افكار ازاى تقدرى تعملى looks مختلفة وشيك من الهدوم الموجودة فى دولابك
اننا مضطرين ننزل كل يوم سواء للشغل او الكلية او المشاوير مشكلة بتقابلنا كل يوم، لانه بعد فترة بنزهق من الهدوم اللى موجودة عندنا و من لبسها كتير و بتقابلنا اصعب مشكلة بتقابل اى بنت كل يوم الصبح، مش لاقيين حاجة نلبسها !
و الحل مش انك كل كام يوم تنزلى تجيبي هدوم جديدة و تصرفى فلوسك كلها على الهدوم، الحل كله هو فى انك ازاى تعملى looks مختلفة وشيك من الهدوم الموجودة فى دولابك ، بحيث انك لو حتى لبستى نفس البلوزة او البنطلون يومين ورا بعض يبانوا فى كل مرة مختلفين. فى المقال ده بنات حوا هتقولك نصايح و افكار ازاى تقدرى تعملى looks مختلفة وشيك من الهدوم الموجودة فى دولابك، يلا تعالى اعرفيهم معانا ..
افكار ازاى تقدرى تعملى looks مختلفة وشيك من الهدوم الموجودة فى دولابك
1- أرفعى الأكمام :
الاكمام الطويلة معمولة علشان تترفع لفوق، لو لابسة بلوزة بكم طويل بدل ما تسيبيه مفرود وشكله عادى، ارفعى الاكمام لفوق واعملى لوك عفوى . الحركة دى بتعتبر اسهل طريقة علشان تخلى القمصان و البلوزات الكلاسيك تبان مودرن و trendy .
2- اتنى رجل البنطلون:
رجلين البنطلونات لما بتبقى مفرودة بتدارى على تفاصيلة مهمة فى الـ outfit بتاعك، زى مثلا تفاصيل فى الشوز ، من الحركات اللى ممكن تعمليها وتعمل تغيير كبير فى شكل ستايلك وكمان تبينك اطول هى انك تتنى رجل البنطلون لفوق خصوصا مع شوز بلون نيود .
كمان فى اكتر من طريقة لتنى رجلين البنطلون ، اما تنية واحدة عريضة ودى بتبقى مناسبة للبنطلونات اللى رجليها straight او تنيتن صغيرين ودى مناسبة اكتر للبنطلونات اللى رجليها واسعه و الـ boyfriend jeans .
3- حطى الجاكت على كتفك :
حيلة بسيطة جدا و بتخلى اللوك بتاعك يبان اليجانت وشيك و كمان غالى بمنتهى السهولة، وهى انك ترمى الجاكت او البليزر على كتفك، الحركة دى بتعمل لوك classy جدا حتى لو لابسة الجاكت على جينز و شوز.
4- اربطى البلوزة :
ابسط طريقة تحددى بيها الـ waist line من غير ما ضطرى تلبسي حزام هى انك تربطى البلوزة او القميص من قدام، الحركة دى هتساعدك تعملى لوك حلو و كمان بسيط.
5- دخلى البلوزة جوه الجيبة او البنطلون :
دخلى البلوزة جوا الجيبة او تدخلى جزء من القميص و التانى سيبيه بره الجيبة او البنطلون برده من الحيل البسيطة اللى بتساعدك تعملى لوك حلو. الحركة دى كمان بتساعدك تعملى لوك اليجانت و classy بمنتهى السهولة و بتمشى مع اللبس الكلاسيك او لبس السهرات و كمان مع اللبس الكاجوال لخروجات النهار.
6- البسى حزام :
حيلة كمان من حيل تخليكى تقدرى تعملى looks مختلفة وشيك من الهدوم الموجودة فى دولابك هى انك تلبسي الحزام الرفيع او الـ slim belt مع الـ oversize shirts و الكارديجان الطويل بتحدد شكل جسمك و الـ waist line بشكل حلو و كمان بتضيف لمسة اناقة للـ look بتاعك و بتكمل اى لوك تعمليه وتخليه احلى، و الحزام بيمشي على الجيبة و الفستان و الكارديجان كمان.
اعرفى معانا كمان 9 عادات لازم تعمليها كل يوم علشان تبقى على الموضة ..