16 غلطة بنعملهم في ضوافرنا.. وازاي نتجنبها ونخلي ضوافرنا صحية

بقلمريهام محمود فيأظافر visibility4469

الضوافر بتحتاج دايما اهتمام وعناية عشان نحافظ على شكلها صحي, بس ممكن اثناء عنايتك بيهم تعملي اخطاء من غير ما تاخدي بالك تتسبب في ضرر ضوافرك, وده اللي هنعرفه النهاردة من خلال موضوعنا هنتعرف على اكتر غلطات بنعملهم في ضوافرنا عشان نتجنبها ونحافظ عليها صحية.

غلطات بنعملهم في ضوافرنا:

1- مش بتغسلي ايدك قبل ما تحطي المانيكير:

ممكن نكون بنلاحظ في فيديوهات المتخصصين بالعناية بالضوافر انهم بيستخدموا مزيل المانيكير قبل ما يحطوا المانيكير على الضوافر حتى لو مافيش مانيكير قديم عليها, وده لان الاظافر بتفرز زيوت طبيعية ممكن تمنع ان المانيكير يثبت كويس ويتقشر بسرعة, عشان كده قبل ما تحطي المانيكير لازم تمسحيهم الاول بمزيل المانيكير وبعدين تغسليهم بالمية والصابون عشان تتخلصي من اي زيوت موجودة على الضوافر.

غلطات بنعملهم في ضوافرنا
غلطات بنعملهم في ضوافرنا

2- بتبردي ضوافرك في اتجاهات مختلفة:

من اكتر الحاجات اللي ممكن تضعف الضوافر وتكسرهم انك تبرديهم في اتجاهات مختلفة, عشان كده افضل طريقة لبرد الضوافر عشان تحافظي عليهم انك تبرديهم بالراحة في اتجاه واحد من الحافة الخارجية لنص الضوفر, ولو انتي ضوافرك ضعيفة خبراء التجميل بينصحوا انك تبردي ضوافرك من تحت يعني تخلي المبرد تحت الضوفر عشان تبقي شايفة انتي بتعملي ايه وتبرديهم بشكل مناسب ومتضعفيهمش زيادة.

غلطات بنعملهم في ضوافرنا
غلطات بنعملهم في ضوافرنا

3- مش بتشيلي الجلد الجاف حوالين الضوافر:

الجلد اللي حوالين الضوافر زيه زي باقي البشرة محتاج تقشير عشان تتخلصي منه, ممكن تشتري من الصيدلية الزيوت المخصوص للجلد حوالين الضوافر او تدلكيهم باي نوع زيت زي زيت الزيتون او زيت اللوز الحلو رطبي ضوافرك الاول بكريم مرطب وبعدها دلكيهم بالزيت وبعدين ادفعي الجلد بالراحة باستخدام Orange wood stick وهتلاقيها متوفرة في الصيدلية وهي مخصوص لجلد الضوافر, الطريقة دي هتخلصك من الجلد الميت اللي حوالين الضوافر وهيخلي شكلها صحي.

غلطات بنعملهم في ضوافرنا
غلطات بنعملهم في ضوافرنا

4- مش بتنضفي ضوافرك بانتظام:

تراكم الزيوت على الضوافر بيضرها عشان كده الضوافر محتاجة تنضيف زي ما بتضفي اسنانك بالظبط عشان تحافظي عليها صحية وبيضا, تنضيف الضوافر بانتظام هيحافظ عليها صحية وهيخلصك من الزيوت المتراكمة, وعشان تعملي الخطوة دي استخدمي اسفنجة تلميع الضوافر بالراحة على الضافر من فوق وعلى جوانب الصوابع.

غلطات بنعملهم في ضوافرنا
غلطات بنعملهم في ضوافرنا

5- مش بتحطي طبقة Base coat:

طبقة الBase coat مهمة جدا قبل المانيكير عشان تحمي الضوافر وتغذيها, لان الطبقة الاساسية قبل المانيكير مش بس بتحمي ضوافرك من البقع اللي ممكن يسببها المانيكير كمان بتخليها اقوى, وهتساعدك تحطي طبقة المانيكير بشكل اسهل.

غلطات بنعملهم في ضوافرنا
غلطات بنعملهم في ضوافرنا

6- مش بتستخدمي Base coat مخصوص للمانيكير الجليتر:

المانيكير الجليتر من انواع المانيكير اللي بتبقى صعبة في ازالتها وممكن تسيب اثر على الضوافر, عشان كده الافضل تستخدمي الBase coat المخصوص للمانيكير الجليتر وهو عبارة عن نوع بيكون Peel off تقدريه تقشريه بسهولة من على ضوافرك من غير ما يسيب اي تأثير للجليتر على الضوافر.

غلطات بنعملهم في ضوافرنا
غلطات بنعملهم في ضوافرنا

7- بتحطي مانيكير زيادة عن اللزوم:

لما تيجي تحطي المانيكير اتجنبي انك تحطي طبقات كتير فوق بعض زيادة عن اللزوم اولا لانها هتاخد وقت على ما تنشف وتاني حاجة هتخليه يكلكع ويطلع شكله في النهاية مش حلو, عشان كده الافضل انك تاخدي بالفرشة كمية كافية من المانيكير عشان تغطي الضوافر من اول طبقة, وتبدأي تملي نص الضوفر وبعدين تملي الجنبين.

غلطات بنعملهم في ضوافرنا
غلطات بنعملهم في ضوافرنا

8- مش بتستني فترة كافية بين الطبقات:

ضروري جدا اننا نستنى فترة كافية من دقيقة لدقيقتين بين طبقات المانيكير او الBase coat عشان ندي كل طبقة فرصة انها تنشف قبل ما نحط الطبقة التانية ويطلع شكل المانيكير احلى في النهاية.

