7 انواع من الاصحاب كلنا محتاجينهم في حياتنا !

بقلمريهام محمود فيعلاقات visibility3040

اكيد الاصحاب مهمين في حياتنا وكلنا عندنا اصحاب منهم القريبين مننا اوي او اللي مجرد زمالة جامعة او عمل واكيد كل صاحبة بتبقى مختلفة عن التانية في شخصيتها واسلوبها  وفي كل حاجة لانه كل واحد ليه شخصيتة المستقلة اللي مش بتشبه حد, لكن في انواع اصحاب محتاجينهم في حياتنا, وده اللي هنعرفه النهاردة مع بعض من خلال موضوعنا.

انواع اصحاب محتاجينهم في حياتنا:

1- صاحبة لحياة الحفلات:

الصاحبة دي اللي بتكون منفتحة على كل حاجة بتتكلم في كل حاجة وفي اي حاجة يعني لو فتحتي معاها كلام في اي موضوع تلاقيها متجاوبة معاكي ومتفاعلة جدا, اللي مش هتحكم عليكي او تنتقدك لو لقيتك مثلا اشتريتي حاجة غريبة او غير تقليدية, تقدري تاخدي رايها في اي حاجة وهتديكي نصايح هتفيدك, هترحب بيكي بطريقة حماسية ومرحة جدا في اي مكان تكوني متواجدة فيه, مستعدة تروح معاكي اي حفلة او اي حدث يعني مستعدة تروح معاكي اي مكان وتشاركك اي حاجة.

2- صاحبة معالجة:

ودي نوع الصاحبة اللي بتكون هادية اوي وبتحب الطبيعة, وده النوع اللي مش هتديكي نصيحة الا لما تتأكد او تعرف انها الصديقة المفضلة او المقربة بالنسبة لك, ومش بتخاف تكون صريحة او مباشرة مادام عارفة ان نصيحتها هتكون مفيدة ليكي وهتساعدك في النهاية, بتحب تقرا جدا الموضوعات الخاصة بالمسائل النفسية والمحافظة على الصحة لانها بتشوف ان الموضوعات دي اللي هتساعدها توصل للسلام النفسي, لما بتقضي معاها وقت بترجعي من عندها هتحسي انك كنتي مقضية اليوم في منتجع صحي, لو في يوم بتعاني من اي ضغط او توتر هتبقي عارفة ان هي دي الصاحبة اللي هتلجأي لها على طول في الحالة دي مجرد بس ما تبعتي لها رسالة وترد عليكي وتكلمك هتعتبر هي المعالجة بالنسبة لك.

3- الصاحبة المضحكة:

النوع ده بتكون شخصيتها ما بين انها مضحكة وخجولة بردوا الى حد ما يعني بتحقق توازن مثالي ما بين المرح والعملية في شخصيتها, بتاخد بالها من كل حاجة بتعملها ومن تصرفاتها بالرغم انك ممكن ماتلاحظيش ده واضح في شخصيتها, وبتحب تعلق على كل حاجة وبتضحك على على كل حاجة بتقولها, هي شخصية كوميدية وبتحب يكون ليها جمهور يضحك على تعليقاتها بس في نفس الوقت عاقلة وبتقدر الاحترام, ودايما هتلاقي عندها اجابة على الاسئلة الغريبة, وهتكون موجودة عشانك لو احتاجتي لها بنسبة 110%, والشخصية دي بتبتسم وتضحك في كل مواقف الحياة سواء حلوة او وحشة دايما بتبص للجانب الايجابي في كل حاجة.

انواع اصحاب محتاجينهم في حياتنا
انواع اصحاب محتاجينهم في حياتنا

4- الصاحبة النشيطة:

دي الشخصية اللي ممكن تعمل اي حاجة وكل حاجة في اي وقت, وممكن تعملك اي خدمة محتاجاها منها, ودي الصاحبة اللي ممكن تروحي تباتي عندها وهتبقى مرحبة بده جدا هي تعتبر زي الام التانية بالنسبة لك, ممكن تعمل اي حاجة عشان تساعدك على قد ما تقدر, وبتبقى مشتركة في نشاطات كتير جدا او متطوعة جمعيات او مشروعات مجتمعية لانها مش بتعرف تعيش غير بالطريقة دي وهي دي حياتها على طول.

5- الصاحبة الاجتماعية:

النوع ده تعتبر صديقة الكل حتى مع اللي هي شايفة انهم مش بيحبوها لانها بتقدر تكسب حب اللي حواليها وتخليهم يتعاملوا معاها كويس, بتهتم بكل شخص تقابله وبتقابلة بحرارة وبحب جدا, ممكن تسمعك وبتبقى حابة تعرف ايه اللي حصل في يومك.

6- الصاحبة اللطيفة:

دي الشخصية الهادية والمستقرة, الصادقة والرقيقة, اللي دايما هتلاقيها متعاطفة معاكي لو انتي متضايقة او بتعيطي هتعيط على عياطك وتحزن لحزنك ولو حد ضايقك او جرحك هي هتكرهه طول العمر عشان اذاكي, بس هي من نوع الصديقات اللي مش بتقدم مساعدة اوي هي الشخصية اللطيفة الكيوت اللي بتتعامل بلا مبالاه شوية عشان كده لازم تعرفي تتعاملي معاها بشخصيتها زي ما هي كده.

7- الصاحبة الصريحة:

كتير مننا بيشوف انه صعب انك تصاحبي الشخصية الصريحة لان تقريبا معظمنا مش بيحب يسمع الصراحة او الحقيقة, لكن النوع ده من الاصدقاء الرائعين جدا اللي لازم يكونوا موجودين في حياتنا, هي بتتكلم دايما بصراحة وبعلانية مش بتخبي, ومش هتلاقي حد بيحبك اكتر من النوع ده من الاصحاب عشان كده هي دايما بتكلمك بصراحة لانها بتحبك, وممكن تعمل اي حاجة عشانك عشان كده متفرطيش في الصاحبة دي واحتفظي بيها دايما في حياتك.

في النهاية الاصدقاء الحقيقين مهمين جدا في حياتنا وهما اللي بيشاركونا كل تفاصيل حياتنا سواء في الفرح او في الحزن يعني في يوم فرحك, في ولادة اطفالك, في نجاحك في اي حاجة حلوة هتكون معاكي وكمان في الحزن هتشاركك لو متضايقة او حزينة لاي سبب هتلاقيها بتعيط معاكي وبتشاركك مشاعرك, يعني الاصدقاء من الحاجات الجميلة في حياتنا اللي لازم نحافظ عليها في حياتنا.

ياللا قولوا لنا مين من الانواع دي موجودة في حياتكم, ومين اللي لسه مش موجودين ومحتاجين انهم يكونوا موجودين.

8 طرق يساعدوكي ترجعي علاقتك مع صديقتك لو بعدتوا مع الوقت

8 طرق يساعدوكى ترجعى علاقتك مع صديقتك لو بعدتوا مع الوقت
8 طرق يساعدوكى ترجعى علاقتك مع صديقتك لو بعدتوا مع الوقت