7 تمارين فعالة للتخلص من الدقن المزدوجة

بقلمريهام محمود فيتخسيس الوزن visibility3939

كتير من البنات بيعانوا من مشكلة الدقن المزدوجة حتى بعد الرجيم او التخلص من الوزن الزيادة المشكلة مش بتتحل بشكل كامل وساعات المشكلة بيكون سببها ترهل عضلات الوجه مع التقدم في العمر, هيبقى انسب حل ليها ايا كان سببها هي التمارين اللي مش بس هتساعد على التخلص من الدهون في المنطقة دي كمان بتخليها مشدودة وبترجعها لشكلها الطبيعي, والنهاردة جايبين لكل بنات حوا 7 تمارين للتخلص من الدقن المزدوجة.

تمارين للتخلص من الدقن المزدوجة:

– احماء العضلات:

زي اي تمارين تانية بنعملها للجسم بنكون محتاجين احماء قبل التمارين, كمان هنا هنعمل احماء لعضلات الوجه, هنحرك الفك السفلي لقدام ولورا ونحركه ببطء من غير حركات مفاجئة, كرري التمرين من 8 – 10 مرات.

تمارين للتخلص من الدقن المزدوجة
تمارين للتخلص من الدقن المزدوجة

1- التمرين الاول:

افتحي الفم ولفي الشفة السفلية فوق الاسنان السفلية, حركي راسك لتحت وانتي بتشفطي المنطقة دي واقفلي الفم وانتي بترفعي راسك تاني لفوق.

اثناء التمرين اتأكدي ان زوايا الشفايف في حالة استرخاء تام, كرري التمرين من 5 – 7 مرات.

تمارين للتخلص من الدقن المزدوجة
تمارين للتخلص من الدقن المزدوجة

2- التمرين التاني:

احيانا الدقن المزدوجة بيكون سببها هو ضعف عضلات المنطقة دي وبالتالي بتحتاج لتقوية وشد.

طلعي لسانك لبره بقدر الامكان وحطي ايدك تحت دقنك وحاولي توصلي لانفك بطرف لسانك على قد ما تقدري, وخلي الشفايف في حالة استرخاء اثناء التمرين, كرريه 5 مرات.

تمارين للتخلص من الدقن المزدوجة
تمارين للتخلص من الدقن المزدوجة

3- التمرين التالت:

لو عايزة شكلك يبان اصغر وتصغري الخدود اعملي التمرين ده.

لفي راسك ناحية الشمال, واسحبي الفك السفلي لقدام, وشدي عضلات الرقبة يعني لازم تحسي بحركة العضلات على الرقبة وهي بتتمدد, وبعدين لفي راسك ناحية اليمين واعملي نفس التمرين, كرري التمرين 5 مرات لكل جنب.

تمارين للتخلص من الدقن المزدوجة
تمارين للتخلص من الدقن المزدوجة

4- التمرين الرابع:

في التمرين ده اتخيلي انك بتبوسي زرافة او شخص طويل اوي :D عشان توصلي للنتيجة المطلوبة وتعملي التمرين بشكل صح.

ارفعي الوجه لفوق, وبصي للسقف, ومدي الفك السفلي لقدام شوية, وضمي شفايفك كانك هتبوسي حد, لو حسيتي بضغط على الرقبة شوية كده يبقى انتي بتعملي التمرين بطريقة صح, اثبتي على الحركة لمدة من 5 – 8 ثواني وبعدين ارجعي للوضع الطبيعي وكرريه 5 مرات.

تمارين للتخلص من الدقن المزدوجة
تمارين للتخلص من الدقن المزدوجة

5- التمرين الخامس:

ضمي قبضة ايديكي الاتنين وحطيها تحت الدقن, وابدأي حركي الفك السفلي لتحت شوية على قبضة الايد, واضغطي على العضلات بالايد اثناء الحركة يعني كأنك بتقاومي الفك, وقوة الضغط زوديها بالتدريج اثناء التمرين لحد ما توصلي لاقصى درجة من المقاومة اعملي الحركة لمدة 3 ثواني وبعدين استرخي وارجعي للوضع الطبيعي, وكرريه من 5 – 7 مرات.

تمارين للتخلص من الدقن المزدوجة
تمارين للتخلص من الدقن المزدوجة

6- التمرين السادس:

خلي سنانك مقفولة على بعض وابتسمي بحيث انك تمدي زوايا الشفايف على قد ما تقدري وتشدي العضلات, ادفعي اللسان ناحية سقف الحلق واضغطي وزودي قوة الضغط بالتدريج, لو حسيتي بضغط في عضلات الدقن يبقى كده بتعملي التمرين بشكل صح, اثبتي على الحركة لمدة 5 ثواني, وبعدين استرخي وارجعي للوضع الطبيعي لمدة 3 ثواني, وكرريه من 5 – 8 مرات.

تمارين للتخلص من الدقن المزدوجة
تمارين للتخلص من الدقن المزدوجة

7- التمرين السابع:

استنشقي بعمق واملي الفم بالهوا, واقفلي الفم وخلي الهوا في خدودك يعني الخدود تبقى منفوخة, اضغطي بكفك على الخدين بحيث تضغطي على العضلات وخليكي ضاغطة لمدة من 3 – 5 ثواني, وبعدين طلعي الهوا من الفم واسترخي وارجعي للوضع الطبيعي, وكرريه من 5 – 6 مرات.

تمارين للتخلص من الدقن المزدوجة
تمارين للتخلص من الدقن المزدوجة

 التمارين كلها تتعمل من 2 – 4 مرات في الاسبوع لافضل النتايج.

– فيديو للتمارين:

اتخلصي من دهون الوجه والرقبة في اسبوع واحد بس

علاج دهون الوجه و الرقبة
علاج دهون الوجه و الرقبة