11 خدعة سهلة هتخلي صورك متتنسيش وتطلع زي المحترفين

اكيد كلنا لما بنيجي نتصور بنبقى عايزين صورنا تطلع مثالية ومن غير غلطات ومش كده تبقى صور احترافية زي صور المصورين المحترفين ويمكن بنقرا نصايح كتير على النت او في الكتب عن التصوير وازاي ممكن نطلع الصورة باحتراف, والنهاردة احنا هنسهل عليكم المهمة وجايبين لكم خدع هتخلي صورك تطلع باحترافية عالية جدا.

خدع هتخلي صورك تطلع باحترافية:

1- اعملي Framing او اطار للصورة:

حاولي تعملي فرامينج او اطار طبيعي للصورة بالمحيط اللي انتي موجودة فيه, ومش شرط يكون الاطار مربع او من كل الاتجاهات يعني ممكن يبقى شباك, او باب, او اشجار او حتى مجموعة فروع, وافتكري ان الاطار مش لازم يكون هو المسيطر على اللقطة كلها ولكن بس بيضيف لها.

2- الحركة:

تصوير الحركة من اللقطات اللي بتطلع حلوة جدا, وعشان تطلع معاكي باحترافية اكتر حاولي تصوريها من بعيد شوية او تسيبي مساحة حرة قدامها الصورة هتطلع حيوية اكتر.

3- الاتجاه:

مخنا بيستوعب المعلومات او بيستقبلها من الشمال لليمين, عشان كده الافضل انك تخلي التفاصيل المهمة في الصورة في الجانب اليمين من الاطار.

4- زاوية الكاميرا:

جربي زوايا مختلفة للكاميرا عشان تطلعي لقطات مختلفة يعني متثبتيش على زاوية واحدة لا جربي حاجات جديدة وطلعي الصور بطريقة جديدة ومش متوقعة, ولكن من غير ما نتجاهل اطار الصورة بتاعنا.

5- المساحة السلبية:

الصورة بيبقى فيها مساحتين, مساحة ايجابية بتكون هي الموضوع الرئيسي للصورة, ومساحة سلبية عادة بتكون خلفية الصورة, اختاري المساحة السلبية تكون بتأكد الموضوع الرئيسي للصورة مش تضيع الموضوع الرئيسي بتاعك.

6- العمق:

العمق بيدي الصورة تأثير كانها ثلاثية الابعاد وعشان تطلعي الصورة بالشكل ده في حاجات ممكن تعمليها تساعدك انك توصلي للصورة بالشكل ده:

• – صوري مثلا خطوط متوازية وتكون بتوصل لنفس النقطة في المسافة.

– الضباب هيديكي تدريج للصورة وكأنها طبقات.

– خلي التفاصيل الغامقة هي الاقرب في الصورة والافتح هي الابعد دي هيديكي عمق للصورة.

– لو عملتي Blur لخلفية الصورة او خليتها مش واضحة اوي هتظهر التفاصيل الاقرب في الصورة وده هيدي بُعد او عمق للصورة.

7- المقدمة:

لما تيجي تعملي عمق للصورة ماتنسيش المقدمة انك تضيفي لها اي تفصيله عشان تظهرها اكتر.

8- الظل والانعكاس:

الظل و الانعكاس عنصرين بيدوا للصورة جمال وبتطلع مختلفة ومميزة جدا, يعني اعملي مثلا صورة للموضوع الرئيسي بتاعك وانعكاسه او ظله.

9- الساعة الذهبية والساعة الزرقاء:

الساعة الذهبية هي الفترة اللي بعد شروق الشمس بشوية او قبل غروب الشمس, الضوء في الوقت ده بيبقى لونه دهبي ناعم ودافي, وبيخلي اللقطة تطلع بشكل حلو جدا.

الساعة الزرقاء دي بتستمر لمدة من 20 – 30 دقيقة خلال الفجر كل يوم الصبح, ووقت الغسق كل يوم بالليل هيكون اللون الازرق هو اللي غالب.

10- لقطة مغلقة:

مش لازم يكون عندك عدسة ماكرو مخصوص وتكلفة اضافية عليكي انك تشتري عدسة عشان تعملي لقطة مغلقة ممكن تعملي اللقطة دي حتى بتليفونك بخدعة بسيطة جدا حطي نقطة مية واحدة بس على عدسة الكاميرا بالظبط هتديكي نفس تأثير العدسة الماكرو وهتطلع نفس النتيجة بالظبط.

11- الممارسة اولا وبعدين التجربة:

مجرد ما تتعملي القواعد الاساسية للتصوير مارسيها واتمكني منها وبعدين ممكن تكسريها وتجربي حاجات جديدة وتضيفي للصور بتاعتك لمسات خاصة بيكي وتطوري من اسلوبك وتخليه مختلف.

افضل اوضاع للتصوير هتطلعك زي الموديلز في الصور