ازاي تعملي شعرك بالسيشوار في البيت ويطلع زي صالون التجميل بالظبط
اكيد كلنا جربنا في البيت اننا نعمل شعرنا بالسيشوار ولكن بتبقى مهمة صعبة بالنسبة لنا وبنيجي عند نص الطريق نتعب ونجهد وممكن منكملش او نعمله منوصلش للنتيجة اللي احنا عايزينها ومش بيطلع في الاخر زي ما بنعمله في الكوافير او في صالون التجميل, لكن النهاردة مع نصايحنا مهمة السيشوار هتبقى سهلة هنقولكم النهاردة على طريقة عمل السيشوار في البيت والخطوات اللي تخليه يطلع زي ما بتعمليه في الكوافير بالظبط.
طريقة عمل السيشوار في البيت:
1- استخدام سيشوار مريح:
اهم حاجة واول حاجة هي اختيار السيشوار مش لازم يكون السيشوار حجمه كبير لكن المهم يكون مريح وانتي ماسكاه في ايدك عشان تبقي متحكمة فيه كويس وانتي بتعملي الشعر, واتأكدي انه معاه القطعة بتاعته اللي بتتحط فيه من قدام وانه فيه درجة حرارة باردة.
2- اختاري حجم الفرشة المناسب:
تاني حاجة هو اختيار الفرشة المستديرة الخاصة بالسيشوار, الاختيار بيكون على اساس طول شعرك, الشعر الطويل بيحتاج فرشة مستديرة حجمها كبير, الشعر القصير ممكن تستخدمي معاه فرشة بحجم من 1.5 – 2, والشعر المتوسط فرشة بحجم من 1.5 – 3, والشعر الطويل فرشة بحجم من 3 – 5.
3- استخدمي منتجات مناسبة:
عشان السيشوار يطلع مثالي, اغسلي الاول الشعر بالشامبو وبلسم خفيف على الشعر استخدميه على اطراف الشعر بس هيبقى افضل مع السيشوار عشان ميبوظش منك.
بعد الغسيل حطي على الشعر حامي من الحرارة او سيروم على اطراف الشعر عشان تحمي الشعر من ضرر حرارة السيشوار وتحميه من الجفاف والتلف, بعد كده حطي موس على جذور الشعر عشان تديه Volume او حجم.
4- جهزي شعرك للسيشوار:
حطي صوابعك بين شعرك وارفعيه لفوق وركزي حرارة السيشوار على الجذور, لو شعرك خشن وكثيف اظبطي السيشوار على درجة الحرارة العالية, ولو شعرك كثافته متوسطه وفتلته عادية مش خشنة اظبطيه على درجة حرارة متوسطة مع سرعة كاملة لو عندك سرعات في السيشوار, وكرري تركيز الحرارة لحد ما الشعر ينشف بنسبة من 30 – 70 % لو عايزة الشعر يبقى كيرلي شوية, لكن لو عايزاة مفرود خالص يبقى خليه لحد ما ينشف اكتر.
5- تجفيف الشعر في اقسام:
– اول حاجة استخدمي كلبسات عشان تقسمي الشعر 4 اجزاء.
– قسم عند القوصة من فوق, وقسمين واحد في كل جنب, وقسم رابع للشعر من ورا, وممكن تقسمي تقسيمات اكتر حسب طول وكثافة الشعر وحجم الخصلة اللي هتقدري تتحكمي فيها بشكل كامل عشان تديكي النتيجة اللي انتي عايزاها في النهاية.
– من كل قسم هناخد خصلة بحجم 1 ½ يعني تكون خصلة مش سميكة اوي ولا رفيعة اوي.
– اسحبي خصلة الشعر ولفيها على الفرشة.
– اسحبي الشعر لفوق مع تركيز حرارة السيشوار, واتجنبي انك تسحبيه لتحت.
– استخدمي درجة الحرارة العالية مع الشعر الخشن والسميك, ودرجة الحرارة المتوسطة مع اي نوع شعر تاني غير السميك والخشن.
– ممكن بعد ما الخصلة تنشف وتتفرد معاكي تقللي درجة الحرارة للدرجة الاقل.
– حافظي على تدفق الهوا اللي خارج من السيشوار يكون موازي لخصلة الشعر, واستخدمي القطعة اللي بتتحط في السيشوار من قدام عشان تتجنبي هيشان الشعر.
– كرري نفس الخطوات مع كل خصلة لحد ما تخلصي الشعر كله.
– وبعد ما تخلصي كل خصلة وتفرديها كويس ممكن تبرديها بالهوا البارد في السيشوار.
6- انهي مع المنتجات المناسبة:
اخر خطوة بعد ما نخلص الشعر كله ممكن نرشه بسبراي مثبت للشعر عشان نحافظ عليه اطول فترة زي ماهو وممكن نستخدم انواع السبراي المضادة للرطوبة, خدي كام نقطة من سيروم الشعر وادهني بيها الاطراف بس عشان تديها لمعة.
7- اخطاء تجنبيها اثناء السيشوار:
– اتجنبي انك تلفي الشعر على الفرشة زيادة عن اللزوم لانه ممكن يسبب تشابك الشعر, خلي الفرشة بعيدة عن فروة الراس بمقدار تقريبا 1/4 بوصة, خلي الفرشة لحد نص الشعر وابدأي افردي بالسيشوار.
– اتجنبي انك تخلي السيشوار قريب اوي من الشعر, خليه فوق الشعر بمسافة بوصة تقريبا لان الضغط المباشر بفوهة السيشوار على الشعر ممكن يتسبب في جفافه وتلفه.
– متتسرعيش وانتي بتعملي عشان تخلصي اوام, لا ادي كل خصلة حقها في الفرد عشان في النهاية شعرك يطلع بالنتيجة اللي انتي عايزاها.
