8 تغييرات في ديكور البيت هتخليه مريح اكتر وهتساعدك على تقليل التوتر

ريهام محمود
ريهام محمود
3357

اكيد كلنا بعد يوم مجهد ومرهق بره البيت ما بنصدق نرجع عشان نرتاح من تعب اليوم لكن عشان ده يحصل لازم يكون البيت مهيأ انه يوفرلك الجو المريح اللي انتي عايزاه وتقدري تطلعي من كل التوتر والضغط اللي مريتي بيه طول اليوم, عشان كده النهاردة هنقولكم على  تغييرات في ديكور البيت هتخليه مريح اكتر وهتساعدك على تقليل التوتر وكلها حاجات بسيطة جدا لكن في نفس الوقت مؤثرة.

تغييرات في ديكور البيت هتخليه مريح اكتر:

1- زودي الزرع في البيت:

تزيين البيت بالزرع يعتبر وسيلة رائعة ومؤثرة بشكل ايجابي جدا في جو البيت, لان الطبيعة واللون الاخضر بيساعد على تقليل التوتر والضغط وبيوفرلك جو مريح, وحتى هيخليكي تفكري بشكل مبدع اكتر, والزرع هيخلي في نسبة اكسجين ورطوبة اكتر في الهوا اللي حواليكي وده هيساعدك انك تتنفسي بشكل افضل وهيحسن مزاجك بشكل فوري.

تغييرات في ديكور البيت هتخليه مريح اكتر 1
تغييرات في ديكور البيت هتخليه مريح اكتر 1

2- اتخلصي من الفوضى:

الفوضى من اكتر الحاجات اللي ممكن تزود الضغط والتوتر, عشان كده لازم ترتبي المكان حواليكي ادي لنفسك كل يوم قبل ما تروحي تنامي 30 دقيقة رتبي فيه المكان شيلي الهدوم علقيها مكانها رتبي مكتبك واوراقك وحاجتك كلها, لو في اطباق عايزة تتغسل اغسليها قبل ما تنامي ده هيخفف عنك التوتر كتير لما هتصحي الصبح تلاقيه المكان مترتب.

تغييرات في ديكور البيت هتخليه مريح اكتر 2
تغييرات في ديكور البيت هتخليه مريح اكتر 2

3- اعملي مكان للاسترخاء:

ايا كان مجال عملك حاولي انك تخصصي مكان في البيت يكون مكان للاسترخاء تقدري تقري فيه اي كتاب مفضل ليكي او تقعدي فيه تصفي ذهنك من اي حاجة, خصوصا لو انتي مثلا بتشتغلي من البيت ساعتها هتحسي ان مكان شغلك اللي ممكن يكون بيسبب لك اجهاد هو نفسه المفروض المكان اللي ترتاحي فيه عشان كده مهم انك تخصصي ركن صغير تمارسي فيه اي هواية ليكي تريح اعصابك وتفصلك عن توتر وضغط الشغل.

تغييرات في ديكور البيت هتخليه مريح اكتر 3
تغييرات في ديكور البيت هتخليه مريح اكتر 3

4- رتبي سريرك كل يوم:

ترتيب السرير يوميا بالرغم انها حاجة بسيطة جدا لكنها من الحاجات اللي بتعزز الطاقة الايجابية حواليكي وبتحسن المود, انك تكوني شايفة السرير قدامك طول الوقت مش مترتب وفي حالة فوضى ده ممكن يزود التوتر جدا, حتى لما تروحي تنامي في سرير مترتب هتفرق معاكي كتير جدا وهتخليكي تحسي بشعور احسن.

تغييرات في ديكور البيت هتخليه مريح اكتر 4
تغييرات في ديكور البيت هتخليه مريح اكتر 4

5- استخدمي الالوان اللي تساعدك على تهدئة اعصابك:

اختيار الوان الدهان وديكور البيت من الحاجات المؤثرة جدا في المود, عشان كده حاولي تختاري الالوان اللي بتساعد على تهدئة الاعصاب زي درجات الازرق, البنفسجي, الوردي, الاخضر, الالوان دي بتساعد على تقليل التوتر وتهدئة الاعصاب جدا, وحاولي تدخلي درجات الرمادي في الالوان عشان تحققي التوازن بين الطاقة في كل اوضة.

