استخدامات مية الاكسجين الجمالية والصحية والمنزلية .. اعرفيها معانا

ريهام محمود
ريهام محمود
في
بشرة
6526

مية الاكسجين او بالاسم العلمي بيروكسيد الهيدروجين من الحاجات المفيدة واللي ليها استخدامات كتير جدا, والنهاردة من خلال موضوعنا هنتعرف على استخدامات مية الاكسجين الجمالية والمنزلية والصحية.

– استخدامات مية الاكسجين الجمالية:

1- علاج حب الشباب والبثور:

مية الاكسجين تعتبر من العلاجات الممتازة جدا لحب الشباب وبتساعد على تحسين صحة البشرة , اغسلي بشرتك كويس ونشفيها وبلي قطنة بمية الاكسجين وامسحي بيها البشرة وسيبيها لمدة 3 دقايق وبعدين اغسلي بشرتك, كرريها يوميا, وممكن تضيفي عليها زيوت اساسية زي المسك او زيت اللبان الدكر لزيادة فعاليتة في العلاج, وممكن بعد الخطوة دي تعملي ماسك بالزبادي والعسل لتغذية البكتيريا المفيدة وتحسين البشرة.

2- تبييض الاسنان:

استخدامه كغسول للفم مش بس بيساعد على تطهير الفم كمان بيساعد على تبييض الاسنان, وممكن تعملي خليط من اقراص الفحم المطحونة وضيفي لها مية اكسجين بنسبة تركيز 3% لحد ما يتكون عندك عجينة ادعكي بيها السنان.

3-التخلص من الرؤوس السودا وتنقية مسام البشرة:

مية الاكسجين كمان فعالة جدا في علاج الرؤوس السودا وكمان بتنضف وتنقي المسام, اخلطي معلقة من مية الاكسجين بنسبة تركيز 10% مع معلقتين خميرة ومعلقة مية دافية وقلبيهم كويس وافردي الخليط على البشرة وسيبيه 15 دقيقة وبعدين اغسليه بمية دافية, كرري الوصفة مرة واحدة في الاسبوع.

4- تبييض الاظافر:

مية الاكسجين من الطرق اللي ممكن تستخدميها لتبييض الاظافر والتخلص من الاصفرار والبقع, انقعي الضوافر في مية الاكسجين لمدة دقيقتين وبعدين اشطفيها بالمية وادهنيها كريم مرطب او زيت زيتون.

وممكن تعملي خليط بكميات متساوية من مية الاكسجين بنسبة تركيز 10% مع صودا الخبز “الكربوناتو” واستخدمي فرشة سنان ادعكي بيها الضوافر بالخليط ده وسيبي الخليط 10 دقايق وبعدين اغسليه بمية دافية ورطبي الضوافر.

5- تفتيح لون الشعر:

مية الاكسجين بتساعد كمان على تفتيح الشعر بشكل طبيعي, اخلطي كميات متساوية من مية الاكسجين والمية العادية وحطي الخليط في ازازة ببخاخ بس تكون ازازة لونها غامق عشان الضور ميأثرش على مية الاكسجين, رشي الشعر بالخليط وهو مبلول وسيبيه لحد ما ينشف وبعدين سرحيه بالمشط عادي, الخليط ده بيساعد على تفتيح الشعر بطريقة سريعة مع الاستخدام المستمر, بس اتجنبي انك تعملي الطريقة دي اكتر من مرتين ورا بعض في اليوم الواحد عشان متنشفش الشعر, كرريها مرتين في الاسبوع بس هتديكي لون بني فاتح مع التكرار, واستخدمي دايما بلسم لما تيجي تغسلي شعرك عشان ترطبي الشعر.

6- اخفاء الشعر الزائد في الوجه:

لو بتعاني من الم الفتلة في كل مرة بتعملي فيها وشك ممكن بدل ما تعملي وشك بالفتلة على طول تداري الشعر الزيادة بطريقة امنة باستخدام مية الاكسجين, اخلطي بودرة تشقير “موجودة في الصيدلية” مع شوية من مية الاكسجين بنسبة تركيز 20% وافردي الخليط على البشرة وسيبيه 15 دقيقة واغسليه بمية باردة ورطبي بشرتك, بس لو حسيتي بشكة او وخزة وانتي حاطة الخليط يبقى بشرتك حساسة ومستخدميهاش.

استخدامات مية الاكسجين الجمالية
استخدامات مية الاكسجين الجمالية

– استخدامات مية الاكسجين الصحية:

1- علاج التهابات الاذن:

من الفوايد الصحية لمية الاكسجين استخدامها كعلاج لالتهابات الاذن, استخدمي مية الاكسجين بنسبة تركيز 3% وخففيها بالمية ونقطي منها في الاذن من 6 – 8 نقط في كل اذن وخليكي مميلة راسك شوية للجنب لما تنقطي في كل ودن عشان السائل يدخل جوه, وبعد خمس دقايق كده هاتي فوطة قديمة وميلي الودن عشان اي سائل زيادة ينزل منها, وممكن تكرري الطريقة دي اكتر من مرة في اليوم لحد ما الالتهاب يخف.

