بالخطوات والفيديو: نصايح ازاى تعملى مكياج الـ smokey eyes صح من kendall jenner

آية حسان

في

3995

smokey eyes make up او مكياج العيون السموكى بيعتبر من اصعب انواع المكياج اللى ممكن تعمليها، لانه بيحتاج تكنيك وتمكن عالى جدا فى استخدام ادوات المكياج، وطبعا معظمنا مابيعرفش غير طريقة واحده ليه وهى اننا بنستخدم درجات الالوان الترابية من الافتح للاغمق و بنبدأ من الزاوية الداخلية للعين للزاوية الخارجية..

حيلة جديدة بتعرفنا عليها الموديل المعروفة Kendall Jenner، الـ make up artist الخاص بيها بيخلط بين الايشادو الكريمى مع الايشادو البودر لكن بطريقة مختلفة ومميزة جدا. وعلشان نسهل الموضوع عليكى و تفهمى اكتر، بنات حوا فى المقال ده هتقولك كل اللى محتاجة تعرفيه علشان تعرفى تعملى مكياج العيون السموكى على طريقة Kendall Jenner بالصور و الفيديو كمان ..

بالخطوات والفيديو: نصايح ازاى تعملى مكياج الـ smokey eyes صح من Kendall Jenner ..

تحضير البشرة:

بعد ما تعملى الـ base make up بتاعك او اساس المكياج اللى هوالفاونديشن، الكونسيلر، ورسم الحواجب بقلم او بودرة الحواجب هييجى الدور على العيون، وهنا هنستخدم ايشادو كريمى+ ايشادو بودرة، بأى الوان تحبيها.

الخطوة الاولى:

فى الخطوة الاولى من مكياج الـ smokey eyes هنبدأ نحط الايشادو الكريمى باستخدام فرشةصغيرة و تكون flat علشان تقدرى تتحكمى فيها اكتر، و نحط الايشادو الكريمى على الزاويتين الداخلية و الخارجية للعين بس، لكن مش على نص الجفن ، اهم حاجه فى الخطوة دى هى انك تبقى حريصة انه نص الجفن يبقى مفيش عليه ايشادو خالص، لانه بالطريقة دى هتخلى عيونك تبان عميقة اكتر بسبب الايشادو الكريمى على الاطراف و هتبان اوسع لما نستخدم metallic powder على الجفن من النص.

الخطوة التانية:

دلوقتى ميعاد اللوس بودر آيشادو loose powder eye shadow ، باستخدام فرشة كثيفة وصغيرة لانها هتكون افضل فى الدمج. هتبدأى تحطى البودر آيشادو على نص الجفن بالضبط و بعد كده تعملى دمج خفيف مع الايشادو الكريمى اللى حطيناه فى الاول، الفكرة فى مزج الايشادو الكريمى مع اللوس آيشادو او الآيشادو البودر انه هيدوم معاكى طول اليوم حتى لوقت الليل اكتر من استخدام اى واحد فيهم لوحده. و كمان استخدام الايشادو الكريمى تحت البودر هيسهل استخدامك للبودر وهيخلى الدمج اسهل بكتير و هيخلى اللون يبان اوضح، وده هيخلى عينيكى تبقى متحددة ويديلها لوك جرئ، وتقدرى تستخدمى التكنيك ده فى دمج الوان الايشادو على طول.

الخطوة التانية

الخطوة التالتة:

علشان نبدا نعمل اللوك السموكى الواضح والجرئ، معظمنا بيستخدم قلم الكحل فى تحديد خط الرموش فى الجفن العلوى علشان نخلى الرموش تبان اغمق و كثيفة اكتر، لكن نصيحة Kendall Jenner هى انك تستخدمى الكحل على خط الرموش فى الجفن السفلى، ممكن تحسي انها مش فارقة كتير لكن الطريقة دى هتحدد عينيكى وتوسعها لانه الكحل الاسود هيعمل contrast مع بياض العين فهتبان منورة.

الخطوة الرابعة:

فى الخطوة دى هنخلى اللوك يبان حاد وعميق اكتر، باستخدام الفرشة هنحط ايشادو بودر بلون اسود عند زوايا العين الداخلية و الخارجية مكان ما حطينا الايشادو الكريمى فى الاول خالص. بعد كده هتدمجى بفرشة صغيرة و تكون كثيفة زى اللى استخدمناها فى الاول ، الخطوة دى هتخلى اللون فى زاوية العين الداخلية عند مدمع العين والزاوية الخارجية يبقى اوضح وكمان هيخلى اللون اللى عملناه بـالـ loose powder eye shadow يبقى منور و highlighted. وعلشان تخلصى اللوك السموكى هنرسم خط رفيع على طول خط الرموش فى الجفن العلوى بـ eyeliner سائل اسود او ممكن تستخدمى الـ gel liner.

اللوك النهائى:

وبكده تكونى وصلتى للوك النهائى للـ smokey eyes على طريقة مكياج Kendall Jenner ! الطريقة دى هتنجح معاكى فى كل مرة تستخدميها وتقدرى تعملى اللوك ده لخروجاتك بالليل او حفلات العشاء والمناسبات من غير ما تقلقى، والمميز فى الطريقة ده انه حتى بعد مرور خمس ساعات الايشادو مش هيسيح و هيفضل ثابت معاكى وممكن كمان ترسمى خط بالايلاينر الاسود او البنى الاول قبل ما تبداى فى عمل اللوك ده علشان يساعدك كأساس للوك ويخليه يدوم لفترة اطول .