10 انواع اكل هتساعدك يبقى شكلك اصغر ب10 سنين

اكيد كلنا بنتمنى ان بشرتنا تفضل شباب وشكلها نضر على طول واكيد البشرة بتتغير مع السن ده الطبيعي لكن احنا ممكن نحافظ عليها صحية وشباب اطول فترة ممكنة عن طريق نظامنا الغذائي لانه بيلعب دور مهم جدا في صحة البشرة, لانه زي ما احنا بنقول دايما ان العناية بتبدأ من جوه قبل بره, عشان كده النهاردة هنقولكم على انواع اكل هتخلي بشرتك شباب وصحية وهتساعدك ان شكلك يبان اصغر ب10 سنين.

انواع اكل هتخلي بشرتك شباب:

1- الافوكادو:

الافوكادو من الاكلات المفيدة جدا لانه غني بالدهون الصحية, لو اكلتي منه واحدة يوميا ده بيساعد على تقليل مستويات الكوليسترول الضار في الدم, وبيدعم عملية تجديد البشرة, بيوفر للجسم فيتامين C والبوتاسيوم, ومضادات الاكسدة اللي بتحافظ على شباب البشرة ضد الشيخوخة, وغني جدا بحمض الفوليك.

ممكن تجربيه كعصير وتشربيه اضربيه مع لبن وسكر في الخلاط واشربي منه كل يوم.

2- التوت:

كل مشتقات التوت زي الفراولة, والتوت الاسود, والتوت الاحمر, العنب, كل انواع الفاكهة دي بتحتوي على مضادت الاكسدة اللي بتمنع او بتأخر تلف خلايا البشرة.

 وكمان مفيدة من الناحية الصحية لانها بتساعد على تقليل الم وتورم المفاصل, بتحسن القدرات المعرفية, بتساعد على منع امراض المسالك البولية, ومرض الزهايمر, والخرف.

3- الجزر:

الجزر غني بالبيتا كاروتين اللي الجسم بيحوله لفيتامين A وده بيساعد على حماية العين وبيساعد الشبكية واجزاء تانية من العين انها تأدي وظيفتها بشكل سليم, وبالاضافة للفوائد دي مفيد جدا للبشرة وبيحميها من التجاعيد اللي ممكن تحصل بسبب التعرض للاشعة فوق البنفسجية.

لكن لازم نخلي بالنا اننا منطبخش الجزر زيادة عن اللزوم لان ده ممكن يقلل من فايدتة والفيتامينات الاساسية الموجودة فيه, الافضل ناكله كسناكس بين الوجبات, او في السلطة.

4- الفاكهة الحمضية:

الفواكة الحمضية زي البرتقان, والجريب فروت, والليمون, واليوسفي وغيرها من الفواكة, كلها غنية بفيتامين C وحمض الفوليك اللي بتساعد على تقليل مستوى الكوليسترول وحمض اليوريك في الدم لو اكلتيها بشكل منتظم, كمان بتساعد على منع مشاكل الدورة الدموية, وامراض القلب, وامراض زي النقرس اللي معروف انه بيسبب الم في المفاصل.

جربي اشربي عصير الليمون على الريق ده بيساعد على تنضيف القولون وبيزيل سموم الجسم, بالاضافة لده كمان هيساعد جسمك على امتصاص العناصر الغذائية, وده كله بينعكس بشكل ايجابي جدا على شكل البشرة وعلى الصحة بشكل عام.

5- الثوم:

الثوم غني بالخصائص المضادة للفطريات والجراثيم, والمواد المضادة للشيخوخة, ويعتبر الثوم من افضل المضادات الحيوية الطبيعية, وبيساعد كمان على توازن مستوى الكوليسترول في الدم, وبيحسن الدورة الدموية, وارتفاع ضغط الدم, بيساعد على الحد من من خطر الاصابة ببعض انواع السرطان.

6- الشوكولاتة الغامقة:

الشوكولاتة الغامقة بتحتوي على المواد المضادة للاكسدة زي الفلافونويد اللي بيساعد البشرة انها تحمي نفسها من اضرار الاشعة فوق البنفسجية, ومحاربة الجذور الحرة اللي بتسبب شيخوخة البشرة وبتحافظ على توازن ورطوبة البشرة.

لكن نخلي بالنا ان الشوكولاتة اللي بتحتوي على الاقل على نسبة 75% من الكاكاو هي اللي ممكن تدينا كل الفوايد المضادة للاكسدة, عشان كده لما نيجي نشتري اي نوع شوكولاتة غامقة نبص على نسب مكوناتها ونجيب اللي نسبة الكاكاو فيها متقلش عن نسبة ال 75%.

7- زيت الزيتون:

زيت الزيتون واحد من المصادر الرئيسية لحمض الفا لينوليك اللي بتساعد على الحفاظ على البشرة رطبة ومتوازنة, وبتمنع الشيخوخة.

بكل بساطة ادهني بشرتك وحوالين العين بزيت الزيتون كل يوم قبل النوم, ده هيحافظ على نعومة ورطوبة بشرتك, وهيقلل من الخطوط الرفيعة والتجاعيد.

8- الطماطم:

الطماطم غنية بالمواد الغذائية المفيدة جدا للبشرة والصحة بشكل عام, بتحتوي على كمية كبيرة من فيتامين A و C وحمض الفوليك, بتحتوي على الليكوبين اللي هو مسئول عن اللون الاحمر للطماطم والعنصر ده يعتبر من العناصر المضادة للاكسدة, بيحمي البشرة من الاشعة فوق البنفسجية, كمان ليه دور كبير جدا في الوقاية من امراض القلب والشرايين, والامراض المعدية, ومادة الليكوبين بتبقى اسهل ان الجسم يمتصها لما تكون الطماطم مطبوخة والافضل تكون مطبوخة مع زيت الزيتون عشان نزود فايدتها.

9- الاسماك الزيتية:

الاسماك الغنية بالزيوت زي سمك السلمون والتونة والانشوجة وسمك الترس تعتبر مصدر كبير جدا للاحماض الدهنية اوميجا3 اللي بتساعد على تجديد الخلايا والحفاظ على اقل مستوى للكوليسترول في الدم, ومفيدة جدا للعناية بالبشرة لانها بتمنع الضرر التأكسدي اللي بيحصل للبشرة مع التقدم في العمر.

ممكن تجربي تعملي السلمون في الفرن مع رشة ملح وفلفل وروز ماري وشرايح الليمون وزيت الزيتون, هتبقى وجبة لذيذة جدا ومفيدة لبشرتك وصحتك.

10- الكركم:

الكركم من انواع التوابل المفيدة جدا للصحة بشكل عام, بيساعد على الحماية من السرطان, ومفيد جدا للجهاز الهضمي, وغني بالمواد المضادة للالتهابات, بالاضافة انه بيمنع شيخوخة البشرة, غير كده كمان بيمد الجسم بالطاقة وبيحسن المود وبيقلل من التوتر والضغط.

ممكن تستخدميه في الاكل وتضيفيه لاطباقك بيدي طعم لذيذ جدا وهتسفادي منه لبشرتك ولصحتك.

12 مكون طبيعي هيساعدك تحافظي على بشرتك شباب على طول