9 عادات لازم تعمليها كل يوم علشان تبقى على الموضة

رغم انه مفيش قاعدة معينة لازم تمشى عليها علشان يبقى ليكى ستايلك الخاص فى اى لوك تعمليه، الا انه فى عادات معينة لو التزمتى بيها وخلتيها جزء من يومك فى كل يوم هتعير من ستايلك خالص وتخليكى دايما جاهزة وشيك، اعرفى معانا 9 عادات لازم تعمليها كل يوم علشان تبقى دايما علي الموضة..

9 عادات لازم تعمليها كل يوم علشان تبقى على الموضة

1- لازم دولابك يبقى مترتب دايما:

الغلطة اللى تقريبا كلنا بنعملها هى انه الدولاب يبقى مبهدل ومش مترتب، و الهدوم المبعترة فى كل حتة، لانه الهدوم اما تبقى مش مترتبة فى الدولاب هتاخدى وقت اطول علشان تلاقى قطع هدوم مناسبة تلبسيها، ده غير انك كمان هتحسي انه ماعندكيش حاجه تلبسيها ! علقى هدومك وخليها مترتبة فى دولابك علشان تختارى هدومك وتلاقيها اسرع وتعرفى انتى محتاجة ايه بالضبط.

2- اتاكدى من حالة الجو كل يوم الصبح:

خلى تطبيق حالة الجو من الاساسيات على موبايلك، لانه حالة الجو مهمة علشان تعرفى  تلبسي ايه ويكون لبسك مناسب للجو ، خصوصا فى ايام فصل الخريف لانه كل يوم الجو بيبقى بحال، زى انك تبقى مثلا لابسة طبقات فوق بعضها و الجو حر النهاردة، او انك تبقى لابسة خفيف وتلاقى الجو قلب فجأة مطر وهوا.

3- جهزى لبس بكرة من النهاردة:

حاولى انك تخصصى وقت من النهاردة  تجهزى فيه لبس بكرة، علشان يبقى عندك مساحة اكبر من الوقت انك تختارى هدومك باهتمام و تنسقيهم صح، وتوفرى وقت الصبح فى انك تفطرى و تجهزى كويس علشان تطلعى بأحلى لوك.

4- خصصى لنفسك وقت كفاية الصبح علشان تجهزى:

كلنا عارفين انه الصحيان بدرى من أصعب الحاجات اللى ممكن نعملها فى يومنا كله :/ ، لكن مهم تحاولى تنامى بدرى وتصحى بدرى بوقت كافى عن ميعاد نزولك لكليتك او شغلك علشان تجهزى، بالطريقة دى كل يوم هتنزلى و انتى in style !

5- امزجى قطع ملابس مختلفة مع بعضها:

اانك تعملى لوك شيك و stylish مش معناه ابدا انك لازم كل هدومك تبقى ماركات وتبقى غالية وبأسعار خيالية، امزجى قطع ملابس مختلفة على بعضها وتكون لايقة على بعض واعملى ستايل خاص بيكى ويشبه شخصيتك.

6- البسى الهدوم اللى تبقى على مقاسك بالضبط:

انك تلبسي بنطلون ضيق اوى او واسع اوى مش حاجه شكلها حلو، وكمان مش مريحة. خليكى حريصة انك لما تيجى تشترى هدوم تيجيبى القطع اللى بتناسب مقاسك بالضبط ، لا اوسع ولا اضيق.

7- اختارى قطع الملابس الداخلية المناسبة:

ضرورى تكونى عارفة ازاى تختارى ملابسك الداخلية المناسبة ليكى، لانها بتفرق جدا فى شكل اللبس، واكيد مفيش بنت فينا تحب تكون حمالة الـ bra بتاعتها باينة مثلا من تحت الهدوم او كل شوية تفضل تقع وتضايقها، شوفى حيلة ذكية تدارى بيها حمالة الـ Bra .

8- المكواة!

القاعدة بتقول انه الهدوم المكسرة او اللى مش مفرودة بتبان رخيصة حتى لو غالية، علشان كده لازم تكون المكواة من الحاجات المهمة بالنسبة لك لما تيجى تهتمى بلبسك، ضرورى تكوى هدومك وتهتمى بشكلها وانها تبقى مفرودة علشان تبقى احلى، اعرفى ازاى تحافظي على الهدوم مفرودة بعد المكواة .

9- خلى عندك طقم جاهز للطوارئ:

آخر حاجة معانا من عادات لازم تعمليها كل يوم علشان تبقى stylish هى انك تخلى دايما فى طقم جاهز و متشال على جنب كده للطوارئ علشان لو احتاجتيه فى اى وقت، ويكون بسيط زى جينز مع تيشيرت، او جينز مع بلايزر. الطقم ده هيساعدك كتير فى الاوقات اللى بتبقى فيها مش عارفه تلبسي ايه.

شوفى معانا كمان 4 نصايح من مصممين الأزياء إزاي تنسقي الهدوم المنقوشة!