نصايح ازاى تتخلصى من الرؤوس السوداء بشكل صحيح

اكيد كلنا سمعنا عن الماسك الاسود المشهور للتخلص من الرؤوس السوداء، وشوفنا فيديوهات قد ايه هو مؤلم وبيشد البشرة جامد وانتى بتعمليه، بالرغم من الـ reviews الكتيرة اللى بتقول انه نتايجه حلوة، لكن لو كنتى زيى خايفة من الوجع اللى بيسببه او  لو كانت بشرتك حساسة فبتقلقى من استخدام اى منتج انه ممكن يؤذى بشرتك او يتعبها، يبقى المقال ده مفيد جدا ليكى، بنات حوا فى المقال ده هتعرفك ايه هى نصايح وخطوات ازاى تتخلصى من الرؤوس السوداء بشكل صحيح بنفسك فى البيت، ومن غير ما تقلقى!

نصايح ازاى تتخلصى من الرؤوس السوداء بشكل صحيح

انك تعرفى ازاى تتخلصى من الرؤوس السوداء مش حاجه سهلة، خصوصا لو كنتى مش على علم كبير بمنتجات العناية بالبشرة ووظيفة كل منتج فيهم وازاى تستخدميه، لكن امشى على النصايح اللى هتشوفيها دلوقتى و انتى هتقدرى تعالجى بشرتك وتخليها نضيفة و ناعمة وصافية، ومن غير الم!

1- ماتعمليش تقشير لبشرتك بشكل مبالغ:

تقشير البشرة مفيش شك فى انه مفيد فى تنضيف المسام و ازالة الزيوت الزائدة اللى بتتراكم على البشرة، لكن المبالغة فى عمل تقشير البشرة ممكن تسبب ضرر كبير لبشرتك بدل ما تفيدها، لانه التقشير المبالغ بيرهق البشرة و بيسبب الاحمرار و الالتهاب، وتهيج وجفاف البشرة. لانه واحد من مكونات مقشر البشرة زى “حمض السالسليك” مفيد فى التخلص من خلايا البشرة الميتة، لكن لو استخدمتيه كتير بيسبب ضرر البشرة.

وكمان دعك البشرة بالمقشر بعنف خصوصا لو كان عندك حب شباب، بيخلي الحبوب تزيد و الرؤوس السوداء تكتر و بيزود من افراز البشرة للزيوت. علشان كده اكتفى بانك تعملى تقشير لبشرتك مرة او مرتين بس فى الاسبوع.

2- ما تلمسيش الرؤوس السوداء:

نصيحة تانية من نصايح ازاى تتخلصى من الرؤوس السوداء هى انك ماتلمسيش الرؤوس السوداء، بمعنى انه ماتلعبيش فيهم او تشديهم او تحاولى تقشريهم بضوافرك، لانه الحركة دى بتأذى البشرة جدا و لما بتشدى الرؤوس السوداء وتحاولى تفتحيها ده بيسبب تصلب البشرة، الالتهاب وكمان ممكن يعمل علامات على بشرتك.

3- جهزى بشرتك:

قبل ما تقررى تتخلصى من الرؤس السوداء وتعمليلها extraction او تشيليها، لازم تجهزى بشرتك الاول. اغسلى بشرتك كويس بمنظف بشرة معتدل ويفضل يكون اساسه مية، وبعد كده اعملى لوشك جلسة بخار مدتها من 15 لـ 20 دقيقة علشان تشيلى اى بقايا لاى مكياج او اتربة او تراكم زيوت على وشك و تفتحى المسام قبل ما تبدأى تشيلى الرؤوس السوداء.

بننصحك تعملى extraction للرؤوس السوداء بعد ما تكونى واخدة شاور علشان تبقى بشرتك رطبة ولينة، و كمان انك تفردى طبقة من الكريم المرطب على وشك بعد جلسة البخار و قبل ما تشيلى الرؤوس السوداء بالابرة المخصصة علشان تحبسي الحرارة اللى اكتسبتها بشرة وشك من البخار جوا المسام، لانه الحرارة هتسهل عليكى انتزاع الرؤوس السوداء.