غلطات بنعملهم في ضوافرنا
غلطات بنعملهم في ضوافرنا

9- مش بتحطي Top coat:

زي ما الBase coat مهمة عشان نحافظ على ضوافرنا كمان طبقة الTop coat مهمة جدا لانها تعتبر الخطوة النهائية اللي هتثبت المانيكير اكتر وتخليه ميتقشرش منك بسرعة وشكله يبقى احلى.

10- مش بتحطي طبقة الTop coat صح:

بعد ما حطيتي المانيكير بشكل حلو متبوظيش ده بانك تحطي خطوة الTop coat كوت غلط او باستعجال, عشان كده طبقيه على الضوافر بدقة زي المانيكير بالظبط عشان ميكلعكش على الضوافر ويبوظ لك المانيكير بتاعك بسرعة.

غلطات بنعملهم في ضوافرنا
غلطات بنعملهم في ضوافرنا

11- بتهملي اطراف الضوافر:

اطراف الضوافر ممكن نكون بنهملها او مش بنهتم بيها لكن هي مهمة جدا لانها هتحافظ على المانيكير فترة اطول من غير ما يتقشر او يتشقق, عشان كده زودي الTop coat على اطراف الضوافر بحيلة بسيطة جدا مرري الفرشة على حواف الضوافر بالعرض وسيبيها تنشف وممكن تحطي طبقة تانية.

غلطات بنعملهم في ضوافرنا
غلطات بنعملهم في ضوافرنا

12- مش بتنضفي حوالين الضوافر بعد المانيكير:

الجلد اللي حوالين الضوافر اللي ممكن يتلطخ مننا بعد ما نحط المانيكير ضروري مننساش ننضفه بعد ما نخلص عشان الشكل النهائي يطلع حلو, استخدمي فرشة رفيعة او اعواد القطن الخاصة بتنضيف الودان وحطي عليها اسيتون ونضفي الجلد اللي حوالين الضوافر.

غلطات بنعملهم في ضوافرنا
غلطات بنعملهم في ضوافرنا

13- بتحطي ايدك في مية باردة عشان المانيكير ينشف بسرعة:

الحيلة دي ممكن تكون من الحيل اللي بتساعد ان المانيكير ينشف بسرعة بس في نفس الوقت ممكن تلغبطه وتغير شكله, عشان كده الافضل عشان ينشف بسرعة اننا بس نعرضه للهوا في الجو, وكمان متحاوليش تنفخي عليهم بنفسك عشان بيطفي لمعة المانيكير وكمان ممكن يسبب فقاعات على المانيكير, وفي حاليا انواع سبراي ممكن تستخدميها بتترش بعد المانيكير عشان تساعد انه ينشف اسرع.

غلطات بنعملهم في ضوافرنا
غلطات بنعملهم في ضوافرنا

14- مش لازم تبدأي من الاول لو اتلغبطتي:

لو حصل لغبطة بسيطة وانتي بتحطي المانيكير مش لازم تبدأي من الاول دلوقتي نازل نوع Fix smudge ممكن تصلحي بيه الغلطات البسيطة في المانيكير من غير ما تمسحيه وتحطيه تاني, حطي طبقة منه على لغبطة المانيكير وسيبيها تنشف 30 ثانية وبعدين حطي طبقة الTop coat هتعالج لك المشكلة من غير ما تبدأي من الاول.

غلطات بنعملهم في ضوافرنا
غلطات بنعملهم في ضوافرنا

15- مش بتهتمي بضوافرك بشكل كافي:

العناية بالضوافر وبشرة الايد من الحاجات اللي لازم تكون في الروتين اليومي بتاعك, يعني مش كفاية مرة واحدة بس في الاسبوع لازم عناية يومية عشان تحافظي عليها صحية خصوصا ان الايد اكتر حاجة بنستخدمها كتير بشكل يومي وطول اليوم سواء في غسيل الاطباق او غسيل الملابس او حتى الكتابة كتير,  يعني بتتعرض لعوامل كتير ممكن تضرها, عشان كده اهتمي بترطيب الضوافر والجلد اللي حواليهم وادهنيهم يوميا بالزيت الخاص بالجلد اللي حوالين الضوافر لانه هيعيد الرطوبة لضوافرك وبشرتك وهيحافظ عليها من التكسر.

غلطات بنعملهم في ضوافرنا
غلطات بنعملهم في ضوافرنا

16- ازالة المانيكير الجل بطريقة غلط:

المانيكير الجل يعتبر من الانواع اللي استخدامها باستمرار ممكن يضر الضوافر ويشيل طبقة منها ويضعفها, فلو معندكيش وقت انك تروحي صالون التجميل تشيليه لازم انك تعملي الخطوة دي في البيت بشكل صح عشان تحاظفي على ضوافرك, وعشان نشيله بطريقة صح هنحتاج قطن واسيتون وورق فويل هتبلي القطن بالاسيتون كويس وتلفي بيه ضوافرك وبعدين تلفي عليهم الفويل وتسيبي ضوافرك ملفوفة من 10 – 15 دقيقة وبعدين استخدمي الOrange wood stick وابدأي شيلي بيها المانيكير.

غلطات بنعملهم في ضوافرنا
غلطات بنعملهم في ضوافرنا

5 نصايح سهلة تخلي بيهم ضوافرك تلمع بشكل طبيعي

5 نصايح سهلة تخلى بيهم ضوافرك تلمع بشكل طبيعى
5 نصايح سهلة تخلى بيهم ضوافرك تلمع بشكل طبيعى