10 استخدامات مفاجأة لزبدة الكاكاو مكنتيش تعرفيها قبل كده !
كل البنات اكيد مش بيستغنوا عن زبدة الكاكاو وتعتبر مستحضر اساسي في شنطتنا على طول لفايدتها في ترطيب وحماية شفايفنا من الجفاف, لكن النهاردة هنتعرف على استخدامات زبدة الكاكاو المختلفة عن استعمالها كمرطب للشفايف بس.
استخدامات زبدة الكاكاو:
1- منع ظهور فقاعات وبثور الرجل:
من المشاكل اللي بتحصل مع كتير مننا لما بنكون جايبين شوز جديد ممكن في بداية لبسه بيسبب لنا فقاعات وبثور في الرجل, لو ده حصلك ادهني اماكن الفقاعات بزبدة الكاكاو هتمنع تهيج الجلد وهتقدري تمشي بالشوز من غير ما تحسي بأي ألم.
2- ازالة الخاتم الضيق:
احيانا بيحصل اننا نلبس خاتم يكون ضيق شيوية علينا ومنعرفش نطلعه من الصوباع بسهولة وممكن يسبب لما الم وساعات بنفكر في حل الصابون عشان نقلع الخاتم, في حل تاني بسيط باستخدام زبدة الكاكاو ادهني صوباعك بيها هتلاقي الخاتم طلع بكل سهولة.
3- ازالة الخدوش من الحاجات الجلد:
ممكن تستخدمي زبدة الكاكاو عشان تزيلي الخدوش من على اي حاجة جلد عندك زي الشوز, الشنط, الحزام الجلد, وحتى كمان الاثاث الجلد واي حاجة تانية مصنوعة من الجلد بس ادهني مكان الخدوش بزبدة الكاكاو.
4- علاج الجروح البسيطة ولدغات الحشرات:
بسبب الخصائص المهدئة والمرطبة اللي موجودة في زبدة الكاكاو فهي بتساعد جدا في علاج الحكة والجروح البسيطة وبتقلل من احمرار الجلد.
5- ترطيب الشعر والحواجب:
زبدة الكاكاو بتساعد على ترطيب الشعر وبتخليه مفرود وناعم لفترة اطول وسهل التحكم فيه, حطي كمية بسيطة من زبدة الكاكاو على فرشة الشعر وسرحي بيها شعرك بس اتجنبي الجذور, ولو دهنتي الحواجب بزبدة الكاكاو هتظبط شعر الحواجب وتخلي شكلها احلى.
6- مهديء لقرحة الانف:
لما بنتعرض لدور برد كتر مسح الانف بيسبب لنا تهيج في الجلد حوالين وداخل الانف, لكن حل المشكلة دي بسيط وهو انك تدهني المنطقة المصابة بزبدة الكاكاو هتساعد على ترطيب الجلد جدا ويخف بشكل اسرع, لكن اتجنبي استخدام زبدة الكاكاو بالنعناع عشان ممكن تسبب حكة وتهيج البشرة اكتر.
7- اعملي شمعة:
لو حطيتي عود كبريت في زبدة الكاكاو تقدري تستخدميها كشمعة في حالة طارئة لو مش متوفر عندك شمعة.
8- اشعال النار:
لو عايزة تولعي نار لاي غرض بشكل سريع هاتي قطع قطن صغيرة وحطي عليها بلسم وولعيها هتلاقي النار ولعت بسرعة جدا لان القطن هيساعد على ده وزبدة الكاكاو هتخلي النار كثيفة وهيخليها تستمر معاكي مولعة فترة طويلة.
9- تصليح السوستة:
زبدة الكاكاو لانها عنصر مرطب جدا ممكن تستخدميها تصلحي بيها سوستة جاكيت او اي حاجة معلقة عندك, ادهني السوستة بزبدة الكاكاو هتلاقيها اتفتحت معاكي بسهولة.
10- هتحافظ على البرفيوم فترة اطول:
لو عايزة البرفيوم بتاعك يستمر فترة طويلة من غير ما ريحته تروح, ادهني زبدة الكاكاو على البشرة قبل رش البرفيوم على الاماكن الدافية في الجسم زي المعصم, او ورا الاذن.