2- تطهير الجروح:

مية الاكسجين يعتبر مطهر للجروح والخدوش وبتساعد على قتل البكتيريا, وتعتبر عامل مؤكسد قوي وفعال جدا ضد العدوى, بقطنة امسحي على مكان الجرح بمية الاكسجين بنسبة تركيز 3%.

3- غسول للفم:

مية الاكسجين تعتبر غسول طبيعي للفم وتدخليها في روتينك اليومي للعناية بالفم, هاتي مية الاكسجين بنسبة تركيز 3% وخففيها بالمية واستخدميها كغسول للفم, وممكن تضيفي لها بعض الزيوت لزيادة فعاليتها في تطهير الفم زي زيت القرفة او النعناع او القرنفل او اي نوع من الزيوت الاساسية.

4- التخلص من سموم الجسم:

عشان تنقي الجسم من السموم ضيفي فنجان من مية الاكسجين في بانيو مليان بالمية وانقعي جسمك فيه لمدة 20 دقيقة وبعدين اغسلي جسمك بالمية العادية, الطريقة دي بتخلي مية الاكسجين تدخل في مسام البشرة وبتطرد السموم من الجسم.

5- التخلص من فطريات القدم:

لو بتعاني من فطريات القدم او الاظافر, اخلطي شوية من مية الاكسجين بنسبة تركيز 10% مع مية عادية وبقطنة امسحي الاماكن اللي فيها فطريات بالخليط ده مرة كل يوم.

وممكن تنقعي رجلك في مية دافية مضاف ليها كوباية مية اكسجين.

6- لتطهير الحبل السري للاطفال:

من الحاجات اللي ممكن تستخدمي فيها مية الاكسجين هي تطهير مكان الحبل السري للبيبي بعد الولادة, بتساعد على تطهير المكان وبتسرع انه يقع بسرعة من السره, امسحي بس المكان بقطنة مبللة بمية الاكسجين.

7- مشاكل الاذن بعد السباحة:

مشاكل الاذن اللي ممكن تحصل بعد السباحة ممكن نحلها باستخدام مية الاكسجين, اخلطي كميات متساوية من مية الاكسجين والخل الابيض واستخدميها في الاذن بعد السباحة.

استخدامات مية الاكسجين الصحية
استخدامات مية الاكسجين الصحية

– استخدامات مية الاكسجين المنزلية:

1- منظف للزجاج:

مية الاكسجين تعتبر منظف طبيعي للزجاج والمرايات والنوافذ, حطي مية الاكسجين في ازازة ببخاخ ورشيه على اي زجاج عندك عايزة تنضفيه وامسحيه بفوطة نضيفة.

2- تطهير فرشة الاسنان:

فرش الاسنان كل فترة مع الاستخدام بتحتاج تطهير, حطي شوية مية اكسجين في طبق او كوباية وانقعي فيها الفرشة لمدة دقايق.

3- بديل للمبيض:

مية الاكسجين تعتبر بديل للمبيض او الكلور ممكن تستخدميها لغسيل الملابس والسجاد اللي الوانه فاتحة والتخلص من اي بقع فيهم, اخلطي مية الاكسجين مع شوية من سائل غسيل الاطباق وحطيه على البقعة وسيبيه شوية وبعدين اغسليها, بس اتجنبي تستخدميه مع الوان الملابس والسجاد الغامق عشان لونه ميبهتش, ممكن تحطي كوباية مية اكسجين في درج المبيض في الغسالة مع الغسيل الابيض والفوط.

4- مطهر للمطبخ:

مية الاكسجين تعتبر مطهر طبيعي للاسطح, حطي منها في ازازة ببخاخ ورشيه على الاسطح والرخامات والواح التقطيع وخصوصا اللي بتقطعي عليها اللحوم النية لانها بتساعد على قتل البكتيريا.

5- تنضيف وتبييض البلاط:

زي ما قولنا ان مية الاكسجين تعتبر مبيض فهي تعتبر فعالة في تنضيف وتبييض البلاط, رشي مية الاكسجين بنسبة تركيز 3% على البلاط وسيبيها ساعة وبعدين اشطفيه.

6- تنضيف الخضروات:

مية الاكسجين بتساعد على تنضيف الخضروات من اي مواد كيميائية او اي مواد مضره وكمان بتطول عمر الخضار وبتحافظ عليها نضرة, املي طبق بمية وضيفي لها ¼ كوباية من مية الاكسجين وسيبيها منقوعة من 15 – 20 دقيقة وبعدين اشطفيها بمية عادية.

استخدامات مية الاكسجين المنزلية
استخدامات مية الاكسجين المنزلية

 فوايد واستخدامات اقراص الفحم الصحية والجمالية لازم تعرفيهم

فوايد واستخدامات اقراص الفحم الصحية والجمالية
فوايد واستخدامات اقراص الفحم الصحية والجمالية

مقالات متعلقه

تحدي اليوم الواحد لتوهج بشرتك قبل الفرح

تحدي اليوم الواحد لتوهج بشرتك قبل الفرح

علاج الايورفيدا للبشرة في البيت في 3 خطوات سهلة

علاج الايورفيدا للبشرة في البيت في 3 خطوات سهلة

5 علاجات طبيعية بتستخدمها كارينا كابور لبشرة نضرة وشباب

5 علاجات طبيعية بتستخدمها كارينا كابور لبشرة نضرة وشباب