او مطبوخ او تشربيه كعصير, فوايدة هتنعكس على صحتك وبشرتك وشعرك بشكل ايجابي جدا في كل الحالات.

– فوايد الجزر للبشرة:

شرب عصير الجزر بشكل يومي بينعكس بشكل ايجابي جدا على البشرة.

1- بيمنع جفاف الجلد لانه بيحافظ على الجسم والجلد رطب وده هيخلي البشرة على طول نضره ورطبة.

2- بيساعد على تقليل عيوب وندوب البشرة, بيمنع حب الشباب.

3- بيساعد على تنشيط الجلد وبيحسن مظهره.

4- الجزر بيحتوي على الزيوت الاساسية اللي بتساعد في عملية الهضم.

5- مفيد جدا لعلاج عدم توحد لون البشرة وتصبغ الجلد.

6- المواد المضادة للاكسدة الموجودة فيه بتمنع مشاكل الجلد زي الاكزيما, التهاب الجلد, والتجاعيد والطفح الجلدي.

7- فيتامين اي اللي في الجزر يعتبر مكمل غذائي بيساعد على نمو الانسجة.

8- الكاروتين والمواد المضادة للاكسدة بتزود من مناعة الجلد ضد اشعة الشمس, وبتساعد في علاج حروق الشمس.

9- فيتامين سي بيساعد في انتاج الكولاجين في البشرة وبالتالي ده بيحسن مرونة الجلد وبيمنع التجاعيد.

– وصفات طبيعية للبشرة:

1- تنعيم وترطيب الجلد:

اخلطي ½ كوباية من عصير الجزر مع معلقة كبيرة عسل نحل ومعلقة كبيرة دقيق وصفار بيضة, افردي الخليط على البشرة وسيبيه 20 دقيقة وبعدين اغسليه بمية دافية وبعدين مية باردة.

2- علاج الندبات واثار حب الشباب:

اسلقي جزرتين واهرسيهم كويس لحد ما يبقوا ناعمين وضيفي لهم معلقة كبيرة لبن ومعلقة كبيرة زيت زيتون ومعلقة كبيرة عسل نحل, افردي الخليط على البشرة وسيبيه 15 دقيقة وبعدين اغسليه بالمية, كرري الوصفة 3 مرات في الاسبوع هتلاحظي اختفاء الندبات واثار الحبوب بالتدريج.

3- علاج حروق الشمس:

اخلطي 2 معلقة كبيرة عصير جزر مع 4 معالق كبيرة مية ورد حطي الخليط في ازازة ببخاخ ورشي منها على بشرتك مرتين في اليوم.

4- علاج التجاعيد وشد الجلد:

اعصري كمية من الجزر واستخدمي العصير يوميا على البشرة بقطنة امسحي بيه بشرتك مرتين في اليوم ده يعتبر تونر طبيعي للبشرة بيساعد على علاج التجاعيد والتخلص من الخطوط الرفيعة.

او اسلقي جزرة واهرسيها وضيفي لها معلقة صغيرة زيت زيتو, دلكي بشرتك بالخليط وسيبيه من 15 – 20 دقيقة وبعدين اغسليه بالمية.

5- علاج حب الشباب وتنضيف المسام:

اسلقي جزرة واهرسيها ودلكي بيها بشرتك في حركات دائرية لمدة 20 دقيقة وبعدها اغسلي بشرتك بلبن متخفف بالمية.

6- لعلاج البقع وتحسين لون الجلد:

اسلقي جزرة واهرسيها وضيفي لها معلقة صغيرة عصير ليمون , ادهني بشرتك بالخليط وسيبيه من 15 – 20 دقيقة وبعدين اغسليه, وممكن تضيفي للخليط عصير برتقان لون متوفر عندك.

7- لتقليل افراز الدهون للبشرة الدهنية:

اخلطي كميات متساوية من عصير الجزر والعسل النحل وضيفي لهم بياض بيضة ومعلقة زبادي وشوفان مطحون بالتدريج لحد ما يبقى عندك الخليط قوامه مناسب, افرديه على بشرتك وسيبيه 20 دقيقة واغسليه.

8- تفتيح البشرة:

اسلقي 3 جزرات وحطيهم في الخلاط وضيفي لهم  3 معالق كبار عسل نحل واضربيهم مع بعض لحد ما تتكون عندك عجينة ناعمة, افردي الخليط على البشرة وسيبيه 20 دقيقة واغسليه, الماسك ده كمان مفيد جدا للبشرة الجافة, وممكن تضيفي للخليط معلقة كبيرة جلسرين لزيادة فعالية الترطيب للماسك.

او اخلطي عصير 3 جزرات مع 2 معلقة كبيرة دقيق, بياض بيضة, 2 معلقة كبيرة عصير طماطم, 2 معلقة كبيرة قشطة, 2 معلقة صغيرة زيت زيتون, امزجي المكونات كلها مع بعض كويس وحطي الخليط على البشرة وسيبيه 40 دقيقة وبعدين اغسليه بمية باردة, كرري الوصفة 3 مرات في الاسبوع لافضل النتايج.

– وصفات طبيعية للشعر:

الجزر كمان مفيد جدا للشعر ممكن نستخدمه عشان نحافظ على صحة الشعر من خلال ماسكات بسيطة جدا.

1- ماسك الجزر لعلاج جفاف وتلف وتساقط الشعر:

اعصري جزرتين, اخلطي 2 معلقة كبيرة عسل نحل مع معلقة كبيرة زيت زيتون ومعلقة صغيرة زيت فيتامين اي سخني خليط الزيوت والعسل في الميكروويف او على النار وبعدين ضيفي المكونات على عصير الجزر, اغسلي شعرك وادهنيه بالخليط وسيبيه 30 دقيقة وبعدين اغسليه بالشامبو.

2- لترطيب الشعر وعلاج القشرة:

اسلقي جزرة وحطيها في الخلاط وضيفي لها بيضة و2 معلقة كبيرة زبادي اضربيهم مع بعض كويس, حطي الخليط على الشعر وسيبيه ساعة وبعدين اغسليه بالمية والشامبو.

ازاي تستخدمي اللبن الرايب لجمال بشرتك وشعرك وصحتك