4 اخطاء في المكياج بتبوظ صورك .. وازاي تتجنبيها
معظمنا بيقضي وقت كبير على السوشيال ميديا وبنتشارك الصور مع اصحابنا بس دايما بتقابلنا مشكلة اننا عشان نختار صورة حلوة نشاركها على اي موقع سوشيال ميديا بنقعد نتصور كتير على ما صورة تعجبنا ممكن ننزلها وخصوصا في الصور السيلفي لانه بيظهر عيوب الوش جدا, واحيانا بيكون واحد من الاسباب اللي بتخلي الصور تطلع مش حلوة هو المكياج وده اللي هنعرفه النهاردة من خلال موضوعنا ايه هي اكتر 4 اخطاء في المكياج بتبوظ صورك وممكن تخلي شكلك يطلع مش حلو في الصور.
اخطاء في المكياج بتبوظ صورك:
1- بتحطي بودرة كتير:
من اول الاخطاء اللي بتعمليها وبتخلي وشك في الصورة يطلع مش حلو هي انك تحطي بودرة زيادة عن اللزوم هتخلي وشك يطلع مطفي اوي ومن غير حياة, عشان كده الافضل انك تحطي البودر على النقط الساخنة بس في الوش اللي هي منتصف الجبهة, الدقن, تحت العيون, وجوانب الانف, طبقيها على الوش بفرشة صغيرة.
2- رسمة الحواجب مش مظبوطة:
الاهتمام برسمة الحاجب مهمة جدا لانها بتحدد الوش, عشان كده اهتمي برسمة الحواجب اللي تكون مناسبة لشكل وشك واملي الفراغات كويس بقلم الحواجب باللون المناسب, او ممكن تستخدمي مصحح الحواجب البودر او الجل حسب اللي بتفضليه اكتر وبتشوفي انه مناسب اكتر لحواجبك, وبعد الرسم سرحيهم بفرشة الحواجب عشان تديهم مظهر ناعم وطبيعي.. شوفي من هنا رسمة الحواجب المناسبة لشكل كل وش.
3- بتعملي ستروبنج زيادة عن اللزوم:
احنا اتكلمنا قبل كده عن الستروبنج وقولنا انه تحديد ملامح الوش عن طريق اضاءة الوش, لكن ممكن يديكي نتيجة عكسية لو زودتيه زيادة عن اللزوم وممكن يظهر وشك في الصور كأنه عرقان وبيلمع زيادة عن اللزوم, عشان كده ناخد بالنا لما نيجي نعمل اضاءة للوش اننا منزودهاش زيادة عن اللزوم عشان الوش يبان حلو وطبيعي.
4- مش بتهتمي بشكل الرموش:
من الحاجات اللي ممكن تأثر على شكلنا في الصور اننا مش بندي الرموش الاهتمام الكافي, يعني مثلا الرموش القصيرة والمستقيمة ممكن تدي عينيكي لوك انها مرهقة او تعبانة, عشان كده استخدمي ماسكارا تدي طول وكثافة للرموش وتجعديهم, ممكن تستخدمي اداة تني الرموش Lash curler عشان تديكي طول وتجعيد للرموش بتاعتك, وبعدها حطي طبقتين من الماسكارا السودا.