تغييرات في ديكور البيت هتخليه مريح اكتر 5
تغييرات في ديكور البيت هتخليه مريح اكتر 5

6- ريحي نفسك من الاجهزة الالكترونية:

بالرغم ان التليفزيون او الموبايل ممكن يكون وسيلة ترفيه لكتير مننا لكن انك تعملي ده طول الوقت ده ممكن يزود القلق والاكتئاب, عشان كده بدل التعامل مع الاجهزة الالكترونية باستمرار حاولي تدي نفسك وعينك استراحة منهم وتقومي تاخدي شاور مثلا وتعملي استرخاء لجسمك وعقلك, او تقري  كتابك المفضل, وحاولي انك تبعدي عن الموبايل والاجهزة الالكترونية قدر الامكان.

تغييرات في ديكور البيت هتخليه مريح اكتر 6
تغييرات في ديكور البيت هتخليه مريح اكتر 6

7- رتبي دولابك كل 3 شهور:

حاولي متستنيش المواسم عشان ترتبي دولابك او تغيري فيه, خلي ترتيب الدولاب ده كل من 3 – 4 شهور تحاولي تطلعي الحاجات اللي مالهاش لازمة عندك او اللي انتي مش محتاجاها وممكن تستغني عنها ممكن تتبرعي بيها مثلا حد تاني يستفاد منها احسن, حاولي كل فترة تغيري في ترتيب الاثاث والشكل العام للبيت, لان التوتر بيزيد لو انتي قعدة في مكان زحمة وفي حاجات كتير مالهاش لازمة, عشان كده اتخلصي اول بأول من اي حاجة انتي مش عايزاها.

تغييرات في ديكور البيت هتخليه مريح اكتر 7
تغييرات في ديكور البيت هتخليه مريح اكتر 7

8- اعتمدي على الضوء الطبيعي باكبر قدر ممكن:

الضوء من الحاجات كمان اللي ممكن تأثر بشكل سلبي على المود, عشان كده دخلي الضوء الطبيعي في البيت بقدر الامكان بانك تفتحي الستاير وتجددي هوا البيت عشان تتخلصي من الطاقة السلبية, وجسمك يمتص فيتامين دي اللي بيجي من ضوء الشمس الطبيعي وده هيخليكي تحسي بشعور احسن ويحسن مودك جدا وهتحسي باسترخاء اكتر, كمان هيخليكي تنامي بشكل افضل واسرع بالليل, عشان كده اول حاجة لازم تعمليها اول ما تصحي من النوم هو انك تفتحي الستاير وتدخلي الضوء للبيت.

تغييرات في ديكور البيت هتخليه مريح اكتر 8
تغييرات في ديكور البيت هتخليه مريح اكتر 8

10 اسباب تخليكي تحولي ديكور بيتك الى ديكور غني بالألوان

10 اسباب تخليكى تحولى ديكور بيتك الى ديكور غنى بالألوان ..
10 اسباب تخليكى تحولى ديكور بيتك الى ديكور غنى بالألوان ..

مقالات متعلقه

تغيير وتطوير.. اعرفي إزاي تجددي بيتك من غير فلوس كتير

تغيير وتطوير.. اعرفي إزاي تجددي بيتك من غير فلوس كتير

55 نصيحة ديكور من الخبراء..اعرفيها معانا

55 نصيحة ديكور من الخبراء..اعرفيها معانا

نصايح وأفكار ازاي تختاري لون الحوائط المناسب لغرفة النوم.. لتأثير أفضل على مودك وصحتك النفسية

نصايح وأفكار ازاي تختاري لون الحوائط المناسب لغرفة النوم.. لتأثير أفضل على مودك وصحتك النفسية