8 نصايح عشان تحولي دولابك من موسم الشتا للربيع
تغيير المواسم من اكتر الحاجات اللي بتحيرنا في اللبس والوقت ده من السنة بيبقى الجو يوم برد ويوم دافي وبنبقى مش عارفين نلبس تقيل ولا خفيف نلبس بوت ولا صندل, والنهاردة هنقولكم ازاي نحول دولابنا من الشتا للربيع وايه اللي ممكن نلبسه في الوقت ده من السنة.
ازاي نحول دولابنا من الشتا للربيع:
1- البوت مع فستان ربيعي:
ممكن نجرب نلبس بوت طويل لحد الركبة مع فستان قصير ربيعي خفيف من الشيفون, او نلبس فستان طويل مع انكل بوت ونوفق فوقيهم جاكيت خفيف خصوصا لو خارجة بالليل مثلا وممكن يكون الجو لسه برد شوية.
2- سويتر سميك مع جيبة شيفون ماكسي:
ممكن تلبسي سويتر كشمير مع الجيبة الماكسي الشيفون بدل البنطلون الجينز يعني تغيري شوية في التركيبة وتلبسي السويتر بطريقة جديدة على حاجة مناسبة لفصل الربيع يعني تجمعي ما بين الشتا والربيع في لوك بسيط وانيق.
3- بليزر بوي فريند Boyfriend Blazer:
جربي تلبسي بوي فريند بليزر هيبقى مناسب اوي للوقت ده لانه مش تقيل اوي ولا خفيف اوي, وهيديكي لوك كلاسيكي انيق, ممكن توفقيه مع تيشرت ابيض وبنطلون جينز او تيشرت وجيبة.
4- بنطلون Culottes:
موديل البنطلون الواسع سواء القصير او الطويل منه من الحاجات المناسبة اللي ممكن تلبسيها للوقت ده جربي البسي الفلفيت او الجلد وتوفقي معاه حاجة خفيفة من فوق ممكن قميص جينز او سويتر كشمير, وتلبسي معاه انكل بوت من المفتوح او شوز بكعب.
5- البسي Trench Coat:
الTrench Coat من القطع المناسبة جدا للوقت ده لانه بالطو خفيف, ممكن تجربي تلبسي منه خامة الحرير هيدفي وفي نفس الوقت مش هيحرر, ممكن تنسقي معاه توب او قميص او بلوزة مع البنطلون الجينز, كمان الTrench Coat من الحاجات التريندي والموضة جدا السنة دي.
6- الجينز الفاتح:
طبعا فصل الشتا بتبقى دايما الوانه غامقة ومع بداية الربيع ممكن نحاول نفتح شوية في لون الجينز, ممكن تلبسي جاكيت جينز فاتح مع تيشرت او البنطلون الجينز الفاتح مع قميص او تيشرت.
7- البوت المفتوح Open-toe boot او السابوه العريض Chunky mule:
اكيد طول الشتا بنلبس البوت او الشوز المقفولة, مع بداية الربيع ممكن نبدأ اننا نلبس الحاجات المفتوحة شوية زي البوت المفتوح من قدام عند الصوابع, او السابوه العريض اللي بيكون مغطي الرجل كلها من قدام عشان تبقى رجلك دافية وفي نفس الوقت يكون في نسبة هوا وشمس داخلين للرجل.
8- البسي خامات مختلفة:
ودي تعتبر من الطرق الرائعة جدا اللي تحولي بيها دولابك انك تنسقي بين الخامات التقيلة او السميكة مع الخامات الخفيفة يعني مثلا تلبسي سويتر تقيل مع الشيفون او الجلد او القطيفة يعني اختاري اقمشة او خامات فيها مسامات او بتتنفس وفي نفس الوقت بتدفي, ممكن تلبسي بلوفر سميك مع جيبة شيفون وعليهم جاكيت جينز, او فستان مع الجاكيت الجينز, او سويتر مع البنطلون الجينز وعليهم سكارف, يعني وفقي الخامات المناسبة مع بعض للوك انيق.