بالخطوات والصور : ازاى تحولى مكياجك من مكياج صباحى الى مكياج مناسب لخروجات الليل
بعد يوم طويل وصعب فى الشغل او الجامعة بيبدأ المكياج اللى عملتيه الصبح يبهت و بشترك تتشربه ولو بشكل بسيط، فيحتاج انك تعمليله touch up كده تنعشي بيها مكياجك وتجدديه، خصوصا لو كنتى خارجة بالليل او عندك مناسبة مهمة و مش هتلحقى تهدى مكياجك الصباحى و تبدأى تعملى مكياج خروجة بالليل من الأول خالص. وعلشان نوفر عليكى الوقت والمجهود و فى نفس الوقت تبقى ضامنة انك تطلعى بلوك حلو ومكياج مظبوط مش ناقصه حاجه، فى المقال ده هنقولك بالصور و الخطوات ازاى تحولى مكياجك من مكياج صباحى الى مكياج مناسب لخروجات الليل بسهولة ..
بالخطوات والصور : ازاى تحولى مكياجك من مكياج صباحى الى مكياج مناسب لخروجات الليل
الادوات اللى هتحتاجيها :
cotton buds او قطن ازالة المكياج .
مناديل.
mist الوجه .
آداة تنى الروموش او lash curler.
فرشة آيشادو.
كونسيلر.
برونزر.
هايلايتر.
آيشادو.
قلم كحل اسود او بنى غامق.
ماسكارا.
زبدة كاكاو او مرطب شفايف.
قلم تحديد شفايف “اختيارى”.
ملمع شفايف او lip gloss.
الخطوة الاولى : انعشي بشرتك
لو كانت بشرتك بدأ لونها يبقى مش متوحد و مفيش وقت تعيدى اساس مكياجك من جديد استخدمى wipes خالية من الكحول لازالة المكياج لو كنتى حاسه انه مش هينفع تكملى بالأساس ده، لانه هيبقى سهل اننا نبدأ من غير اساس خالص عن اننا نبدأ على اساس مش صحيح. لكن لو لسه اساس مكياجك مناسب، يبقى هو ده بالضبط اللى احنا محتاجينه، خلينا نبدأ على طول وانعشى بشرتك بطريقة من دول:
لو حاسه انه بشرتك شكلها جاف، استخدمى ميست للوجه او face mist فى انك ترطبيها و تنعشيها زى مية الورد مثلا، و سيبيه دقيقة علشان بشرتك تتشربه كويس و بعد كده وحدى لون بشرتك باستخدام الكونسيلر.
لو بشرتك دهنية و حاسه انها بتلمع وشكلها oily استخدمى منديل واضغطى بيه على بشرتك علشان تتخلصى من كل الزيوت قبل ما تبدأى فى توحيد لون بشرتك باستخدام الكونسيلر.
الخطوة الثانية : جددى اساس مكياجك
فى الخطوة دى هتركزى على المناطق اللى فيها احمرار او حبوب وبدأت تبان و تغطيها كويس بالكونسيلر او باستخدام powder foundation مناسب علشان تعملى تغطية اعلى. استخدمى كميات قليلة علشان مايبقاش اساس مكياجك تقيل فى مناطق ومناطق لا.
حطى كمية قليلة من الكونسيلر تحت عينيكى وفى زوايا العين الداخلية و الخارجية لانها عادة بتبقى دى هى اغمق المناطق حوالين العين ويفضل يكون الكونسيلر افتح من لون بشرتك بدرجة وافرديه بطريقة الطبطة فى طبقة خفيفة.
لو فى اى كمية من المكياج اتكتلت عند زوايا عينيكى استخدمى قطعة قطن من المخصص لإزالة المكياج واضغطى عليها بالراحة علشان تشيليها قبل ما تبداى تحطى الكونسيلر.
بعد كده طبقى البرونزر على الخدين علشان تديهم لون و بعد البرونزر حطى الهايلايتر على عضمة الخد و عضمة الحاجب والزاوية الداخلية للعين علشان تدي لوشك اضاءة.
الخطوة الثالثة: خلي مكياج عنيكى أجرأ واعملى مكياج سموكى
فى الخطوة الثالثة من طريقة تحويل مكياج الصبح الى مكياج مناسب لخروجات الليل هنعمل مكياج سموكى بسيط لعينيكى علشان يبرزها ويديها لوك جرئ و واضح..
فى الخطوة الاولى من المكياج السموكى استخدمى الكحل وارسمى بيه خط رفيع على طول خط منبت الرموش على الجفن العلوى و السفلى.
بعد كده حطى كمية من الايشادو البنى متوسط اللون “يعنى لا فاتح اوى ولا غامق اوى” وفضل يكون مت matte و افرديه على كل مساحة الجفن العلوى من اوله لآخره، وممكن تستخدمى اى لون تانى تفضليه زى الرمادى الغامق او النبيتى الغامق مثلا.
استخدمى نفس لون الآيشادو على طول خط الرموش فى الجفن السفلى و خلى اللون قريب من جذور الرموش على قد ما تقدرى.
بعد كده استخدمى لون آيشادو غامق زى الاسود او البنى الغامق على الزاوية الخارجية للجفن المتحركن علشان تخلى اللوك يبان اقوى ويبرز عنيكي اكتر.
بعد كده ادمجى الآيشادو اللى الغامق مع الفاتح فى حركة لطيفة و استخدمى آداة تنى الرموش فى تنى رموشك علشان تبان اطول و توسع عينيكى.
الخطوة الرابعة: جددى الروج
آخر خطوة هى انك تحطى روج، بس لو كان روج الصبح اتسبب فى جفاف شفايفك او كان نشف على خطوط الشفايف استخدمى الاول زبدة الكاكاو او مرطب الشفايف علشان ترطبي بشرتك، بعد كده حطى روج بلون تفضليه، واستخدمى معاه lip gloss علشان تديله لمعة خفيفة.
اللوك النهائى ..
