10 اسرار ازاي تلبسي الكعب العالي
اكيد مافيش اختلاف على ان الكعب العالي لبسه بيدي اناقة ولوك مختلف خالص وحتى لو مش بنلبسه دايما لكن في اوقات مينفعش فيها غير لبس الكعب العالي زي مناسباتنا الخاصة مثلا او في سهرة, لكن في الغالب كتير من البنات بيخافوا يلبسوه لانه بيبقى المشي بيه مشكلة بالنسبة ليهم, عشان كده احنا النهاردة جايبين لكل بنات حوا اسرار ازاي تلبسي الكعب العالي وتبقي ليدي وانيقة وتحسي انك توب موديل وتكوني واثقة من نفسك ومرتاحة.
اسرار ازاي تلبسي الكعب العالي:
1- خدي خطوات صغيرة:
امشي بخطوات صغيرة وبطيئة ومن غير ما تتني ركبتك اكتر من المعتاد او الطبيعي, لانك لو مشيتي بخطوات كبيرة وبشكل سريع زي ما بتمشي في الاحذية اليومية او الرياضية لانه هيطلع مظهرك مش طبيعي.
2- خدي الخطوة من الكعب لاصابع القدمين:
عشان تمشي بشكل طبيعي ومريح خلي الكعب هو اللي يلمس الارض الاول يعني تبدأي الخطوة من الكعب وبعدين تنتقلي بسلاسة لصوابع القدم, الطريقة دي هتخليكي ماشية بشكل متوازن ومريح اكتر.
3- خلي ضهرك مفرود:
امشي دايما وانتي ضهرك مفرود, وكتافك مفرودين, ودقنك متوازية مع الارض, بالطريقة دي هتحافظي على عضلات بطنك مشدودة ومعدتك مسطحة, وهتباني انحف واخف وزن وانتي ماشية.
4- امشي في خط مستقيم:
وانتي ماشية تخيلي ان في خط مستقيم قدامك وامشي عليه, وخلي كل رجل قدام التانية وتكون رجلك مفرودة يعني زي ماشية الموديلز على Cat walk, الموضوع يمكن يحتاج ممارسة شوية لكن مع الوقت هتتعودي عليها.
5- استعدي في البيت:
لو عندك مناسبة خاصة او فرح حاولي انك تستعدي قبلها في البيت بشوية حاجات:
– امشي بالشوز اللي هتلبسيه في البيت شوية قبل المناسبة عشان تتمرني عليه وميبقاش الموضوع صعب عليكي ويوجعلك رجلك.
– البسي الشوز اللي هتبقي مرتاحة فيه يعني متجيش على نفسك وتلبسي مقاس مش مناسب مثلا وتقولي اهو يوم وخلاص لان اليوم ده ممكن يخلي رجلك تعبانة شهر, وممكن تجربي انك تلبسي شراب صوف وتلبسي عليه الشوز لمدة 10 دقايق عشان تخلي مرن اكتر واريح في الرجل, وخربشي نعل الجزمة من تحت بمقص او باي حاجة حادة عشان ميبقاش ناعم اوي ويزحلقك.
– اتمرني على طلوع السلم بالكعب العالي, حطي رجلك كلها على السلم لو نازلة, ولو طالعة خلي خطوتك باطراف الاصابع على السلالم.
– البسي الشوز اللي يكون نعله مريح ومبطن عشان ميتعبكيش وانتي لابساه وتبقى رجلك مرتاحة فيه.
6- اتعلمي الوقوف بالكعب العالي:
اكيد مش المشي بالكعب بس هو المهم كمان طريقة الوقوف وانتي لابسة الكعب العالي مهمة انك تبقي واقفة بشكل حلو ومتوازن, وعشان تقفي واقفة صح ومتوازنة خلي كعب القدم عند نص القدم التانية بزاوية, وخلي وزنك كله على الرجل التانية ولو تعبتي من الواقفة دي انقلي الوزن على الرجل التانية يعني بدلي ما بين الاتنين.
7- ادي رجلك استراحة:
لو مضطرة انك تلبسي الكعب العالي طول اليوم حاولي انك تدي رجلك استراحة من وقت للتاني يعني اقعدي شوية وريحيهم بدل الواقفة او المشي لكن متقلعيش الشوز لان رجلك هتبقى تعبانة ومنتفخة وعشان تلبسي الشوز دي بالحالة دي هتبقى مهمة صعبة ومؤلمة.
8- متلبسيش الكعب العالي على طول:
حاولي على قد ما تقدري انك متلبسيش الكعب العالي باستمرار الا لو مضطرة لده بدلي دايما ما بين ارتفاعات الكعوب المختلفة وركزي اكتر على الشوزات الفلات المريحة في خروجاتك اليومية.
9- اختاري الشوز المناسب:
لو انتي متعودة طول الوقت تلبسي الشوزات الفلات والاحذية الرياضية وجيتي في وقت عايزة تلبسي كعب متبدأيش بارتفاعات عالية اوي يعني متبدأيش مثلا بارتفاع 4 سم على طول لكن البسي بالتدريج ابدأي بال 2 او 3, او تجربي تلبسي الكعب الودجز الاول لانه بيبقى اريح في اللبس, او الشوزات اللي بحزام عشان تبقى ماسكة على الرجل ومتحكمة فيه اكتر وهتبقى مريحة اكتر بالنسبة لك وهتخليكي تحافظي على توازنك بشكل اسهل.
10- اختاري المقاس المناسب:
اختاري المناسب لرجلك وابعدي تماما عن المقاس الضيق ولو حتى بشكل بسيط ولو هتختاري ما بين الضيقة اوي او اللي فيها وسع شوية يبقى تختاري الاوسع لانها اسهل في التعامل معاها انك ممكن تحطي لها فرش وتظبطيها على مقاس رجلك لكن الضيقة بيكون من الصعب انها توسع بالرغم ان في طرق لتوسيع الجزمة لكن لو ضيقة اوي بيكون صعب معالجة المشكلة.