قصات شعر رائعة المناسبة ليكي حسب عمرك
كلنا دايما بنحتار في اختيار قصات شعر مناسبة لينا ما بين الطويل والقصير والمدرج ومش بس قصة الشعر كمان اختيار الالوان وخصوصا ان كل يوم بتظهر قصات واستايلات والوان جديدة للشعر, عشان كده احنا النهاردة هنساعدكم في الاختيار ده وجايبنلكم انسب قصات الشعر المناسبة ليكي حسب عمرك.
قصات شعر مناسبة ليكي حسب عمرك:
1- قصات شعر لسن 20 سنة:
سن 20 سنة هو السن المثالي انك تجربي كل حاجة فيه من قصات الشعر الغريبة والملفتة والالوان الجديدة والغير تقليدية, او تجربة قصات الشعر الجريئة, وقصات الشعر القصيرة اوي او القصة القصيرة من جنب وطويلة من جنب, يعني في السن ده قدامك اختيارات مالهاش حدود تقدري تعملي كل حاجة في شعرك في السن ده.
2- قصات شعر لسن 30 سنة:
في السن ده اختاري قصات الشعر اللي تكون سهل التعامل معاها بقدر الامكان, وحاولي تتجنبي الالوان الجريئة, ممكن تجربي قصة الشعر القصيرة لو شعرك خفيف, ولو شعرك سميك ممكن تعتمدي على قصة الشعر الطويلة, خبراء التصفيف عموما بينصحوا انك تعملي تغيير تدريجي في قصة واستايل الشعر ولكن ميكونش تغيير جذري على الشكل العام.
3- قصات شعر لسن 40 سنة:
في السن ده هتحاولي انك تجربي القصات اللي تبين سنك وشكل وشك اصغر, عشان كده لازم تختاري قصة الشعر بعناية جدا, اختاري قصات الشعر اللي مافيهاش تفاصيل كتير لان التفاصيل الزيادة او الاستايلات المعقدة ممكن تبينك اكبر وتزود عمرك, اتجنبي تعملي الشعر ستريت او مفرود خالص, افضل اختيار انك تعملي قصة او تسريحة شعر مع لمسة كيرلي خفيفة تديكي حجم اكبر للشعر.
4- قصات شعر لسن 50 سنة:
بينصح الخبراء بعد سن ال 50 انك تختاري قصة شعر واضحة ياما قصيرة اوي او طويلة اوي, وعشان تدي حجم لشعرك ممكن تعتمدي على قصة الشعر المدرجة اللي بتكون قصيرة من ورا وطويلة من الجناب مع كيرلي خفيف, اتجنبي صبغ الشعر بلون واحد الافضل انك تعملي درجات مختلفة من اللون, والافضل مع الشعر اللي طولة متوسط اعملي ستايل كيرلي خفيف للشعر, ومع الشعر القصير تكون التسريحة بحجم ولمسة طبيعية.
10 حيل لستايل الشعر هتخليكي تباني اصغر
