7 أخطاء فى روتين العناية بالبشرة الصباحى بتعمليهم كل يوم

آية حسان
آية حسان
في
بشرة
11389

مفيش بنت فينا مابتحاولش تهتم ببشرتها احسن اهتمام علشان تحميها وتحافظ على نضارتها وجمالها، وبما انه معظمنا بيستخدم روتين يومى وعلى الاغلب بيبقى الصبح بعد ما نصحى من النوم للعناية بالبشرة والاهتمام بيها، فى اخطاء كتير ممكن نكون بنعملها من غير ماناخد بالنا، والاخطاء دى ممكن تكون سبب فى اننا بنضر بشرتنا اكتر ما بننفعها، علشان كده فى المقال ده هنعرفك على 7 أخطاء فى روتين العناية بالبشرة اللى بتعمليه كل يوم الصبح ماكنتيش واخده بالك منهم !

7 أخطاء فى روتين العناية بالبشرة الصباحى بتعمليهم كل يوم

1- بتنضفى بشرتك بشكل مبالغ:

لو كانت بشرتك من النوع اللى بيحمر و يلتهب بسهولة حتى بعد غسيل الوش العادى اللى بنعمله كل يوم الصبح، يبقى ده ممكن يكون بسبب انه بشرتك بتتخلص بسهولة من الزيوت الطبيعية اللى بتفرزها فى كل مرة تستخدم منظف الوجه، علشان كده لو كانت بشرتك من النوع الحساس، اكبر غلط ممكن تكونى بتعمليه هو تنضيف البشرة بشكل مبالغ بانك تغسلى وشك او تستخدمى منتجات تنضيف الوش كتير. الحل هو انك تحاولى انك تقللى من استخدام منظف الوجه و تستخدميه مرة واحدة بس فى آخر اليوم واكتفى بشطف وشك من الاتربة اول بأول بالمية الفاترة.

تنضيف البشرة المتكرر
تنضيف البشرة المتكرر

2- بتستخدمى نفس الفوطة لوشك مرات كتيرة:

خطأ تانى بنعمله فى أخطاء فى روتين العناية بالبشرة هى اننا نستخدم نفس الفوطة لوشنا اكتر من يوم، لانه فى آخر كل يوم الفوطة بتبقى اتشبعت بالزيوت و الاتربة من تجفيف بشرتنا طول اليوم وبتبقى رطبة، الرطوبة دى بتكون بيئة مناسبة لنمو البكتيريا والفطريات. علشان كده مهم انك ماتستخدميش نفس الفوطة لوشك اكتر من يوم، وانك فى بداية كل يوم تستخدمى فوطة جديدة.

استخدام نفس الفوطة اكتر من مرة
استخدام نفس الفوطة اكتر من مرة

3- بتستخدمى منتجات العناية بالبشرة بترتيب غلط:

حسب كلام أطباء الجلد وخبراء التجميل فى ترتيب معين لاستخدام منتجات العناية بالبشرة، والترتيب هو: منظف البشرة وبعدين سيروم البشرة وبعدين الصن بلوك وبعدين المرطب وبعد كده كريم العيون.

الترتيب الغلط لاستخدام منتجات العناية بالبشرة
الترتيب الغلط لاستخدام منتجات العناية بالبشرة

4- بتجمعى بين استخدام منتجات كتيرة:

منتجات العناية بالبشرة كتيرة جدا بدرجات مختلفة و من ماركات مختلفة و للأنواع المختلفة للبشرة، لكن انك تحاولى تستخدمى كل حاجه لبشرتك علشان تحققى استفادة اكبر بيعتبر واحد من اكبر أخطاء فى روتين العناية بالبشرة لانه فى الحالة دى المنتجات بتضر بشرتك مش بتفيدها وممكن تسبب الاحمرار، الالتهاب او حتى الحساسية لبعض الانواع دى و تقشر البشرة. ورغم انه فى منتجات لما تستخدميها مع بعض زى المنتجات اللى بتحتوى على فيتامين C وفيتامين E، الا انه فى منتجات تانية لو استخدمتيها مع بعض بتعمل كارثة زى منتجات التخلص من حبوب الشباب مع المواد اللى بتحتوى على مادة الـ retinol. وعلشان تجنبى بشرتك الضرر ده استنى دقيقة كاملة او يفضل من دقيقة لخمس دقايق بين استخدام منتج و التانى، واعتمدى فى استخدامك على المنتجات الخالية من الرائحة و الكحول.

5- مابتستخدميش كريم العيون على شفايفك:

دايما استخدمى كريم العيون على الشفة العلوية، لانه الكريمات دى بتبقى غنية بالكولاجين ومشتقاته ومواد مقاومة التجاعيد، وده لانه العين من اصعب الامكان من ناحية الاهتمام بيها والحفاظ عليها فبتحتاج مركبات قوية. وبما انه الشفايف بيبان عليها السن والتجاعيد اسرع من اى جزء تانى فى الوش ، كريم العين هيبقى مفيد جدا فى الاهتمام بشفايفك.

استخدمى كريم العيون على شفايفك
استخدمى كريم العيون على شفايفك

6- مابتستخدميش الطريقة الصحيحة فى تنظيف الوش:

واحد من اكتر أخطاء فى روتين العناية بالبشرة انتشارا هو تنضيف الوش بطريقة غير صحيحة، وهى اننا بنغسله بأى حركة وخلاص. لكن الطريقة الصحيحة هى انه تحطى كمية مناسبة من غسول الوجه الخاص بيكى على أنامل صوابعك وبعدين تبدأى تدعكى  الانف الاول من تحت لفوق، وتطلعى لحد الجبهة وبعدين حوالين العينين ونزولا على الخدين لحد ما توصلى لدقنك، الحركة دى فى تنضيف الوجه بتعزز من الدورة الدموية اثناء الغسيل.

اغسلى وشك بطريقة صحيحة
اغسلى وشك بطريقة صحيحة

7- بتستنى وقت طويل بين استخدام المنتجات:

بعد تنضيف بشرتك باستخدام غسول البشرة على طول، او بعد  دقيقة واحدة بس استخدمى التونر او كريم الوجه او الكريم المرطب، لانه بعد تنضيف الوش بتبقى المسام لسه مفتوحة فاستتخدام منتج عناية بالبشرة بعد ما تغسلى وشك على طول هيخلى بشرتك تمتصه بشكل أفضل، علشان كده بعد ما تغسلى وشك باستخدام المنظف ماتستنيش كتير قبل ما تستخدمى المنتج اللى عليه الدور.

استخدمى منتجات العناية بالبشرة على طول بعد غسل الوجه
استخدمى منتجات العناية بالبشرة على طول بعد غسل الوجه

اعرفى معانا كمان نصايح ازاى تتخلصى من الرؤوس السوداء بشكل صحيح

مقالات متعلقه

مكون واحد بس لمنع علامات الشيخوخة

مكون واحد بس لمنع علامات الشيخوخة

مكونات طبيعية اساسية ومتعددة الاستخدامات للبشرة والشعر

مكونات طبيعية اساسية ومتعددة الاستخدامات للبشرة والشعر

ليه حب الشباب بيظهر في ال 8 اجزاء دي من الجسم ، وايه اللي المفروض تعمليه

ليه حب الشباب بيظهر في ال 8 اجزاء دي من الجسم ، وايه اللي المفروض تعمليه