4- استخدمى تكنيك صح فى ازالة الرؤوس السوداء:

ممكن تعملى ازالة للرؤوس السوداء باستخدام الابرة المخصصة للخطوة دى او باستخدام الضغط بصوابعك، لكن فى تكنيك معين لاستخدام الطريقتين دول من غير ما تسببى ضرر لبشرتك، لانه لما عملية التخلص دى بتتعمل غلط ده ممكن يسبب جروح فى بشرتك او غمقان البشرة اللى ممكن يدوم من 5 ايام لشهر كامل ، الطريقة الافضل هى استخدام الابرة المخصصة لازالة الرؤوس السوداء عن طريق انك تثبتيها على الرأس السوداء وتضغطى مع السحب لتحت فى حركة واحدة.

اما لو كنتى مترددة او خايفة تستخدمى الابرة وقررتى تستخدمى صوابعك، يبقى قربى صوابعك السبابة والابهام من الرأس السوداء “لكن مش قريب اوى” و اضغطى على الجزء ده من بشرتك علشان تضغطى على الرأس السوداء و تعمليلها extraction أعمق، وماتستخدميش ضوافرك.

5- ابعدى عن الرؤوس الصعبة:

نصيحة مهمة من نصايح ازاى تتخلصى من الرؤوس السوداء علشان تطلعى بنتيجة ترضيكى هى انك لما تقررى تشيليهم انك تبعدى عن الرؤوس الصعبة، وده معناه الرؤوس اللى بيبقى لونها فاتح اوى او اللى لاحظتى انها لسه بتتكون جديد على بشرتك، لانه الرؤس دى بتبقى صعب جدا التحكم فيها والوصول ليها ، فلما تيجى تضغطى عليها او تشييه بالابرة هتجرحى بشرتك ومش هتوصليلها، فبتعتبر رؤوس صعبة. الهدف هو انك  لما تيجى تتخلصى من الرؤوس السوداء علشان تطلعى بنتيجة ترضيكى هى انك تشتغلى على الرؤوس الغامقة جدا و الواضحة لعينيكى علشان تقدرى تتخلصى منها بسهولة وتحسي بفرق لما تخلصى، فلو الرأس السوداء ماطلعتش معاكى بعد 3 محاولات يبقى سيبيها وابدأى اشتغلى على واحدة تانية.

6-رطبي بشرتك:

ترطيب البشرة والحفاظ على معدلات الترطيب وافراز الزيوت فى بشرتك خطوة مهمة جدا فى التخلص من الرؤوس السوداء، لانها بتعتبر هى المفتاح للتقليل من ظهورها وبتخلى التخلص منها أسهل. خصوصا انه البشرة الجافة بتبدأ مع الوقت تفرز زيوت اكتر من اللى بشرتك محتجاه، والزيوت دى لما بتتراكم بتكون الرؤوس السوداء. خليكى حريصة على الترطيب اليومى لبشرتك علشان تتجنبى تكون رؤوس سوداء جديدة.

7- ماتبصيش فى المراية كتير:

مفيش بنت فى الدنيا مابتحبش تبص فى المراية، بس خطوة مهمة علشان تساعدى نفسك تتخلصى من الؤوس السوداء بشكل صحيح هى انك ما تبصيش فى المراية كتير، وحصوصا عن قرب كده وتقعدى تركزى فى تفاصيل وشك، لانه النظرات القريبة و الفحص الدقيق ده ممكن يشغل بالك عن الرؤوس اللى محتاجة ازالة فعلا او يخليكى تفتكرى عيب معين فى بشرتك انه من الرؤوس السوداء وهو ممكن فى الحقيقة مايبقاش كده، علشان كده بنقول ركزى على الرؤوس الواضحة لعينيكى.  لانه احيانا المراية ممكن تكبر المشكلة عن حجمها الحقيقي.