16 فكرة مختلفة و مميزة لهدايا بسيطة فى عيد الام
عيد الام من المناسبات المهمة لاننا بنحتفل فيها بنعمة وجود امهاتنا فى حياتنا، لكن ده مايمنعش اننا بنقع فى نفس الحيرة كل سنة وبنبقى مش عارفين نجيب ايه نقدمه كهدية، لاننا بنبقى عايزين نخرج بره الهدايا التقليدية ونقدم حاجه جديدة ومميزة. علشان كده فى المقال ده هنقولك على 16 فكرة مختلفة و مميزة لهدايا بسيطة فى عيد الام ..
16 فكرة مختلفة و مميزة لهدايا بسيطة فى عيد الام
1- funny mug :
ممكن تعملى لمامتك مج وتطبعيلها عليه جملة ظريفة او جملة تكون بتحبها او بتقولها كتير، هدية زى دى بتعتبر بسيطة ومش مكلفة ودمها خفيف :)
funny mug
2- علبة شوكولاتة :
طبعا مفيش حاجه احلى من علبة شوكولاتة تبقى هدية فى عيد الام ، هاتى لمامتك علبة شوكولاتة من النوع اللى بتفضله وخليها تستمتع بحاجة حلوة.
3- cover لجواز السفر والاوراق المهمة:
تقدرى كمان تجيبيلها cover من الجلد لجواز السفر الخاص بيها او اوراقها المهمة، جربى تحفري عليه اسمها و تجيبيه بلونها المفضل.
4- علبة او tray لاكسسوارتها :
ممكن تعبرى عن حبك لمامتك بأنك تعمليلها علبة او Tray للاكسسوارات بتاعتها، الحاجات دى ممكن تعمليها بأى تصميم او شكل تحبيه و بتبقى تكلفتها معقولة.
5- حلق على الموضة :
لو مامتك من هواة الاكسسوارات اشتريلها حلق جديد على الموضة ومش لازم يبقى دهب او غالى اوى، ممكن تجيبيه فضة و هيبقى هدية قيمة جدا.
6- سكارف مختلف وجديد!
السكارف ده بيعتبر هدية مميزة جدا لو كانت مامتك من محبين القراية. اطبعى الجزء المفضل لمامتك من رواية او كتاب بتحبه على سكارف و قدميه كهدية جديدة ومختلفة.
7- هدوم مريحة للبيت :
طبعا ممكن تشترى لمامتك هدوم مريحة للبيت تنام فيها، خصوصا اننا داخلين على موسم الصيف وكلنا بنجدد من دولابنا.
8- شنطة او محفظة :
ممكن تقدمى شنطة او محفظة جديدة من موضة الصيف السنة دى هدية فى عيد الام .
9- عقد او كوليه :
برده العقد او الكوليه بيعتبر هدية مناسبة جدا زى الحلق اللى اتكلمنا عنه لو كانت مامتك من محبين الاكسسوارات.
10- اسورة للتمارين الرياضية – fitness bracelet :
لو كانت مامتك بتمارس رياضة بشكل منتظم، تبقى الاسورة دى هدية مناسبة جدا. الاسورة دى بتعد الخطوات اللى بنمشيها كل يوم وفى منها نوع متقدم اكتر بيعد ضربات القلب وبيقيس ضغط الدم اثناء التمارين الرياضية، وكمان شكلها stylish وعلى الموضة. تقدرى تلاقى الاسورة دى فى محلات المستلزمات والاجهزة الرياضية.
11- bath bomb بفكرة جديدة !
ساعدى مامتك تسترخى فى يوم عيدها بأنك تشتريلها bath bomb ، بس فاجئيها وخبى جواها هدية زى خاتم مثلا مامتك تلاقيه و تتفاجئ بيه لما تيجى تستخدمها، شوفى ازاى تعملى الـ bath bomb بنفسك فى البيت .
12- شمعة بريحة مميزة:
اشترى شمعة او مجموعة شموع بريحة هادية ومميزة تساعد مامتك على الاسترخاء آخر كل يوم.
13- مج للقهوة:
المج هيفضل طول عمره من الهداية اللى مابتروحش عليها ابدا، ممكن تشترى مج للقهوة شكله مميز.
14- مجموعة منتجات للعناية الشخصية:
دلعى مامتك بانك تشتريلها مجموعة منتجات للعناية الشخصية زى منتجات العناية بالبشرة والشعر المختلفة وساعديها تهتم بنفسها.
15- جوانتى للفرن:
جربى كمان تجيبيلها جوانتى للفرن محفور عليه اسمها بالتطريز فى عيد الام ، هدية زى دى بسيطة وتقريبا مش مكلفة خالص وشكلها بيبقى حلو.
16 – اسورة شيك :
كملى بقى طقم الاكسسوارات وهاتى اسورة شيك مع الحلق او الكوليه اللى قلنا عليهم فوق :)