3 وصفات ماسكات من الشاى لشعر كيرلى يجنن تقدرى تعمليهم فى البيت بسهولة

شرب الشاى عندنا فى مصر بيعتبر حاجة اساسية فى يوم اى حد فينا، ولو كنتى من مدمنين الشاى فأكيد عارفه انه الشاى بأنواعه المختلفة له فوايد كبيرة للجسم، لكن مش بس كده. الشاى له فوايد كبيرة للشعر كمان ممكن نستفيد منها خصوصا لو كان شعرك كيرلى، او لو كنتى بتحبي تعملى شعرك كيرلى و بتدورى على طرق تخليكى تحافظى عليه، كل اللى محتاجة تعمليه هو انك تقرى المقال ده وتعرفى معانا ازاى تعملى وصفات  ماسكات من الشاى لشعر كيرلى يدوم اطول و بنفسك فى البيت .. 

3 وصفات ماسكات من الشاى لشعر كيرلى يجنن تقدرى تعمليهم فى البيت بسهولة ..

1- وصفة شاى الكاموميل لتنضيف الشعر الكيرلى :

الماسك ده هيساعدك تحافظى على شعرك نضيف وتتخلصى من كل الاتربة او الزيوت اللى ممكن تتراكم عليه من غير ما الـ curls بتاعتك تبوظ ..

المكونات المطلوبة : 

كيسين فتلة من شاى الكاموميل.

كوباية من المية المغلية.

معلقة اكل من خل التفاح.

معلقة من عسل النحل الخام.

ازاى تحضريها : 

وكأنك بتعملى كوباية من شاى الكاموميل عادى خالص، فى مج او حلة صغيرة اوى حطى المية المغلية لأكياس الشاى و حليه بعسل النحل وقلبى كويس لكن بلطف. استنى لما الشاى يبرد وبعد كده ضيفى معلقة خل التفاح.

ازاى تستخدميها: 

اغسلى شعرك بمية دافية و بعد كده ضيفى نص كمية الشاى على شعرك ببطئ، دلكى فروة الشعر بالشاى كويس و بعد كده ضيفى الباقى من الشاى و كملى تدليك لوقت بسيط و بعد كده اغسلى شعرك مرة تانية.

ازاى شاى الكاموميل مفيد؟  

الكاموميل معروف بفوايده فى تهدئة المعدة و الاعصاب بشكل عام ، وبيساعد على تنقية المعدة و الدم، وبيقدر يتغلل فى فروة الرأس ويتخلص من كل الاتربة و الزيوت المتراكمة على الشعر من غير ما يأثر على الـ curls بتاعتك او انه يسبب جفاف فروة الرأس بأنه يتخلص من كل الزيوت الطبيعية، وكمان بيساعد على تهدئة فروة الرأس.

2-وصفة بلسم الشعر من الشاى  الاحمر :

تانى وصفة معانا من ماسكات من الشاى لشعر كيرلى هى وصفة الشاى الاحمر، يلا شوفى ازاى تقدرى تعمليها .. 

المكونات المطلوبة : 

حوالى 30 جرام من الافوكادو.

60 جرام من زيت جوز الهند.

30 جرام من الالوفيرا.

حوالى 5 جرام من الشاى الاحمر.

حوالى 50 جرام من زيت بذور العنب.

ازاى تحضريها : 

حطى كل المكونات فى الخلاط و اضربيهم لدقيقة او اتنين لحد ما يكونوا خليط لونه غامق، اللون الغامق ده معناه انه الشاى اندمج كويس مع باقى المكونات ، صفى الخليط كويس ، وبكده يبقى جاهز للاستخدام.

ازاى تستخدميها: 

استخدمى الماسك ده على شعر مغسول و لسه مبلول، واعملى مساج كويس لفروة الراس و على اطراف الشعر المتقصفة. بعد كده اشطفى شعرك بمية فاترة لحد ما الماسك كله ينزل من شعرك.

ليه الشاى الاحمر مفيد  ؟ 

الشاى الاحمر غنى بمادة الـ tannin اللى بتساعد على زيادة وتقوية الدورة الدموية فى فروة الرأس وبتعزز من نمو الشعر، وكمان اللون الغامق للشعر الأحمر بيدى لمعان للشعر وبيقوى من لونه، الماسك ده  بيساعد على منع قشرة  و جفاف الشعر و التقصف.

3- وصفة ماسك اصلاح الشعر بالشاى الاخضر والشمر : 

آخر وصفة معانا من ماسكات من الشاى لشعر كيرلى هى وصفة ماسك الشاى الاخضر والشمر السهلة ، اعرفى معانا ازاى تحضريها وازاى ممكن تفيد شعرك .. 

المكونات المطلوبة : 

حوالى 60 جرام من بذور الشمر.

حوالى 60 جرام من المية المغلية.

30 جرام من زيت الارجان.

معلقة أكل من خلاصة الشاى الاخضر.

150 جرام من زيت جوز الهند الخام.

ازاى تحضريها: 

ممكن تجيبى خلاصة الشاى الاخضر من عند العطار او ممكن تحضريها بنفسك بأنك تمزحى شوية من الشاى الاخضر الناعم مع كمية من الجلسرين.

فى الاول اغلي كمية من المية ، وفى كوباية او طبق منفصل امزجى الزيوت مع بعضها كويس.

اول ما المية تغلى ضيفى بذور الشمر و سيبيها تتنقع فى المية السخنة لمدة 10 دقايق، بعد كده صفى المية و خلى البذور على جنب للماسك.

سيبي شاى الشمر يبرد وبعد كده ضيفيه لخليط الزيوت و بعد كده ضيفى بذور الشمر و اضربي كل المكونات فى الخلاط لحد ما يبقوا خليط كثيف نوعا ما.

ازاى تستخدميها: 

اعملى مساج لفروة رأسك بعد ما تكونى غسلتى شعر ك بالماسك ده وشعرك لسه مبلول، واستخدمى صوابعك لفك اى تشابك بين خصلات شعرك علشان تضمنى انه الماسك وصل للشعر  كله، وعلشان تحققى اقصى استفادة، بعد ما تفردى الماسك على شعرك لفيه بفوطة دافية لانه الحرارة هتفتح مسام فروة رأسك وبكده تستفيدى من المكونات بشكل أكبر. سيبيى الماسك على شعرك حوالى 20 دقيقة وبعد كده اغسليه كويس بمية دافية .

ليه الماسك ده مفيد ؟ 

الشاى الاخضر بيحتفظ بفوايده و قيمته الغذائية و الصحية اكتر من الشاى الاحمر لانه ماتعرضش لاى تجفيف ، علشان كده هو غنى اكتر بالمواد المضادة للاكسدة. و كمان الكافيين بيعزز من نمو الشعر و مادة الـ catechins بتحارب تساقط الشعر. الماسك ده بيقوى فروة الرأس و بيحميها وبالتالى بيساعدك تحافظى على الـ curls بتاعتك اطول فترة ممكنة و كمان تهتمى بشعرك فى نفس الوقت.

شوفى كمان وصفات للبشرة من الشاى الاخضر ! لازم تجربيهم …