10 نصايح مفيدة تعملى بيها روتين يومى افضل ليكى ولصحتك
شغل ومتطلبات كل يوم مابتخلصش، واحيانا بيبقى روتين كل يوم هو نفسه اللى بيتكرر ، الشغل او الجامعة و البيت والاولاد و غيره فبنحس بملل وكمان بنحس انه اليوم بيعدى و بنبقى مرهقين فى الاخر مع اننا ماعملناش حاجة مختلفة او حتى ماعملناش حاجات كتير من المفروض كانت تخلص. فى المقال ده هنساعدك تحلى المشكله دى وهتعرفى ازاى ترتبي روتين كل يوم وتخليه افضل، اعرفى معانا 10 نصايح مفيدة تعملى بيها روتين يومى افضل ليكى ولصحتك ..
10 نصايح مفيدة تعملى بيها روتين يومى افضل ليكى ولصحتك
1- البسى الصبح اسرع :
اول خطوة علشان تعملى روتين يومى أفضل هى انك تلبسي الصبح أسرع، وده هيحصل بأنك ترتبي هدوم الشغل وتحضريها من بالليل بدل ما تصحى الضبح تضيغى الوقت فى انك محتارة تلبسي ايه.
2- اعملى فطار اسهل :
خلى فطارك يبقى سهل وسريع لكن فى نفس الوقت مفيد ومتكامل، جهزى فطارك من بالليل وحطيه فى التلاجة او اعملى حاجه to go تاخديها معاكى وانتى نازلة وتبقى جاهزة على الاكل على طول.
3- استغلى ساعات نشاطك :
كلنا بييجى علينا كده ساعات فى اليوم ونحس انه عندنا طاقة ونشاطنا ، فلازم تستغلى ساعات النشاط دى فى انك تعملى الحاجات اللى مطلوبة منك او اللى متاخرة . لو كنتى فى المكتب وحسيتى بدفعة النشاط والطاقة دى حاولى تقللى من الحاجات اللى ممكن تشتتك زى التليفون و الفيسبوك والايميلات، وحاولى كمان وقتها لو عندك ميتنج مثلا انك تحاولى تأجليه. ولو الشغل كتير ومش هينع تأجلى حاجه يبقى امسكى notebook واكتبي الحاجات اللى عايزة تعمليها او اى افكار تجيلك وحاولى تنفذيها.
4- رتبى البيت بشكل منتظم :
حاولى تحطى جدول اسبوعى لنظافة البيت وترتيبه علشن ماتبقيش متوترة وتشيلى هم تنضيف البيت ده من على قلبك والتنضيف المتقسم ده هيتحول تدريجيا بعد كده لعادة مش هتحسي بيها. خلى الروتين الاسبوعى للتنضيف و الترويق، ولو عايزة تجددى فى البيت وتعملى تغييرات كبيرة زى تغييرات الديكور والعفش وخلق المساحات يبقى خليه بشكل شهرى واحدة واحدة.
5- رتبى المطبخ :
ترتيب الخزانات فى المطبخ او انه يبقى المطبخ نضيف هيسهل عليكى تحضير الاكل و يخلى الخطوة دى تاخد وقت قليل، وده هيوفرلك الوقت تعملى نشاطات تانية فى يومك.
6- اعملى نظام لترتيب البريد الخاص بيكى والاوراق المهمة :
لو كان شغلك فيه جوابات او معاملات ورقية كتير وبتوه منك وبتتلغبط، ابتكرى نظام لترتيب البريد والورق الخاص بيكى و الاوراق المهمة علشان تلاقى كل حاجة بسهولة و توفرى وقت ومجهود، ممكن تشترى منظم ادوات مكتب زى اللى فى الصورة وهتلاقيه بسهولة فى المكتبات ومحلات تجهيز المكاتب.
7- خلى روتين العناية ببشرتك بسيط :
لو مشينا ورا كل نصيحة للعناية او الاهتمام بالبشرة او الشعر يبقى هنستعمل كريمات كتيرة جدا و ممكن نفضل ساعة نحط كريمات على وشنا كل يوم الصبح، وساعة زيها قبل ما ننام، نصيحتنا هنا لتوفير الوقت وعمل روتين يومى افضل هى انك تخلى روتين العناية ببشرتك بسيط علشان ماترهقيش بشرتك او تضريها وكمان علشان توفرى الوقت. خليكى حريصة دايما انه يبقى روتين العناية ببشرتك بسيط لكن كمان مفيد.
8- امشى على check list :
الـ check list او الـ to – do list من اكتر الحاجات النافعة والمفيدة فى ترتيب روتين يومك، اعملى check list منفصلة لكل يوم وسجلى فيها كل الحاجات المطلوبة منك لكل يوم وكل ما تنجزى حاجه منهم علمى عليها فى الـ list. بالطريقة دى هيبقى يومك مترتب ومش هتنسي حاجة و كمان هتحسي انك بتتقدمى في يومك وانك بقيتى تنتفعى بيه اكتر.
9- خلى الاولوية للتمارين :
التمارين الرياضية هى اساس الصحة والشباب والجمال ولازم تكون على قمة اولويات روتينك اليومى كل يوم، خلى دايما التمرينات الرياضية جزء مهم ماتستغنيش عنه فى روتين كل يوم.
10- اهتمى بالحيوان الاليف فى اوقات محددة :
لو كان عندك حيوان اليف زى الكلب او القطة بيتطلبو عناية واهتمام خاص زى انك تخرجى تمشيهم ، خصصى لحيوانك الاليف وقت محدد كل يوم تعملى فيه كده ، يعنى يبقى نفس الوقت كل يوم بتخرجى تمشي الكلب او القطة مثلا، ده هيساعدك تخلى الحيوان الاليف اهدا وهيخليه يسمع الكلام اكتر.
شوفى كمان ازاى تخلى يومك حلو و تقللى من التوتر و الضغط بخطوات بسيطة ؟!