5 اسباب بتخلي الكيرلي بتاعك يبوظ بسرعة .. وازاي تحافظي عليه اطول فترة

الكيرلي من استايلات الشعر اللي بتدي لوك حلو اوي لكن في اوقات كتير الكيرلي بيبوظ مننا بسرعة ومش بيدوم فترة طويلة وبعد كام ساعة نلاقيه اتفرد او هاش وبنبقى مش عارفين ايه السبب في ده, والنهاردة هنقولكم ليه الكيرلي بيبوظ بسرعة, وافضل الطرق عشان تحافظي على الكيرلي زي ما هو اكتر من يوم.

ليه الكيرلي بيبوظ بسرعة وازاي تحافظي عليه:

1- عوامل الجو:

اول حاجة ممكن تأثر على الشعر وبتبقى خارجة عن ارادتنا اكيد هي عوامل الجو سواء الهوا او الرطوبة المستمرة الحاجات دي بتأثر على الشعر لان الرطوبة بتوسع مسامات فروة الراس وبتخلي الشعر يمتص الرطوبة وبتبوظ الكيرلي.

وعشان نحافظ على الكيرلي اطول فترة ضد عوامل الجو نستخدم منتجات على الشعر ضد الهيشان زي سيروم لوريال الفيف او زيرو فريز او كريستال او تيرسميه او CHI, او نستخدم اسبراي ضد الرطوبة زي CHI او GK او Oribe.

2- اختيار اداة غلط:

اختيار الاداة الصح وظبط الحرارة من العوامل المهمة جدا اللي بتأثر ان الكيرلي يدوم فترة طويلة او يبوظ بسرعة, الشعر الكثيف بيكون محتاج ظبط الحرارة على اعلى درجة عشان الكيرلي يدوم فترة طويلة وكمان الشعر الخشن بيحتاج درجة حرارة عالية لحد 415 درجة, بس اكيد عشان نحافظ على الشعر صحي والمكوى متأثرش عليه مننساش حامي الشعر من الحرارة, ممكن نستخدم تيرسميه او لوريال او دوف.

كمان الحجم وشكل المكوى بيأثر على نتيجة الكيرلي الافضل انك تختاري المكوى المسطحة, او تختاري حجم مكوى اصغر من اللي انتي متعودة تستخدميه لفرد الشعر عشان يديكي نتيجة احسن مع الكيرلي ويدي الشعر تجعيدات صغيرة تدوم فترة طويلة, ولو Beachy Waves مش بيدوم معاكي فترة طويلة جربي تستخدمي المكوى بحجم ال ¾ او اصغر ودي واحدة من احجام المكوى بيكون صغير.

3- بتعملي الكيرلي بسرعة:

الكيرلي عشان يطلع مظبوط معاكي محتاج وقت عشان يعني لازم تدي نفسك وقت كافي عشان تعمليه بالراحة وتطلع النتيجة زي ما انتي عايزة لانك لو مستعجلة او بتعمليه بسرعة مش هيطلع معاكي مظبوط في الاخر ومش هيديكي النتيجة اللي انتي عايزاها, قسمي الشعر لخصل صغيرة وابدأي اعملي خصلة خصلة وادي كل خصلة حقها واظبطيها.

ولو عايزة الكيرلي يدوم معاكي كذا يوم متلميهوش عقدة قبل ما تنامي لانها هتبوظ الكيرلي, افضل حاجة تلميه باستك من الرفيع من النوع اللي مش بيجعد الشعر او ممكن يعلم فيه واعمليه ديل حصان عالي بس ميكونش محكوم اوي يعني خليه فضفاض شوية, بالطريقة دي هتحافظي على الكيرلي بتاعك كذا يوم زي ما هو.

4- بتعتمدي بس على التصفيف بالحرارة:

في انواع الشعر بتحتاج حاجات مساعدة مع المكوى عشان الكيرلي يدوم فترة اطول زي الشعر الخفيف او المفرود اوي بيحتاج بعد ما يتعمل كيرلي انك تستخدمي حاجات مساعدة زي البكر, او تجربي تعمليه قبل ما تنامي ضفاير صغيرة, او كحكة, او تقلبي الشعر كله على قدام وتلفيه بسكارف طول الليل.

قصة الشعر كمان من الحاجات المؤثرة في الكيرلي, يعني قصة الشعر المدرجة او معمولة طبقات طويلة من اكتر القصات اللي بتتعمل كيرلي بسهولة من غير مجهود.

5- اساءة استخدام منتجات الشعر:

مصففين الشعر المحترفين بيتفقوا ان المنتجات اللي بترطب الشعر او بتخلي شكله بيكون زي المبلول دي افضل المنتجات اللي بتتوزع بسهولة وبالتساوي على كل خصة من الشعر.

ومن الحاجات اللي بينصحوا باستخدامها مع تجعيد الشعر:

1- الحامي من الحرارة من اول الحاجات اللي بينصحوا باستخدامها عشان نحافظ على الشعر صحي ومينشفش ويتكسر مع الوقت, كمان تحطي المنتجات على الشعر بالترتيب الصح يعني دهن الزيوت بيتحط قبل حامي الحرارة لان ده بيساعد الشعر يمتصه بشكل اسهل.

2- استخدمي الشامبو الجاف من تاني يوم بعد الكيرلي عشان تعملي ريفريش للشعر وتنضفيه, رشي على جذور الشعر كمية مناسبة وحتى كمان رشي على الشعر النضيف.

3- الزيوت من افضل المنتجات لمنطقة نص الشعر والاطراف, لو عايزة تدي لمعة للكيرلي بتاعك استخدمي اي نوع زيت بتفضليه خدي كمية بسيطة على ايدك وابدأي مرري صوابعك بين الشعر من النص وعلى الاطراف.

4- اللمسة النهائية عشان نتأكد اننا ننهي كل الخطوات بتاعتنا بطريقة صح استخدمي في الاخر مثبت شعر خفيف, ومن اكتر الانواع المناسبة للشعر الكيرلي هو الSalt Spray وخصوصا في الصيف لكن هو عموما مناسب لاستخدامه طول السنة لانه بيحافظ على الكيرلي اطول فترة.

10 اخطاء تجنبيهم وانتي بتعملي شعرك كيرلي بالمكوى