10 وصفات لجمالك من مكونات طبيعية وخضراء بالكامل

بقلمآية حسان فيبشرة visibility5061

انك تهتمى بجمالك شئ مهم وضرورى مهما كان سنك، والاهتمام بالجمال مش معناه انك لازم تصرفى كتير على منتجات العناية بالبشرة الغالية و المكلفة، واللى كلنا بنبقى خايفين نستخدمها خصوصا لو كنتى بتجربى منتج لاول مرة ومش عارفة ازاى ممكن يأثر على بشرتك، علشان كده فى معظم الوقت بنحاول ندور على حلول بديله، وعلشان بنات حوا دايما يهمها تساعدك، فى المقال ده هنعرفك على وصفات لجمالك من مكونات طبيعية ومفيدة جدا و متوفرة بسهولة  و تقدرى تستفيدى منها بشكل كبير، اعرفى معانا 10 وصفات لجمالك من مكونات طبيعية وخضراء بالكامل..

10 وصفات لجمالك من مكونات طبيعية وخضراء بالكامل

1- الشاى الاخضر : 

الشاى الاخضر بيعتبر من المكونات الطبيعية اللى بتحتوى على عنصرين من اهم العناصر اللى بتحافظ على جمال وصحة البشرة وهما مضادات الاكسدة والكافيين، انقعى كميةمن الشاى الاخضر فى مية مفلترة او معدنية و حطيه فى التلاجة واستخدميه كـتونر لوشك علشان تضيقى مسام البشرة و تخليها مخفية.

2- الخيار : 

لو بتعانى من انتفاخ العيون او الاكياس تحت العين او لو عينك مرهقة بعد سهرة طويلة يبقى الخيار هو الحل، لانه غنى بمضادات الاكسده و الـ flavonoids اللى بتقلل التهاب العين بشكل طبيعى وبتضيع علامات الارهاق، قطعى شرائح رقيقة من الخيار و حطيها على عينيكى و سيبيها فترة من الوقت و اتخلصى من اى ارهاق.

3- زيت الزيتون : 

تالت وصفة معانا من وصفات لجمالك من منتجات طبيعية خضراء هى وصفة زيت الزيتون، استخدمى قطرات قليلة من زيت الزيتون النقى كمرطب سريع و عميق للبشرة.

4- الكيوى : 

اعملى ماسك مقشر لوشك من الكيوى بمنتهى السهولة وفى دقايق، خدى قلب الكيوى و امزجيه مع الزبادى وزيت جوز الهند علشان تعملى  scrub قوى و مرطب فى نفس الوقت، الماسك ده مفيد لانه الكيوى غنى بالـ alpha hydroxy acids و فيتامين A وفيتامين C و اللى بيساعدوكى تتخلصى من الجلد الميت و ترجعى بشرتك مشرقة.

5- التفاح الاخضر : 

خل التفاح الاخضر بيعتبر مكون مهم جدا فى وصفات الجمال وخصوصا العناية والاهتمام بالشعر، اعملى سبراى لشعرك متكون من ربع الكمية خل التفاح الاخضر و الـ 3 اربع التانيين مية معدنية او مقطرة و استخدميه على شعرك علشان تتخلصى من اى زيوت متراكمة او اتربة فى فروة الراس بعد غسيل شعرك بالشامبو عن طريق انك تدلكى بيه فروة الرأس، وممكن تستخدميه فى كل مرة تغسلى فيها شعرك. 

6- العنب الاخضر : 

امزجى العنب الاخضر مع الزبادى و اعملى بيه ماسك تحاربى بيه تراكم الزيوت و لمعان الوجه لو كنتى من اصحاب البشرة الدهنية.

7- الليمون – lime :

اعملى مقشر ممتاز لبشرتك من الليمون و السكر الخشن علشان تساعدى فى تجديد خلايا البشرة وتتخلصى من خلايا البشرة الميتة والجلد الميت.

8- الكنتالوب:

الكنتالوب من الفاكهة الغنية جدا بمضادات الاكسدة وفيتامين C، وعلشان تحققى اقصى استفادة لجمال بشرتك باستخدام الكنتالوب، قطعى شرايح رقيقة جدا من الكنتالوب و حطيها على وشك لحوالى 20 دقيقة علشان ترطبي بشرتك و تنقيها.

9- النعناع: 

لو عايزة تتخلصى من الحبوب ، اطحنى شوية من ورق النعناع مع كمية مناسبة من مية الورد لحد ما يبقوا شبه العجينة وحطيهم على الحبوب حوالى 10 دقايق وبعدين اغسلى وشك بمية فاترة، مادة المينثول الموجودة بشكل طبيعى فى النعناع بتساعد فى القضاء على الالتهابات و تقلل الاحمرار.

10- الافوكادو : 

اخر وصفة معانا من وصفات لجمالك من مكونات طبيعية وخضراء هى وصفة ماسك الافوكادو، اعملى ماسك لوشك متكون من نص ثمرة افوكادو ، صفار بيضة و معلقة شاى من العسل الابيض و معلقة اكل من زيت الزيتون واخلطيهم مع بعض و حطى الماسك على شعرك والبسي عليه غطاءاو shower cap وسيبيه 30 دقيقة، الاوميجا 3 الموجودة فى الافوكادو و الـ  fatty acids بيساعدوا على تغذية بصيلات الشعر فمع الوقت هيبقى شعرك اقوى وبالتالى هيقل التساقط.

شوفى معانا كمان وصفات للبشرة من الشاى الاخضر !