طريقة البرايمر لتثبيت المكياج .. اعمليه بنفسك في البيت بخطوات بسيطة
البرايمر يعتبر من الخطوات المهمة جدا في المكياج لانه بيساعد على تثبيته لفترة طويلة وبيخليه يدوم ضد الرطوبة والعرق والحر, وكمان لصاحبات البشرة الدهنية اللي بيعانوا من عدم ثبات المكياج يعتبر البرايمر من الخطوات الاساسية بالنسبة لهم, والنهاردة جايبين لكل بنات حوا طريقة البرايمر لتثبيت المكياج تقدري تعمليه بنفسك في البيت بخطوات سهلة وبسيطة جدا, وهنعرف مع بعض طريقتين طريقة برايمر الوش وبرايمر العيون.
طريقة البرايمر لتثبيت المكياج:
1- طريقة عمل برايمر الوش:
الحاجات اللي هنحتاجها:
– 3 معلقة كبيرة كريم مرطب او لوشن للوش.
– 3 معلقة كبيرة جل صبار الالوفيرا.
– 1 ½ معلقة كبيرة كريم اساس او BB “مطابق للون بشرتك”.
– علبة فاضية.
الطريقة:
اخلطي الكريم المرطب او اللوشن مع الصبار وكريم الاساس قلبيهم بالمعلقة وامزجيهم كويس مع بعض, وحطي الخليط في اي علبة فاضية عندك اغسليها كويس وفضي فيها الخليط وكده يبقى البرايمر جاهز عندك تستخدميه اي وقت قبل المكياج بتاعك, وتقدري تحطيه بفرشة المكياج او بصوباعك او بالبيوتي بليندر.
ممكن تضيفي للمكونات كام نقطة من اي نوع صن بلوك انتي بتستخدميه عشان تخليه فيه حماية من الشمس بس الخطوة دي اختياري حسب ما انتي تفضلي.
2- طريقة عمل برايمر العيون:
الحاجات اللي هنحتاجها:
– ½ معلقة صغيرة كريم اساس او BB.
– ½ معلقة صغيرة كريم مرطب او لوشن.
– علبة فاضية.
الطريقة:
اخلطي كريم الاساس مع الكريم المرطب وقلبيهم لحد ما يمتزجوا مع بعض كويس, وحطي الخليط في علبة فاضية, وكده يبقى جاهز عندك طبقيه على العين بالفرشة او بصوباعك او بالبيوتي بليندر قبل ما تحطي الايشادو.
3- الطريقة التانية لبرايمر العين:
في الطريقة دي هنخلط كميات متساوية من كريم الاساس والكونسيلر وBody butter او ممكن لوشن الوش او الكريم المرطب بس لو هتستخدمي اللوشن او الكريم المرطب اختاري انواع تقيلة عشان تدي سمك اكتر للبرايمر وتديكي نتيجة احسن, واعملي كمية حسب ما انتي عايزة.
ضيفي كام نقطة من جل صبار الالوفيرا, قلبي الخليط بالملعقة وامزجي المكونات مع بعض كويس وحطيه في علبة فاضية واستخدميه على العين قبل المكياج.
4- الطريقة التالتة لبرايمر العين:
الحاجات اللي هنحتاجها:
– ½ معلقة صغيرة زبدة كاكاو.
– معلقة صغيرة نشا.
– 1 ½ معلقة صغيرة كريم اساس.
الطريقة:
سيحي زبدة الكاكاو على حمام مية عشان تطرى شوية وتبقى اسهل انك تدمجيها مع باقي المكونات وبعدين ضيفي لها النشا وكريم الاساس قلبي المكونات مع بعض, حطي الخليط في علبة للاستخدام.
اعملي مكياجك بنفسك في البيت بمكونات طبيعية
